 |
ВЛАДИМИР РОМАНОВЛЫ СӤЗЕМ ВИРТУАЛЬНОЙ МУЗЕЙ "...Выжыё уго
|
|
|
|
ВУЖ ДНЕВНИК Кепыран сямлы-а сётскыса, Я пинал арлыд озьы косэ — Гожъяськом, чуме ватӥськыса, Сюлэмлэсь лушкем малпанъёссэ.. Нош тани — дневник... Ӵужектэмын Тетрадьлэн вылыз но бамъёсыз. Малпамтэ шорысь шедиз мыным Со Кузесь улон сюресъёсын. Кузёез ӧвӧл ини улэп — Турналтэм сое шудтэм учыр. Нош та ни со Чуръёсаз улэ, Серектэ я куректэ куддыр. Кыӵе шумпотэм со книгалы — Кузьмаллям дышетскемез понна. Нош тани тау кыл со эшезлы Дневниказ гожтэм одӥг ӵукна. Одӥг пол ӟольгырипи кулэм — Со но пияшлы луэм секыт. Ай пичи на дуннеез солэн, Нош малпанъёсыз котьку чылкыт. Нош таиз?! Информбюро ивор! Кӧня гожтэмын соос татын! Пияшлэн сюлмаз яке фронтын — Огазьын. Биниськемын бугор. Газетын но вань со иворъёс. Нош соиз — газет ини, газет. Дневникын — сюлэм малпаськонъёс, Со пӧлын ик ож куара вазе. Пияшед гожъя, гожъя понназ. Нокинлы сое поттылытэк. Бен, токма бускель нылаш туна, Map ай со зӧк тетрадяз гожтэ... Быгаты, мултэс вераськытэк, Гажаны, мае гажа калык, Лэсьтыны, мае калык лэсьтэ! ...Та сярысь вераз пичи дневник. © irinaewdo |