ЛОПАТА НЫД
Туж капчи лопатае
— Сэрпалто али тае.
Копалод но чик уд жадь,
Уд ик поты ужам кадь,
— Ай эн сэрпалты тае, —
Дугдытӥз песятае, —
Йонлыгес лопата ныд
Нюлэскысь шедьтом тыныд...
Нюлэскы вуим, пӧсям.
Нош пересь пӧяз, лэся:
Чик уг дырты утчаны
Секытгес лопата ныд.
— Э, пие,— мыным шуэ, —
Гажасько палэзьпуэз.
Нош туэ ӧй вал дыры
Мерттыны бакча сьӧры...
Туж пересь песятае,
Туж капчи лопатае.
Чебергес палэзьпуэз
Мон ачим поро ай сэзь.
Писпуэз пори, посяй —
Нош пересь уг шӧд, лэся.
— Сэзь,— шуэ,— лопатаед,
Ушъямон копа таид!
Копасько но копасько,
Копасько но малпасько:
Чик уг жаля песятай,
Жадьыса усёд ай та.
Нуназе бере гинэ
Дугдытӥз пересь монэ:
— Табере шедьтом тыныд
Секытгес лопата ныд.
Шуисько:
— Песятае,
Туж усто лопатае!
Нош учкид ке умойгес,
Та ныдыз ай...
Се-кыт-гес!