ӴОШАТСКОН
Э, кутскиз ук, кутскиз!
Ӵашето учкисьёс:
— Я кудӥз-о, кудӥз,
Я кудӥз-о ортчоз?!
Мынекъя чут пересь:
- Сӥльвирзы, пе, егит.
Вись кузя сюресэз
Лобзозы, пе, сэрыт.
- Учкыны со вакчи.
Бызьыны нош — ай-яй...
- Тодӥсько, пе, ачим, —
Серекъя песятай.—
Тодӥсько,— шуэ,— ӟеч,
Дуннеез котыръяй.
Поськыти сюресэз,
Пулялэсь ӝог лобай.
...Кин сэзьгес бызьылэ? —
Пиналъёс ӵошатско.
Пыдъёссы соослэн
Учер-вучер адско.
Учер-вучер адско
Лыз но ӵуж майкаос.
Пияшъёс нюръясько —
Кин кинэ азьпалтоз?
Нош омыр пыкиське,
Мӧляе шуккиське,
Ӝоглыкез вормытэк,
Кык пала пазьгиське.
Пияшъёс нырысьсэ
Дышетско вормыны,
Секытсэ но дунзэ
Вормонлэсь валаны.
Бызьыны кутскизы
Ӵош, бадӟым бугорен.
Кузь синьыс кадь ваньзы
Кыстӥсько табере.
Кудӥз шук-шук жадем —
Сьӧлтасько пыдъёссы.
Нош кудӥз кужмогем —
Чульк! ортчо возтӥзы
Ӵошатскон — синучкон:
Татын ӟеч адӟиськом,
Кин чырткем, кин лябгем,
Кин кызьы дасяськем.
Быдэстэм ужъёслы
Выль дунъет сётӥськом,
Ӵуказе нуналлы
Выль малпан кутӥськом...
— Кык пиос — азьпалан!
— Кык пиос - - азьпалан!
Эшъёссы нош кылё но
Кылё ни ялан.
Вань калык бугырскиз.
Кесясько, ӵашето:
Я кудӥз-о? Кудӥз?
Я кудӥз азьпалтоз?
Пальпотэ горд пересь,
Малялля картуззэ:
- Микимы одӥгез...
Уть, ыбем кадь бызе!
Ма бен, зэм верамын,—
Песятай малпаське, —
Юн тыпы выжыын
Ӟеч семья ӝутӥське.
Эк, ӧрӟи! Эк, шӧртчи!
Со вормоз, быгатоз.
Сэзь, чырмыт со ачиз,
Эшъёссэ но валтоз...
Кык пиос азьпалан,
Чырткемесь, шаплыесь.
Кык пиос — азьпалан,
Пыдъёссы капчиесь.
Нош кудӥз-о ортчоз
Коть ӝыны вамышлы?
Нош кудӥз-о вормоз
Коть ӝыны секундлы?
— Ай!.. ӵемтиз одӥгез! —
Бур палан кеськизы.
Учкисьёс шоканзэс
Огдырлы кутӥзы.
— Эк! — шонтӥз чут пересь,
Осконэз чигыса.
Нош ӧз усьы внукез!
Со лыктэ ширтыса!
Ма кызьы со ӧз усь?
«Тушмонэз» ук юрттӥз!
Бускелез ӵемтыку,
Пельпумтӥз со кутӥз.
Песятай пальпотэ...
Со малпаз ортчемзэ,
Лек ожын пӧсь ӝытэ
Эшезлэсь утемзэ...
Матэкто бызисьёс
— Чалякгес! Чалякгес!
Азьпалан — кык пиос.
Я кудӥз чырмытгес?!
...Мар-о та? Мар-о та?
Map внукез дауртэ?
Кырмышъя песятай,
Синмызлы оскытэк.
Уть, сюрес урдэскы
Со ӝиптэ ни эшсэ.
Map мыскыл! Map мыскыл!
Со ыштэм возьытсэ.
Бызёнын кужымзэ
Возьматэм интые,
Со донге ни эшсэ
Чап гопо интые.
...Кыкетӥ лыктэмзэ
Песятай зыгыртӥз.
Юн веша тыбырзэ:
— Молодец! Тон — вормись!
Нош Мики... Эк, Мики
Возьматӥз лек сямзэ.
Валалоз ай куке
Аслэсьтыз янгышсэ...
Ӝог кошкиз пересь мурт...
Со уг кыл шат? — внукез
Бызьыса шок но пуль
Со бӧрсьы кесяське.
Кесяське, пересез
Дугдыны косыса:
— Мон ворми, песятай!
Мон ворми, песятай!
Нош уг дугды пересь.
Со кошке дыртыса,
Азьлолэсь уката
Кужмогес чутыса.
