 |
ВЛАДИМИР РОМАНОВЛЫ СӤЗЕМ ВИРТУАЛЬНОЙ МУЗЕЙ "...Выжыё уго
|
|
|
|
НЫЛГА НЫЛ Мугорын тон — веськырес кызьпу.Анаед тӧдьы кызьпуослы Синмаськем, узы бичаллякуз, Юн оскем: таӵе луоз нылы. Синъёсыд тынад — чагыр етӥн. Анаед туж ӵем, дыр, ортчылӥз Сяськаясь етӥн бусыетӥ — Сюлэмаз бен тон гинэ улӥд. Нош сӥзьыл, лудын етӥнакуз, Тон сярысь ик со малпаз ялан. Йырсиед соин — етӥн кадь кузь, Йырсиед соин ик — ӵуж мертчан. Куараед нош, куараед тынад — Уӵы гур я жильыртӥсь ошмес. Гуртады «Ой, шудоез понна,— Шуыло ни,— будэтӥм нылмес». Вылтусыд выллем чылкыт, чебер Малпанэ сюлмын улэ ялан: Та нылмурт — ачиз Камдор шаер, Та нылмурт — мусо удмурт кырӟан. Муспотон чагыр етӥн синъёс Эш сямен тыныд пальпотозы. Лудъёсын пельтӥсь шуныт тӧлъёс Анаед сямен вешалозы. Одӥгнад эн сыл гурезь бамын — Сёт бадяр-батыр пилы кидэ. Асьмелэн шудо шаерамы Тон но шедьты аслэсьтыд шуддэ. © irinaewdo |