КЫДЁКЫСЬ ТЭЛЕ!
Выжимы Нылга шурез,
Возь вылтӥ нуиз сюрес.
Собере
Сэрыт дыртӥм
Сьӧдчабей бусы дуртӥ,
Со бусы пумын — нюлэс!
Пыриськом ми пыдлогес.
Нош отын — кудымульы —
Со тырме котькудмылы.
Сииськом сое утыр —
Ымдуръёс луо бусӥр.
Собере шеде намер.
Со но ваньмылы тырме.
Веръямы сое ӧжыт —
Бамъёс луизы ӵыжыт.
...Горд шунды ваське уллань
Кошконо ини гуртлань!
Нюлэскысь потӥм гинэ,
Пумитам —
Малпад: кинэ? —
Тодмотэм пиналъёсты!
Бамъёссы ӵыжыт укыр,
Нош ымдуръёссы — бусӥр.
Таосыд но, дыр, иське,
Шедьтӥллям узыр сикез.
Уть али,
Кудымульы
Трос шедем котькудӥзлы.
Намерзы нош ма мында! —
Кыче нюлэскысь меда?..
— Ми,— шуо,— нырысь ширтӥм
Сьӧдчабей бусы дуртӥ.
Возь вамен поттӥз сюрес.
Собере Нылга шурез
Выжимы...
– Дугдэ-ай,— шуиськомы,
– Со...
Милям ук нюлэсмы!
Сокеме ветлӥллямды!
Асьтэлэн — таӵе тэльды!
Нош соос серекъяло:
– Асьтэос пӧртэм, оло!
Та кеме лыктӥллямды:
Асьтэлэн — сыӵе тэльды!..
Огкылэ соку вуим,
Огкылысь соку шуим:
Ветлоно ни ке
Сике,
Ветлоно ни
Кы-дё-ке!
Оло нош,
Золгес
Жадёд –
Со понна
Тросгес
Адӟод.