ВУЖ ГАЗЕТЫСЬ ЧУРЪЁС
Укыр кузь сюрессы та чуръёслэн,
Аръёс пыр лыктӥзы соос дорам,
Ваньзы иворъёссы ни вужмиллям...
Нош малы интыяз ӧвӧл сюлэм?!.
Данъяськонэ, сюлэмшугъяськонэ,
Коже но, шумпотон но огазьын.
Мон сылӥсько История азьын —
Чуръёс уг лэзё кӧлыны монэ.
Дышетскисьёс газет пыр тодӥллям:
«Испаниын — фашистъёсын ожъёс».
Оско соос: испан калык вормоз!
«Но пассаран!» — «Уз ортче!» — гожтӥллям.
«Фашизм уз вормы!» — клятва кадь кылъёс.—
Испания, тонэн — сюлэмъёсмы!
Тани гужем ужам манетъёсмы.
Оло, ӧжыт коть юрттозы соос...
Фашистъёсын нырысетӥ ожъёс...
Нош азьпалан — секыт, бадӟым война...
Уг тодо на пиос, уг тодо на —
Оло, ӧжыт коть юрттозы соос...
Тросэз — нырысь манетъёссэс ӧвӧл —
Ас улонзэс тазьы ик сётозы...
Кытын меда, кытын шайгуоссы? —
Сое умой тодэ, вылды, ыр тӧл.
...Ӵужектэмын ини та газет бам.
Али нош малы киосты сутэ? —
Туннэ нунал сярысь малпаськытэ,
Выль шугъяськон вае со сюлэмам.
