КОЛЫС
Кезьыт пужыятоз укно синэз
Соку пыртом куасьтэм колыс.
Шыдэ понӥм ке, бичатоз нырдэс
Солэн ческыт но чырс зыныз.
Бусась шыдэ ватсаломы йӧлпыд —
Талэсь ческыт сиён уз лу!
Тӥни соку улӟоз тулыс мылкыд,
Вирын шаугетоз тудву.
Пель сьӧрамы ни кылӥськоз соку
Кусо шуккем, турнам куара.
Возь вылъёсын сильтӧл лекъяськыку,
Гужем гурез кылом шара.
Лымы ке но педлон, син азямы
Султоз ни лысвуо ӵукна...
Уно-а бен кулэ адямилы
Ӟечсэ тодэ ваён понна!..
Куддыр малы-о, сьӧд пилем сямен,
Секыт тодэ ваён вуэ?
Малы асьме мусо анайёслэн
Бамзы мӧзмыт тусо луэ.
Жуась инбам лыктэ, дыр, тодазы,
Вормон дырез витён аръёс.
Фронтэ кошкылӥзы кузпалъёссы,
Гуртын — нылкышноос но нылпиос.
Тӥни соку, сютэм арын музэн,
Куддыр сиим пот нянь, колыс.
Солы янгыш ӧй вал вордскем музъем,
Анайёсмы ӧй вал янгыш!..
Кезьыт пужыятоз укно синэз,
Шунды пиштоз чылкыт инмын.
Нош колысэн пот нянь сиён дырмес
Ноку уз лу вунэтэммы.
Уз лу!
Туннэ но Музъем шар вылын
Будӥсь нянез сутэ напалм.
Усто колысэн шыд!..
Нош сюлэмын
Улэ, юнма таӵе малпан:
Котькуд шаеръёсын арысь аре
Пичи яке бадӟым юртын
Шунды кадь мед шунтоз нянь сукыри
Ужысь бертэм калыкъёсты!
