ИСЬКЕМ БӦРСЬЫ ИСЬКЕМ
1
Зуркак вырӟе состав,
Нёркак луэ сюлэм.
Кошкем потэ ни вал,
Али бен — сыл вылэм!
Малы озьы луиз? —
Уд валаськы ачид.
Нош сюлэмыд шӧдэ —
Map ке но вунэтӥд:
Ӟеч кыл-а вераны
Я кылзыны сакгес,
Тонэ келякузы,
Визьмо верамъёссэс?..
Ӝоглык люка состав.
Мылкыд нош валантэм...
Ай ваньзэ валалод,
Ортчид ке сю иськем!
2
Сюресъёсмы дуре
Шырбыж ӝабырскемын.
Нош малы со уг буд
Чугун сюрес дурын?
Татын ӝужа кечсин —
Тӧдьы, тӧдьы, тӧдьы.
Кырмышъяса келя:
— Июне мынӥськоды.
Пумтэм-йылтэм татын
Мусо дыдыксинъёс:
Чагыр, чагыр, чагыр,
Чагыр инвис дорозь!
Тӧдьы сяськаосты
Ыркыт ӵук тӧл веша.
Ромашкаос тыныд
Шуо:
— Гажа, гажа!
-— Гажа, гажа, гажа, -
Вера ӟырдыт гербер.
Уд оскы шат солы —
Гажан кадь со чебер.
Кӧня пӧртэм сяська
Чугун сюрес дурын!
Нош огшоры шырбыж
Ӧвӧл соос пӧлын.
Ӟечгес ке малпано,
Малы татчы потоз?
Кин ишкалтоз куарзэ,
Кинэ со йӧнатоз?
