ВЛАДИМИР РОМАНОВЛЫ СӤЗЕМ ВИРТУАЛЬНОЙ МУЗЕЙ

                                                      ВОЖЪЯСЬКОН

                                                   Уно солэн шумпотонэз,
                                                   Укыр уно —
                                                   Тямыс кузя солэн сузэр-выныз уго.
                                                   Дышетсконын, шуом, «витьёс» басьтэ Вера,
                                                   Покчиезгес «р»-ез умой ини вера.
                                                   Нош бадӟымез понна уз шумпоты-а бен? —
                                                   Со нырысьсэ ай киное мыноз нылэн.
                                                  Уно солэн сюлмаськонэз,
                                                   Укыр уно —
                                                   Тямыс кузя солэн сузэр-выныз уго.
                                                   Музъем пыдсысь, оло, пӧртэм ужпум шедьто,
                                                   Соку ик агайзэс котыртыса ёрто:
                                                   —      Агай, задачаме шонер-а лэсьтэме?
                                                   —      А-г-а-ай,— Васи бӧрдэ ни,—
                                                                                           тупат ай куасме.
 
                                                   Тямыс кузя сузэр-выныз та эшелэн,
                                                   Сюлмаськонэз ӵукнаысен ӝытозь солэн.
                                                   Куддыр секыт. Нош мон солы вожъяськисько:
                                                   Нош мон эше кадь кин сярысь сюлмаськисько?
                                                   Каргам война басьтӥз атаеным валче
                                                   Вордӥськымтэ сузэръёсме но вынъёсме.