РАВЕНСБРЮК
Европаысь дасо сюрс нылкышноосты курадӟытизы но быдтӥзы та концлагерьын немецкой фашистъёс кыкетӥ мировой война вакытэ. Вормон нуналысен 20 ар ортчем бере лыктӥ мон татчы солдат дӥсен...
Со тыос —
синъёс кадь чагыресь.
Ярдуртӥ — шашы синлысъёссы...
Равенсбрюк,
пурысь борддоръёсын
Тон бездытӥськод та чеберез!
Чагыр ты но табере — синву кадь.
Лысвулэн но чеберез — синву кадь,
Жутӥськем ук мусо ты дуре
Та концлагерь —
эриклы дурет.
Номеро дӥсен вужераса,
Анайёс из борд вӧзы султо.
Пуляос, аръёс пыр лобыса,
Ваньзы сюлэмъёсамы йӧто.
Лумбыт та адын — кулон, кулон...
Гур ыме мугоръёсты нулло.
Вазь ӵукна, бер ӝыт-а со, уйшор-а
Мугордэ вите ни крематорий.
Со ӵынлэн вандӥсь курытэныз
Синкыли туннэ но пызьыра.
— Кортналом война ӝутӥсьёсыз! -
Ужаса улӥсь дунне вера.
Равенсбрюк, адӟим шимес тустэ.
Зол карган — солдат сюлэмъёсын.
Табере сакгес ветлом постэ,
Сюлмогес тыршом дышетсконын.
Ноку но медаз луы тазьы,
Югытэз но шудбурез утём! —
Дуннеысь анай муртъёс азьын
Кыкетӥ присяга сётӥськом.
