(1943 - 1989)

Удмурт кылбурчи, журналист

ВЛАДИМИР РОМАНОВЛЫ СӤЗЕМ ВИРТУАЛЬНОЙ МУЗЕЙ



                             "...Выжыё уго
                             Луэме потэ.
                             Выжыед ке юн,
                             Му золгес кутэ..."

                                                            В. Романов





Зороз ке бен! —
Зорлэсь уг кышкаськы,
Будо гинэ шуныт зорен.
Коть косэлэ монэ, коть тышкаське —
Уг берты возь вылысь доре.

Кудзэ арамаен уд паймыты,
Нош мон, эшъёс, мукет сямо.
Куазь ӟардытозь калго но
                            ваньмызлы
Пичи дыръя сямен паймо.

Уй сяськаос шыпыр уг шыпырто —
Жингыр! вазе арамаын.
Вуюисьлэн пырыосыз ук та! —
Возьёс вылэ пазьгиськемын.

 Куакагырлы но —
                    чалмылэ-а со? —
Шудэ, шудо гурзэ шудэ.
Уӵы сюлэм кырӟанъёсме, лэся,
Лушкем кылзэм но весь чирдэ.