ӞЕЧ КЫЛЭН СЮРЕС КАПЧИ
Мон пыдын яке валэн.
Нош пото сюрес вылэ.
Гурт калык мыным шуоз:
— Сюресэд мед удалтоз!
Сюресэ вуттоз лудэ.
Нош отын гыро-кизё.
— Ужаны батыр луэ! —
Мон котькудӥзлы вазё.
Мынонъям гуртэ вуо,
Калыклы «ӟечбур» шуо.
Ӝӧк сьӧрын ке кузёос,
— Мед, — шуо, – ческыт кошкоз!
Поттозы юзмыт сюкась.
Жингырак каром:
— Сябась!
Сектасе шуоз мыным:
— Ю но таза лу, выны.
Нош сюрес нуоз азьлань,
Трос муртэн мон пумисько.
Ӟеч муртлы ӟеч кыл но вань -
Мон шуныт ӟечбуръясько.
Зарни кыл зарни тысен
Котькуд сюлэме усе.
Уж но ӟеч кылэн капчи,
Кузь сюрес но туж вакчи.