ВЛАДИМИР РОМАНОВЛЫ СӤЗЕМ ВИРТУАЛЬНОЙ МУЗЕЙ

                                                   Небыт сюе согод таза кидыс.
                                                   Ӟег уд сямен пушъёз шумпотонэд.
                                                   Нош тон кузё ӧвӧл на, тон — юрттӥсь
                                                   Жоген-а мон кузё шуо тонэ?

                                                   Жужа ю-нянь. Иське, ужад умой,
                                                   Иське, умдэ но тон вунэтылӥд.
                                                   Уд тодскы ни, витёй оло дасой
                                                   Трактор гурен чош учыез кылзӥд.

                                                   Зэмзэ тыршид тон ӟеч! 
                                                   Я учкы —ӟег
                                                   Пурӟе ни зарни-ӵуж пырыосын.
                                                   Кыӵе чебер! Сюлэм, ява, вырӟе
                                                   Та сюрелась паськыт бусыосын.

                                                    Будэ шумпотонэд но осконэд
                                                    Сюлмаськонэд нош сэрытгес будэ.
                                                    Тани тупатэмын ни комбайнэд,
                                                    Тани сое поттод ини лудэ.

                                                    Выльысь тон вунэтод ческыт умдэ,
                                                     Куаем бӧдёноез кышкатылод.
                                                     Мон данъяло сотэк дано уждэ, -
                                                     Шуо тыныд: — Бусы кузё луод!

                                                     ...Малы-о ваньмыз вуоно дырын?..
                                                     Шат бусыын тыршид ай тан ичи?
                                                     Юос гурезясько ни итымын,
                                                     Иське, мае вите на кылбурчи?..

                                                     Гырид, кизид, октӥд тон ю-нянез.
                                                     Ойдо ортчом арам удыс кузя.
                                                     Ӝутод-а тон янгыш киргам шепез? —
                                                     Соку шара мон верало: — Кузё!