ФЛОР ВАСИЛЬЕВЛЫ
1
Эше доры ветлӥ толон.
Дораз ваи мӧзмон сяська,
Сое шуныт вуэн киськай.
Эше доры ветлӥ толон.
Эше доры ветлӥ толон.
Солы малпанъёсме верай.
Отын мон унозэ валай.
Эше доры ветлй толон.
Эше доры ветлӥ толон.
Пуки, соин кенешыса,
Кайгуосме но вераса.
Эше доры ветлӥ толон.
Эше доры ветлӥ толон.
Отын пуки мон бер ӝытозь.
Эше ӧз келя капкаозь —
Вылаз изэз секыт, оло...
2
Мыным сӥзид югыт сюрес.
Нош вунэтӥд-а со дыре:
Шудбур сяна, кайгу но вань?
Тодӥд умой, тодӥд ялан
Тон коня пол со сьӧдкылен
Синмысь синме пумиськылӥд?!
Тон нюръяськид со кайгуэн
Милем - югыт нунал сӥзид.
Тонэн шудо эшъяськемен,
Кайгуосты мон вормисько.
Егит эшлы нош,
тон сямен,
Югыт сюрес ик сӥзисько.
Уг пӧяськы сое мон, уг —
Шудбур но вань, кайгу но вань.
Огзэ мон малпасько соку:
Югыт мед вормылоз ялан!
3
Со азьло пумиськонмы
Эшъяськон гердмес думиз.
Пертчонтэм думиськеммы –
Быронэд гинэ ӵогиз.
Улон ӧр чалмыт ӧвӧл,
Куашетэ со, бергатэ.
Нош ӧз сабы улон ӧр —
Тон мынӥд монэн артэ.
Ушъязы монэ куддыр.
Трос ушъян поромытэ.
Нош ӧй выйы мон, ӧй быр –
Тон мынйд монэн артэ.
Сялазы мынам сюлмам,
Валатэк но жалятэк.
Тау тыныд, эше мынам,—
Тон котьку ик вал артэ.
Вералляд кылбураса:
«Эшеным
Кенешемын...»
Быгатӥд-а, эсьмаса,
Одӥг пол коть юрттыны!..
Весь малпам: дырмы уно.
Нош адӟон пыдзэ пуктэ.
Улонысь кошкид ке но,
Котьку мынӥськод артэ.
Пельпумдэ мон шӧдӥсько.
Туж секыт ни ке мыным,
Кылъёстэ мон верасько:
«Эшеным
Кенешемын...»
4
— Ах, кылбурчи, ах, уж уӵы
Куддыр калык шуэ,
Сяська полын, пе, кылбурчи
Кайгырытэк улэ.
Огзэ уг тодо: сюлэмыз
Кыӵе тылын ӝуа.
Соин ик но паймо: пумыз
Шуак вуэ, шуак.
Соку тӥни котькуд ласянь
Учко котькуд чурез.
Тӥни соку шуо: «Посям!»
Нош мар на табере!
Ах, кыӵе кырзанэз вакчи...
Озьы но кенӝытэ.
Ачиз ӧвӧл ни кылбурчи —
Сюлэм пеньыз сутэ!
5
Васильев Флор нимо ульча —
Вань таӵеез Ярын.
Отӥ кошкод—адскоз Вортча.
Вуод Бердыш доры.
Васильев Флор нимо ульча
Нуэ сюлмысь сюлме.
Югыт сюлэмъёсты утча,
Пумен ачиз выльме.
Ас югытсэ уг ваты со,
Сётэ тӥлед, милем.
Ульча — ӟеч адями тусо,
Усто поэт выллем.
