ЧЕБЕР МАКО БАКЧАЕ
Поэма
I
Вазь тулыс ик со ӝужа.
Учкиськод ке — жаг но жаг.
Ӵужанай шуэ:
— Пие,
Тон эн обидьы сое.
Будонзэ ай со мытэ,
Бӧрысьгес со паймытэ...
Малпасько:
Векчи маке
Паймытоз ай маин ке!..
Ну шуом, ӝужыт будоз,
Киярлы ай люкетоз.
Нош убо вылысь кияр
Одӥг пол вуоз киям:
Тютюпи кадь пигоно,
Эх, ческыт куажыртоно!
Нош зыныз!..
Вӧтэ пыре,
— Буды, буды кияре!
Вазь ӵукна ӵужанаен
Потӥськом уриськыны,
— Тодма жуг-жагез, пие!—
Пересе вера мыным,
Мон сое буйгатӥсько:
— Жагъёсты мон валасько.
Куаръёсыз лусьтро ке — жаг,
Куаръёсыз вольыт ке — мак.
— Э, тыныд паймод-бырод,—
Ӵужанай мыным шуэ.—
Аслэсьтыд нимдэ кадь тод -
Мак будос
Лусьтро луэ.
Вольытсэ но возьматэ:
— Уть ай, мар вӧзаз потэм.
Дыш тазэ но тодманы.
Та —эн вунэт!— курканыр.
Ваньмыз валамон мыным.
Кут-скись-ко
Ожмась-кы-ны!
Вож чебер тушмонъёсыз
Мон ишки, пори, ури.
Табере убо возын
Лошъяське вож ӟустари...
Микталы ӝыт пал верай,
Кызьы лумбыт мон ужай.
Со шуэ:
— Мак ӧм кизе ми туэ.
II
Сайкасько мон огнунал
Шундыё чебер ӵукна.
Пальпотэ ӵужанае:
— Бызь ай. бызь ай бакчае!
Убоез эн лёга мар —
Мед эркын будоз кияр!..
Пушнерлэсь лекгес лысву.
Но— ӝегатскыны уг лу!
Пукыӵ ньӧл кадь лобисько.
Льӧмпуозь ни вуисько,
Чылкак оскисьтэм синмын
Адӟисько кыдёкысен:
Мак кизем убо вылын
Выжыкыл ук вордӥськем.
Котькуд мак сяська вылын
Вуюись ӝуа тылын!
Льӧль но горд макъёс татын
Ширъянэз, лэся, экто.
Ӵук тӧлъёс
Сяськаосты
Вешаса ик вырето.
Ӵужанай уг тод на, дыр!—
Бызисько усьтыр-табыр.
— Вож вал ай толон гинэ.
Нош туннэ...
Гома туннэ!
— Бен,— шуэ ӵужанае,—
Со ужмес данъя, пие
By киськам,
Урим кема —
Шумпотэ, гома ни мак.
...Микталы но возьматӥ,
Чылкак, ява, паймытӥ, —
– Нош малы меда туэ
Мак ӧм кизе ми?— шуэ.
III
Ӵужанай огпол вераз:
— Мын ай, тоды, кӧня час,
— Ма кытысь ай мон тодом?
— Э, пие, юмал на тон.
Мак чебер но паймытэ,
Мак — дырез но возьматэ.
Та сямзэ калык валаз,
«Улэп час»
Сое нимаз.
Час куате мынэ ни ке.
Мак сяська но усьтӥське.
Нош бер ӝыт,
Укмыс часын,
Сяськаез ни ворсамын...
Учкисько бадӟым часэ —
Со мынэ ни тямысэ.
Эх-ма!
Кӧлӥськем туннэ кема.
IV
Вот кыӵе вылэм будос!
Чак-ла-но сое луоз...
Вазь ӵукна ик мон сайкай —
Горд шунды кӧлэ на ай.
Бакчае ни дыртӥсько,
Пуля кадь ик лобисько.
...Дугды ай,
Map ай туж мӧзмыт татын?..
А - а, валай:
Мак йыръёс шымырскемын.
Нош тани потэ шунды —
Сайкатэ сяськаосты.
Ӵужанай уг тод на, дыр.
Бызисько мон зӥр-питыр.
— Кылзы, кылзы, ӵужанай!
Уд ик оскы, ӵужанай!
Шымырскем сяськаосы
Син азям усьтӥськизы.
Дыр но ӵап тани куать час
Верамед, ява, зэмаз!
Ӝыт ни мед вуоз ӝоггес!
Мон учко ворсаськемзэс.
...Миктаез
Бакомытӥ —
«Мак часмес»
Мон возьматӥ.
Паймыса эше шултӥз: —
Ми но Мак кизём
Тулыс!
V
Лушкемез маклэн уно,
Паймытэ дугдылытэк.
Луылэ со «укноё»,
Луылэ со «укнотэк».
Мон
Шедьтӥ
«Укноёзэ»!
Чашаысь чаез музэн,
«Укно пыр» максэ ӟузи,
Мукетыз доры бызи.
Э, ческыт вылэм макед!—
Киярлэсь
Ӟечгес
Маке...
Та нуналысен
Мыным
Шуг ӧвӧл гусъяськыны.
Мак йыръёс ваньзы йӧскадь
Кисьмало, будо на кадь.
Нош максы ни
Ӟу-з-мын,
Ням-ням-ням ни
Каремын.
Миктаез но утялтӥ,
Паймытӥ ке паймытӥ.
Кымысаз тэтчиз синмыз:
— Ту-уж трос
Мак кизём
Тулыс!
VI
Мак октон нунал вуиз.
— Мак удалтэмын туэ,—
Ӵужанай мыyым шуэ.—
Таиныз кокрок пыжом,
Кидыслы тазэ кельтом.
«Укноёосыз»— тынад!
Уриськид ук,
By киськад.
Мын ай, эшедлы но сёт —
Тон сое но шумпоттод.
Нош кема эн ӝега тон —
Убоысь
Кияр октом!
...Лашкинтӥ эше доры.
Пукиськом ни ярдурын.
Мӧзмыса уг пот бӧтьыртэммы.
Ӟыгырлэсь уно маке.
Эх, ческыт вал со куке!..
Мак йыръёс али бушесь,
Чебересь ке но — шушесь.
Та шунды но
Ну пиштэ —
Оломалы пальпотэ.
Вазь тулыс кадь мальдытэ —
Синвуэз ик
Пызьыртэ.
— Тачезэ,—
Юа Микта,—
… Продолжение »
