ВЛАДИМИР РОМАНОВЛЫ СӤЗЕМ ВИРТУАЛЬНОЙ МУЗЕЙ

       ПРИСЯГА

Со нуналэз, солдат эше,
Тон малпа ай выльысь:
Йыгмыт но чот-чот вамышен
Потылӥмы стройысь.

Котькудмы ик автоматэн,
Вылын — пурысь шинель...
Соку ваньмыз шулдыр пиштэ,
Сюлмын соку апрель.

Солдатъёслы оске калык.
Соин ик солдатъёс
Шуо ни пиосмурт кылын:
Инбам чылкыт луоз!

Атайёсмы но бен тазьы,
Строе султыкузы,
Полклэн горд знамяез азьын
Присяга сётӥзы...

Присягаез огпол гинэ
Вераськомы, солдат,
Дунне вылын тросэз вунэ,
Нош со — улэ сюлмад.

Ӧтись кизилиед сямен,
Тонэ азьлань валтэ.
Пӧртэм шуг-секытъёс вамен
Вормонъёсы вуттэ.

 Соин ик вордӥськем музъем
Оске пиосызлы —
Батыр атайёслэн музэн
Юн сётэм кылмы!