«Возь выл сяська!» –
Сое исаллязы...
Тани синкылиен пыласькыса,
Викышъянлэсь
Шуак гуньдылыса
Бызе ни со,
Бызе ни доразы.
Соку ваньмы
Шуак чалмиськомы.
– Эн бӧрд, пие...
Мусокае, эн бӧрд...
Ладиедлэн но
Атаез ӧз берт...–
Эшмес лӥятэмзэс кылӥськомы. –
Атаеныд
Тон данъяськы, пие...
Ожын быриз со.
Туж бадӟым ожын!
Уно фашистъёсты быдтӥз отын…
Тани, пие,
Нянь си ай...
Чечыен...
Нош ми бичаськомы ини кӧльы.
Исаськисед
Уг сыл ни горыса.
Пыдзэ кияз ӝоггес октылыса
Пегӟе ни со,
Пегӟе ни ми пӧлысь...
«Возь выл сяська!» —
Сое исаллязы.
Нош ми оским:
Бубиз бырем ожын,
Милям сямен...
Соин ик ми азьын
Гуртысь тросэз ымзэс пытсаллязы.
Нош одӥг пол
Шедиз сюлэмтэмез:
Лыдъяськемды-а, мар-а, пе, уг лу!
Воина бере кык пол кошкиз тудву.
Тӥни, пе, ку! – солэн вордскем арез.
Вань осконмес вандӥз кадь ныж пуртэн.
Нош со ватса, ватса на шыпытгес: –
Ожысь ӧз ву
Атай луоноез.
Атай шуоноез… тӥни... сьбрлось гуртын.
Лыдъяськыны?.. Отын ӧвӧл шугез!
Нош улэмъям вера мыным арлыд:
Тон оскы эшедлэн анаезлы –
Секыт ожысь ӧз вуы
Ӧрӟиез.
Куддыр нош аслэсьтым мон юасько:
Соиз нош?.. Возь вылын пумиськемез?
...Ӧвӧл! Солэн аслаз вань семьяез.
Соиз сярысь ӧвӧл та вераськон!
