 |
ВЛАДИМИР РОМАНОВЛЫ СӤЗЕМ ВИРТУАЛЬНОЙ МУЗЕЙ "...Выжыё уго
|
|
|
|
ПЕРЕСЬ Корка азьын — кислэс вылын кислэс.Соиз векчи. Таиз тани зӧкгес. Пуке пересь. Лябӟем синъёсыныз Ӵота писпу арлыд котретъёсыз. Таиз писпу висись, вылды, вылэм — Арлы быдэ басма зӧкта йылэм. Тӥни соиз шедем дыртӥсь тӥрлы... Писпу улон — со миллион турлы. Нош та кызэд кема улэм, кема — Ӝутскиз-ло варышъёс лобан кеме... Пуке пересь. Лябӟем синъёсыныз Ӵота, ӵота арлыд котретъёсыз. Зэмзэ но, арлыдыз кызлэн бадӟым Сильтӧлъёсты но толъёсты адӟем. Уно, дыр, кылизы кызпиосыз, Я уть ай, уть, кӧня котретъёсыз! Тэльысь кызпиосты малпа пересь, Нош син азяз пуксе ни семьяез. Адӟе писпу арлыд котретъёсыз, Нош сюлэмаз — ортчем сюресъёсыз. Эк, ӝог мынэ, дыртэ, лобе улон... Вуэ из куштыку сямен, оло, Аръёс круген-круген погыльскыса Кошко, берытсконтэм ышылыса. Корка азьын пересь пуке, учке. Тани нылпиосыз кошко уже. Я мар выльзэ ваёз ни та нунал? Улон ноку шыпыт тымет ӧй вал! Аръёс ышо, круген погыльскыса, Ӝужыт тулкымъёсын шуккиськыса. Кошко аръёс. Кылё лэсьтэм ужъёс… Инвис дурын ӝутско выль кызъёс. © irinaewdo |