УДМУРТ КЕДР СЯРЫСЬ
Баллада
I
Тэльёс но тэльёс
Удмурт музъемын.
Кызъёс, пужымъёс
Татчы дышемын.
Югыт но веськрес
Кызьпу вожектэ.
Нош кызьы кедрез
Пияш яратэм?..
Солэн ӵужмумиз
Кутэн ветлыку,
Сибирь музъемысь
Вуэм та писпу.
«Ненег но пичи —
Улӟоз оло уз», —
Малпаз дышетӥсь,
Сое мерттыкуз.
Сильзор жугылӥз,
Сильтӧл някыръяз —
Вормиз ук, улӟиз
Писпу-сибиряк.
Пушйиз со батыр,
Дышиз палэнын.
Удмурт гуръёсты
Кутскиз валаны.
Огназ со ӧвӧл,
Вӧзаз - вынъёсыз.
Уз вормы ни тол,
Даур будозы!..
Веськрес писпуос
Пилы яраллям.
Тайга юберъёс
Солы кырӟаллям.
Я кин луысал
Вуэм удмурт пи,
Ой ке вуысал
Война гудыри?!
II
«Дуно сузэре!
Тушмон урмемын.
Со Волга шурез
Медэ саптаны.
Штыкен-пычалэн
Лыктэ ми вылэ.
Уен-нуналэн
Шукрес ыбылэ.
Пазя ми вылэ
Снаряд но снаряд.
Нош город сылэ —
Сылэ Сталинград!..
Матысь эшъёсы —
Ӟуч пи но бурят,
Кыкез — степьёсысь,
Огез — сибиряк.
Секыт ожъёсын
Уг курдаськы мон,
Нош сэзь эшъёсын
Эшшо но кужмо.
Тыпы но батыр,
Бадяр но веськрес,
Нош мон яратӥ
Сюсьтыл кадь кедрез.
Татын но мыным
Секыт ож дыръя
Юрттэ вормыны
Эше-сибиряк.
Артэ сылӥськом,
Луим агай-брат.
Огзэ тодӥськом:
Улоз Сталинград!
Дуно сузэре!
Быри ке ожын,
Братме — вож кедрез
Мерттод мон вадьсы,..»
III
Утем музъемын
Кӧло солдатъёс.
Мамай вырйылын
Будо писпуос.
Вайиз вырйылэ
Калык соосты.
Бадӟым шаерлэн
Котькуд палысьтыз.
Беризь но, бадяр но
Татчы лыктӥзы.
Каштан но чинара
Выжы лэзизы.
Татын Сибирьысь
Писпу — нюлэс пи —
Удмурт музъемысь
Кедрен пумиськиз.
Будо писпуос.
Будо, юнмало.
Егит пушъетъёс
Артэ ӝужало.
Батыр солдатъёс кадь
Сылэ ни нюлэс.
Батыр солдатъёс кадь
Ворме сильтӧлэз...
Сыло писпуос,
Кылзо шыпытэз.
Нош Волга вуос
Сыӵе чылкытэсь!
Шунды но чебер
Пазьге сиоссэ.
Ӧз вунэт,
Уг вунэт,
Уз вунэт Шаер
Дано пиоссэ.
