ВЛАДИМИР РОМАНОВЛЫ СӤЗЕМ ВИРТУАЛЬНОЙ МУЗЕЙ

     ВИТИСЬКОМ   ШУМПОТОНЭЗ

— Шуак,— шуиськомы дышем сямен.—
Шуак вормиз.
Шуак лэсьтӥз янгыш.
Выль рекордзэ
Шуак   пуктӥз спортсмен.
Шуак ӝутскиз
Космической корабль...

Нош мон уг оскиськы шуак кыллы.
Мон тодӥсько умой:
Вакчи кылбур шуак вордскон понна,
Кулэ быдэс улон.
Нош нянь,
Андан —
Шуак шат вордӥсько соос?!

Шуак — со секунда люкам аръёс.
Со зечедлэн но лекедлэн
Шӧдтэк шорысь лыктэм пунэмъёссы.
Аслад ужъёсыдлэн,
Малпанэдлэн
Дырын кисьмам емышъёссы.

Лотерейын гинэ
Дунтэм усе шуак —
Синтэм шӧдтэк шорысь утон.
Мукет учыръёсы
Шуак кыллэсь уг кылзӥськы улон.

Озьы ке но, котькуд нунал
Шуак шумпотонэз ми витиськом.
Соин, вылды, ужын
Жаден сярысь но ӵем вунэтӥськом!