(1943 - 1989)

Удмурт кылбурчи, журналист

ВЛАДИМИР РОМАНОВЛЫ СӤЗЕМ ВИРТУАЛЬНОЙ МУЗЕЙ



                             "...Выжыё уго
                             Луэме потэ.
                             Выжыед ке юн,
                             Му золгес кутэ..."

                                                            В. Романов





Тэтэ карыны ай кутске пиналмы.
Нош ми витиськом ни:
                 тани вамыштоз!
Тэтэ карыса шат дунне кутомы? —
Улон — со котьку ик вормон
                 вамышъёс.

Секыт нырысез, берпумез но секыт.
Ӟичы кадь уд выры, уд утча табыш...
Азьлань мыныкуд,
Ӵемтыса усьыкуд
Тынад малпанэд: лэсьтоно
                        выль вамыш!

Нунал ортчемез ӧд ик шӧды, оло.
Кин ке шат малпаз: «Тамында карозы».
Ыргон гырлыос кадь пыдъёс зуркало—
Жадем мугордэ ни ветта куаразы.

Тон ноку уд ватӥськы юн жадемдэ.
Синмыд нош быдэс дуннеез ни веша.
Маке малпаса сылӥськод тон ӝамдэ.
Малпан — со бадӟым
                   вамышлы ик ӵоша.

Оло, сюлэмдэ позыртоз янгышед...
Валад ке, янгыш но аслыд ик юрттоз.
Куке но вуоз со — берпум вамышед,
Нош ноку уз быре вормон вамышъёс.