ПОКЧИ ГУЖЕМ
С. Виноградовлы
Эшшо одӥг шуд
Тыныд сётэмын:
Покчи гужеме
Туннэ пыриськод.
Чалмыт ни бусы,
Юос — кеносын.
Таӵе ӟеч куазен ни
Ужлы ёрмиськод!
Инкуазь нош кыӵе!
Инкуазь — выжыкыл,
Инкуазь — синпӧртмась
Инкуазь — вуюись.
Вӧй люк кадь сыло
Зуродъёс кыдёкын,
Бездэм сяськаос
Гомӟо ни выльысь.
Дыртӥсь ваёбыж кадь
Кошкиз гужемед.
Адӟид-а, валад-а
Солэсь чеберзэ?..
Соин ик кузьма ни
Инкуазь-гажанэд
Шулдыр гужемлэсь
Яркыт кесэгзэ.
Одӥг куар гинэ ай
Лобӟиз беризьысь.
Тэльын буёлъёс
Пишто, гомало.
Шунды но мусо
Учке инбамысь,
Тылобурдоос но
Чипсо, кырӟало.
Покчи-а, бадӟым-а —
Гужем но гужем.
Нош тон инкуазьлэсь
Йылолзэ тодӥськод:
Покчи гужеме
Уг ворды музъем...
Сюлмын нош
Чебер малпанъёс
Вордӥсько.