(1943 - 1989)

Удмурт кылбурчи, журналист

ВЛАДИМИР РОМАНОВЛЫ СӤЗЕМ ВИРТУАЛЬНОЙ МУЗЕЙ



                             "...Выжыё уго
                             Луэме потэ.
                             Выжыед ке юн,
                             Му золгес кутэ..."

                                                            В. Романов





        САРАНА

Нюлэс саюлын
Вожектэ сарана,
Солы паськыт возь но,
Куш но укыл.
Нош ми пиналъёс на.
Дуно ми понна
Солэн выжыез —
Сугон — нюлэс ул.

Чечы кадь ческыт со,
Выль вӧй кадь небыт.
Ыме понӥськод ке,
Ачиз со шуна.
Нош ми пиналъёс на.
Ми ваньмы майбыр,
Шеде ке тросгес
Сарана, сарана.

Гуртысь эшъёсмес ми
Соин гочатом.
Солэсь устогес
Кузьым ик ӧвӧл...
Тэльын ми
Сяська бичаны
Вунэтом —
Изьы лэсьтыны
Бичалом кикыньӧл.

... Нош ваньмыз кошкоз ай
Ай ваньмыз вошкоз:
Огпол милемыз
Дугдытоз сарана
Яркыт сяськаен со
Шуак ӝуатскоз,
Шуак ми ум тодэлэ
Ма карыны.

Учком на учком
Паймымон сяськаез
Таӵе чеберлы нош 
Паймом нырысьсэ
Ум валалэ,
Кызьы
Луим ми ӟечгес,
Кызьы вунэтӥм
Копаны выжызэ.