(1943 - 1989)

Удмурт кылбурчи, журналист

ВЛАДИМИР РОМАНОВЛЫ СӤЗЕМ ВИРТУАЛЬНОЙ МУЗЕЙ



                             "...Выжыё уго
                             Луэме потэ.
                             Выжыед ке юн,
                             Му золгес кутэ..."

                                                            В. Романов





«Ноку но уг лыкты ни,
Эн витьы ни»,— шуоз но
Одӥг пол лыктоз ыштэм яратонэд.
Шыпытак пуксёз со тон азе,
Витьыса учкоз, учкоз шорад...

...Со вера ни, кыӵе ӟеч улэ,
Кыӵе умоесь юлтошъёсыз.
Куараез нош малы дыректӥз?
Синъёсыз но
Малы сырмало?

Тон уд оскиськы на
Та пумиськонлы.
Нош тодэ ваён
Вырӟе, вырӟе, вырӟе ни,
Шуныт кыл но верамед потэ ни,
Синвузэ но ӵушемед потэ.

Нош уг лу дораз вамыштэмед:
Ӝог лобись дырлэн толэзьёсыз
Тӥ куспын зӧк йӧ
                        кылдытӥллям ни,
Люкиллям ни адскисьтэм гожен.

Я бен ма?!
Чылкыт тодэ ваён
Сюлэмад пумен синоз, кысоз-а?
Яке сюлэмлэн ӟырдытэныз
Жалясьтэм дырлэн йӧэз но
Шуналоз?..