 |
ВЛАДИМИР РОМАНОВЛЫ СӤЗЕМ ВИРТУАЛЬНОЙ МУЗЕЙ "...Выжыё уго
|
|
|
|
НЮЛЭС 1 Ӵукна но ӝыт, тулыс но тол куазенНюлэсъёслэн туссы-буйзы пӧртэм. Тани соос солдат кадь вож дӥсен, Нош ӵукнаяз пужмер тӧдьы гӧртэ. Бычыоссы потон вакыт тэльёс Куреньпыр-лыз бусэ ышо, сылмо. Сӥзьыл нош кыӵе коштанэсь соос — Буёлъёсын данъяськыса сыло! Маин-о ӵошатод та чеберез? — Тэлез тэлен, ягез яген гинэ. Нош валалод шат, кудӥз устогес? Ваньмыз, ваньмыз синмаськытоз тонэ. Гажад ке нюлэслэсь буёлъёссэ, Тон кылзы, тон солэсь малпанъёссэ. 2 Тон кылзы нюлэслэсь малпанъёссэ, Веранъёссэ но кылзылы солэсь. Гужла но шыпыртэ, чипсэ, вузэ, Кырӟа, бӧрдэ но серекъя нюлэс. Тэльысь тон учкы котькуд писпуэз, Тон вешалля пӧртэм турынъёсты, Огпол коть кышка сьӧсь пӧйшуръёслэсь, Огпол коть мозмыты бурдоосты. Тӥни соку сакгес луоз сюлмыд, Тэлез сяна, астэ но валалод. Тӥни соку, оло, мукет синмын Адямиос шоры но тон учкод. Нюлэс котьку ик вераськоз тонэн, Братэд сямен, дуно эшед сямен. 3 Братме сямен, дуно эшме сямен, Камдор тэле мон чортӥсько тонэ. Сьӧре басьтом ӟеч сямъёсмес гинэ Кырӟась тэле ум ветлэ пыӵалэн. Мон оскисько: тэлез тон тодӥськод Ӧз вужме на отысь пытьыосыд. Озьы ке но, выльысь мон ӧтисько Боры но сир зыно ышыгъёсы. Пичи тэльлэн но кырӟанэз пумтэм! Татысь котьку адӟод, тодод выльзэ, Од луы ке синтэм но сюлэмтэм. Ойдо лёгом тэльын выльзэ сюрес. Ойдо кылзом, кызьы адямиез Инкуазь ӟечлы дышетскыны косэ. 4 Инкуазь ӟечлы дышетскыны косэ: Тани — чылкыт лысву, тани — ошмес. Уг ваты аслэсьтыз узырлыксэ: Тани — руда но нефть, тани — нюлэс. Эл малпа инкуазез кортнан сярысь. Ӟечгес луоз, соин тодматскыса. Эшшо ӟечгес, вылды, луысалыз Пырак дырлы соин эшъяськыса. Тэлез, шурез ӧд дыш ке утьыны; Сюлэм чеберлыктэ но тон ыштод. Егит дыръяд кутскод пересьмыны, Нырысь яратондэ но вунэтод. Бугыртыса чылкыт малпанъёсмес, Инме учке, инме ӝутске нюлэс. 5 Инме учке, инме ӝутске нюлэс. Аиз — шунды, нош мемиез — музъем. Со —вож нуныослэсь но егитгес, Тӧдьы пересьёслэсь но мӧйыгем. Дыртӥсь-лобись минутъёсты сямен, Котретъёсын со аръёсты чота. Музъем ке согиське тӧдьы ынэн, Ортчем-ышем дауръёсты вӧта. Инбам шоры шумпотыса учке, Шунды пала вож киоссэ мыче, Тулыс куазен султэ ке иземысь — Куке куашетыны-кутско вуос, Куке чагыр, чебер шаеръёсысь Татчы шуныт но зеч тӧлъёс вуо. 6 Татчы шуныт но зеч тӧлъёс вуо Батыр вайёс вылын шутэтскыны. Тблъёс вуо но, ваньзы писпуос Будон сярысь кутско вераськыны. Тулыс, тулыс — кужым люкан вакыт. Куаръёсыныд тон шильырты, эн кӧл. Муре мед пырозы выжыосыд — Тулыс юнмад ке, тол кышкыт ӧвӧл. Огнад ӧвӧл тон, куашетӥсь нюлэс: Паськыт бусыослэн тон агайзы, Юзмыт но дун шурлэн тон ӵужмуртэз Соос тыныд оско но оскозы. Бусы но шур уз адӟе юрттэтсэс Мукет палась мукет писпуослэсь. 7 Мукет палась мукет писпуослэсь Бурдо уллё вае шулдыр салам. Бурдоослэсь кырӟанъёссэс нюлэс Зорлэсь мадёнъёссэ сямен вала. Ӧй валасал ке, шат кылдысалзы Татын ошмес кадь чингыльтӥсь гуръёс? Мукет шаеръёсы лобӟысалзы Азвесь кырӟан тодӥсь уӵыпиос. Нош уӵыос чирдо! Чирдо соос, Шурез но нюлэсэз шумпоттыса. Куаръёс пӧлын пуко тэль крезьчиос, Веськрес кызьпуосты эктытыса. Тулыс ӝытэ садъёсамы вуо, Выль иворъёс но кырӟанъёс ваё. 8 Выль иворъёс но кырзанъёс ваё Вож нюлэскы лыктӥсь адямиос. Сяськаяськись но шундыё кушъёс Соос азе коверъёссэс вале. Лыктӥсьёслы, куноослы выллем, Вань будосъёс емышъёссэс ӵекто. Татын я гордэкто, я сьӧдэкто Узы но ягмульы, намер но льӧм. Сутэр сиёд, эмезь-а бичалод, Шупу доры лыктод-а собере — Нюлэс кузьымъёслы тон шумпотод. Батыр кужым ёзвиосы пыре, Нюлэс кушын веръяд ке емышез... Кунооссэ озьы секта нюлэс. 