(1943 - 1989)

Удмурт кылбурчи, журналист

ВЛАДИМИР РОМАНОВЛЫ СӤЗЕМ ВИРТУАЛЬНОЙ МУЗЕЙ



                             "...Выжыё уго
                             Луэме потэ.
                             Выжыед ке юн,
                             Му золгес кутэ..."

                                                            В. Романов





Кыӵе югыт кутскиз вал сюресмы!
Инмысь васькиз тӧдьы-тӧдьы лымы.
Артэ кельтылыса пытьыосмес,
Шудбур доры, малпам, мытӥм сюрес.

Инмысь усиз капчи-капчи пужы.
Ӧй малпаськы соку, кыӵе кужым
Шудо киез мукет киын возе,
Малы сюлэм мукетызлы вазе.

Ӧм малпаське. Малы малпаськонэз!
Котьку югыт, кожам, луоз сюрес.
Кожам, капчи тӧдьы пужы ноку
Уз шуна. Уз. Ноку уз лу синву.

Нош чип-тӧдьы кызьпу арамаын
Кыӵе югыт, усто вал огазьын.
Соку малпам тулыс нуналъёсты.
Нош сильтӧлъёс ӧй вал соку тодын.

Со лымыез сабиз, быдтӥз зор ву.
Ӧз улӟы ӵош мерттэм чебер писпу.
Люкиськизы асьме сюресъёсмы —
Пӧяз нырысетӥ тӧдьы лымы.

Уг бӧрдӥськы. Куасьмиз ини синву.
Будэ мукет дыре мерттэм писпу.
Нош со югыт лымы но арама
Вӧтысь шудбур сямен
Уло сюлмам.