ВАЁБЫЖ КАР
Коргид сигын — ваёбыж кар.
Мыным гинэ тодмо со.
Сое —
Сутскоз, шуо, корка —
Йӧтылыны уг косо.
— Сое, пие,— шуэ нэнэ,—
Изъянтыны уг яра...
Нош мон сое учко гинэ,
Номыр сое уг кары.
Карез татын ик мед улоз.
Пиосыныз уг шуды.
Мон тодӥсько: ваёбыжъёс
Ваё ӟеч ар но, шуд но.
Шуо ини: туэ ю тысь
Кеносъёсы тэроз-а!..
Тани... атай... ӧз ву фронтысь...
Оло... шуак бертоз ай...
Соин коргид сигын ӵошен
Соку кӧлаломы ми...
Дышетскыны кышъям штанэн
Огпол но мон уг мын ни...
Ваёбыж кар... мон тодӥсько:
Исалляны уг яра.
Нош мон ӧжыт гинэ учко,
Сое номыр уг кары.
Тани копай кӧй нӥзили—
Пиез сиёз-а, уз-а?
Та быдӟазэ ни ке ньылӥз,
Ӝоггес будоз соку со...
Ӝомыт сигын утчай сюрес.
Ой! турынэ гуштӥ но —
Ӧй шӧды: ваёбыж карез
Пыд выжыям куштӥ мон.
Map лэсьтэмме ни валамъям,
Азям мур гу кылдӥз кадь:
Нош табере... бурдо семья
Юртысьтымы кошкиз ке?!
Я мар луоз?
Я мар луоз?!
Пайми но мон, дэйми но.
— Эн кошкелэ, ваёбыжъёс! —
Карзэс езэн думи мон.
— Эн кошкелэ,
ваёбыжъёс! -
Ваем шуддэс эн нуэ.
Эн кошкелэ,ваёбыжъёс,—
А то... атай... уз ву ни!..
Анай шуиз: «Тылпу луоз,
Солэсь карзэ таркад ке».
— Эн кошкелэ, ваёбыжъёс!
Мон юромо ӧй кары.,.
...Али бен ма.
Валай ни мон,
Тодэ гуртысь калык но:
Тылпу потон,
Атай бертон
Ваёбыжен уг лыкто.
Озьы ке но,
Малы соку —
Юнгес сутӥськемысь-а? —
Сюлэм пушкын уг кыс тылпу
Али ке но уг кысы!