9 Кунооссэ секта, веша нюлэс. Нош тон, эше, маин татчы лыктод? Дуно кузьым басьтод писпуослэсь, Нош пунэмзэ маин-о берыктод? Чигтод-а льӧмпулэсь векчи вайзэ, Палэзьпуэз-а шатрак тӥялод? Яке, агай-вынъёсыдлы музэн, Писпуослы тон бур кидэ сётод? Татчы сьӧд нуналъёс вуылыку, Ят мурт сямен уд сыл-а палэнын? Писпуослы юрттод-а вормыны?.. Вожектыкуз, Куарез усьылыку, Шорад нюлэс эшед сямен учке — Со котьку ӟечезлы гинэ оске. Бен, котьку ӟечезлы гинэ оске Визьмо инкуазь, улон сётӥсь инкуазь. Нош мон адӟи, кызьы нюлэс сутске, Кызьы пӧйшур отысь пегӟе кир-пазь. Тыллэн кылыз соку ваньзэ нюлэ, Сьӧд ӵын ваньзэ coгe но ӝокатэ. Бырысалыз, кулысалыз нюлэс, Нош адями тылэз но дугдытэ. Урмем тылэн нюръяськыны секыт. Нош вазь на, вазь мултэс данъяськыны! Я, ку меда дышом ни нюлэскын Чакласькыны, эшшо чакласькыны! Данэз уг вить — вите со дунъяммес — Уг витьы со кайгу-куректонэз. 11 Уг витё кайгуэз-куректонэз Тылобурдо, пӧйшур но сяськаос. Соос витё шулдыр шунды сиез, Шуныт зорез ваньзы витё соос. Малпанъёссы — улон сярысь гинэ: Куакагырлы вуттэ ни кидыссэ, Бурдо но дышетэ ни пиоссэ Шутскылыны ӝужыт, сайкыт инме. Улэп нюлэс улэп ик мед луоз — Я мед тэлеӟозы улэп лулъёс, Я мед данъялозы та улонэз! Нош вань на, вань сьӧд уй кадь нуналъёс. Соос сярысь уг вунэты нюлэс — Сильтӧлъёсты со лек пумиталоз. 12 Сильтӧлъёсты со лек пумиталоз — Тэлез куаса, поре, тӥя сильтӧл. Нош адями сьӧд сюлэмо ӧвӧл: Выльзэ лэсьтон сярысь со малпалоз. Зарни крезьын улоз нюлэс кырӟан, Сиос уӵы гурез жингыртозы. Пужымъёслэсь ӵупем-ӝутэм коркан Нюлэс выжыкылъёс гурлалозы. Тӥрен гинэ но мар лэсьтӥськомы! Нош нуналмысь малпаськытэ огез: Эшшо сакгес кулэ, дыр, лыдъяны Котькуд корез, ваез но шелепез. Улон понна нюлэс но нюръяське, Асьме шоры юн оскыса учке. 13 Асьме шоры юн оскыса учке Нюлэс пушкысь котькудӥз но писпу. Кызлы но сётӥське одӥг вапум, Нош собере со сисьмыны кутске. Пужым но дась каллен погыраны, Нош со нырысь ик одно мед тодоз, Кулэ луоз-а выль лэсьтӥськонын, Со интые ӝутскоз-а выль будос. Сыӵе улон: вужзэ воштэ вылез. Нош писпуос пограм интыосы — Оске инкуазь — ӝутскоз пинал нюлэс. Оске инкуазь: котьку кырӟалозы Ягъёс, сикъёс, тэльёс, арамаос. Шат пӧялом сое, адямиос? 14 Шат пӧялом сое, адямиос, Кырӟась-бурась, лысо, куаро эшмес? Пӧям ке, пожаськоз чылкыт ошмес. Дунне вылын кырӟан но кулэсмоз. Нош мар вань кырӟанлэсь но дуноез Сюлэм но сэзь, усто кырӟан ке вань. Тэлез уте тылобурдо кырӟан Кӧттырмостэм нымы-кибыослэсь. Пырак ум улэ та дунне вылын, Нош сэректэ, уг буйгатскы сюлэм: Мае кельтом югыт дунне вылэ Ӝужась но жужано калыкъёслы?.. Уг лу люкиськеме та малпанэн Ӵукна но ӝыт, тулыс но тол куазен. 15 Ӵукна но ӝыт, тулыс но тол куазен Тон кылзы нюлэслэсь малпанъёссэ. Братэд сямен, дуно эшед сямен, Инкуазь ӟечлы дышетскыны косэ. Инме учке, инме ӝутске нюлэс, Татчы шуныт но зеч тӧлъёс вуо, Мукет палась мукет писпуослэсь Выль иворъёс но кырзанъёс ваё. Кунооссэ уте, веша нюлэс, Со котьку ӟечезлы гинэ оске, Уг витьы кайгуэз-куректонэз. Сильтӧлъёсты со лек пумиталоз. Асьме шоры бен гажаса учке. Шат пӧялом сое, адямиос?..
© irinaewdo |