ВЛАДИМИР РОМАНОВЛЫ СӤЗЕМ ВИРТУАЛЬНОЙ МУЗЕЙ

                                   ГУБИ БУС БЕРЕ

                                   Йӧлвыл кадь бус пӧлы
                                   Валлян
                                   Кызьпу тэльмы йыромылӥз.
                                   Бусъя
                                   Тодо ини милям:
                                   Губиянлэн дырыз вуиз!
                                   Кызьпу тэльын
                                   Куаръёс пӧлын
                                   Кырӟан пуке вайлы быдэ.

                                   Нош пыд улын ик,
                                   Саюлын,
                                   Чогыр-чогыр губи будэ.
                                   Я чакла-ай, кӧня пӧртэм!
                                   Таиз вӧё,
                                   Таиз йӧло,
                                   Тазэ, оло, пужмер гӧртэм —
                                   Гуртын юнме шат верало:
                                   Губиосты, пе, сайкатэ
                                   Тӧдьы йӧлвыл кадь тӧдьы бус,
                                   Губи пушлы но, пе, сётэ
                                   Со тӧдьы бус ик
                                   Тӧдьы тус.

                                   Таиз нош мар чиля?
                                   Учки —
                                   Шат горд лысву уин усем?
                                   Губи вӧзын
                                   Намер ӟуски
                                   Монэ вите ини вылэм!
                                   Пайми та чеберлы, пайми —
                                   Ачим ӧй сылы жальмаса.
                                   Тани куды но ӝог тырмиз,
                                   Нош котырам — губи, губи.
                                   Оло, кусо ке вайысал,
                                   Тани тазьы ик турнасал.

                                   Я чалелэ, эшъёс, жоггес! —
                                   Быдэс тэлез мон кузьмало.
                                   Ньыльдон пӧртэм губиослэсь
                                   Нимзэс мон лад-лад верало,
                                   Ньыльдон пӧртэм,
                                   Оло, тросгес
                                   Ческыт сиён мон пӧрало.