(1943 - 1989)

Удмурт кылбурчи, журналист

ВЛАДИМИР РОМАНОВЛЫ СӤЗЕМ ВИРТУАЛЬНОЙ МУЗЕЙ



                             "...Выжыё уго
                             Луэме потэ.
                             Выжыед ке юн,
                             Му золгес кутэ..."

                                                            В. Романов





Асьмеос тонэн — пиосмуртъёс.
Визнан ньӧр нуллӥм пельпум вылын
Нош огпол солдатской погонъёс
Шаермы сётӥз пиосызлы.

Шаермы погон гинэ ӧз сёт —
Сюлмаськон понӥз пельпум вылэ.
Дыр ортчоз — погонъёстэ куштод,
Сюлмаськон нош пыраклы кыле.

Дуннеысь ӟечез-лекез понна
Кыл куто зэмос пиосмуртъёс.
Нянь ӧз луы ке, пичи пинал
Витьыса атай шоры учкоз.

Асьмелы — кужмо агайёслы —
Та сярысь ӧвӧл вунэтоно:
Трос ужъёс асьме пельпум вылын,
Котькудзэ умой быдэстоно.

Кызьы-о сотэк?.. Пичи дыды
Оскыса асьме шоры учке...
Музъем шар вадьсы тӧдьы дыдык
Пиосмурт пельпум вылысь ӝутске.