(1943 - 1989)

Удмурт кылбурчи, журналист

ВЛАДИМИР РОМАНОВЛЫ СӤЗЕМ ВИРТУАЛЬНОЙ МУЗЕЙ



                             "...Выжыё уго
                             Луэме потэ.
                             Выжыед ке юн,
                             Му золгес кутэ..."

                                                            В. Романов





БОЛДИНО. ПУШКИНЛЭН ЮРТЭЗ

Малы дыртэ ни та автобус?
Малы дыртэ, малы чортэ?..
Кин ке уг тоды шат, уг тоды,
Кытчы лыктӥм, кыӵе юртэ?!
Зэм, учкозы ни кожало, дыр,
Паркез, прудэз но со выжез.
Юртэ выльысь, пӧй, кожалод-а?
Возьматӥзы ни, пӧй, юртэз.
Тани чебер синпель книга но —
Ваньмыз ик Болдино сярысь...
Нош сюлэмы ялан мога на,
Выльысь парке нуэ, выльысь.
Татын шунды сиос куаръёс пыр
Тодэ ваён чильтэр кертто.
Вужер!..   Тани  ачиз   адскоз,  дыр,
Ужан жӧкез доры дыртоз!..
Со чуръёссэ ми ӟуч кылын но,
Удмурт кылын но яратӥм.
Камдор палась татчы солы ми
Бадӟым тау каронмес вуттӥм...
Малы дыртэ ни та автобус,
Малы дыртэ но дыртытэ?
Нош ми сюлмынымы тодском ук,
Кытчы лыктӥм, кыче юртэ.
Паркысь пичи тымет вадьсын ми
Эшшо минут коть сыломы.
Быдӟым кылбурчимес татын ми
Выль сяменгес валаломы.