Виктор Шибанов
«Атай»
1. Та кылбурлэн удмурт литератураын интыез.
Атай кылбуреныз В. Романов итӥське бадӟым споръяськонэ, кудзэ мытӥзы Г. Красильников но Ф. Васильев. Соос тодмо калык визькылэз уже куто но солэсь пуштроссэ узырмытыны тыршо. Тани Г. Красильников: «Та-а-ак, ваньмыз вань кадь... Кирла корка но пуктӥз, писпу но мерттӥз, пиез но будэ. Эшшо мар вераз на вал со? А-а, адямиослэсь эн люкиськы, пе. Валче ул, пе, адямиосын. Таиз, пожалуй, ӧзгес пӧрмы». («Кошкисез мед кошкоз» веросысь)
Флор Васильев та чебер малпанэз ас сяменыз узырмытэ:
Пичи дыръям юай песятайлэсь:
—Ӝоген-а адями луо ни мон?
—Мертты писпу,— соку шуиз пересь.—
Со мед будоз, аслыд данъяськымон.
Мерттӥ баблес кызьпу.
Веськрес будӥз.
—Мон адями луи-а табере?
Пересь кема малпаськыса шуиз:
—Тон адями луод, корка пуктэм бере.
Корка ӝутӥм.
Выль кен выллем сылэ.
Песятайлэн выльысь вераськонэз:
Пиед, пе, мед вордскоз на, гыдыке,
Луод, пе, адями соку гинэ.
Вордскиз пимы.
Мон котькинлэсь шудо.
Пересь доры ни мынӥсько шӧртчи.
Эн дырты, пе, мед будоз.
Кыӵе тон адями —
Со вералоз ачиз
Флор Васильев вера: писпу, корка но нылпи - вылтус ласянь гинэ тодметъёс, учконо пуштроссэ, мар сылэ со тодмет сьӧрын. Пословицаысь-визькылысь малпанлэн материальной пуштросэз сьӧрысь адӟоно духовной пуштроссэ. Соин ик, азинтэ В. Романов, корка пуктытэк но, сад мерттытэк но, пи вордытэк но адями луыны быгатоно.
2. Map сылэ «писпу — корка— пи» символъёс сьӧрын?
Тодӥсько на, Даниил Яшин студент дыръямы ӧтиз вал та юанлы валэктон утчаны. Солэн валэктэмезъя, та куинь образъёс дуннелэсь куинь сӥоссэ возьмато, котькудӥз адямилэсь апӧртэмлыко сюлмаськемзэ кулэ каре.
Писпу — со котырысьтымы инкуазь, аслаз нюлэсъёсыныз, ошмесъёсыныз — узырлыкеныз, кудзэ басьтэм понна пунэмзэ берыктоно.
Корка — со инкуазьлэсь висъяськон, киуж ласянь кибашлы луон, огъя кылын вераса — материальной культура.
Пи вордон но будэтон — со духовной культура, туала йылолъёсты но осконъёсты ӵуказе нуналэ выжтон.
Мынам оскемея, Даниил Александровичлэн таӵе валэктэмез туж кельышлы. Зэм, тае дышетӥсь ас сяменыз узырмытыны быгатоз на, кылсярысь, писпуэз Дунне Писпуэн герӟаса яке туала вакытэ юртъер ӝутыны быгатонэз бадӟым коньдон вылэ выжытыса но мукет.
3. Атайтэк будон — В. Романовлэн лирикаезлэн одӥгез тодметэз.
Пинал дыръя АТАЙТЭК БУДОН — удмурт классикалэн валтӥсь тодметэз луиз, Кузёбай Герд, Михаил Петров, Владимир Романов макем бадӟымгес но кужмогес поэт, сокем ӝоггес кыле кадь со вордэм атаезтэк… Яке пияш юнмаса ӧз вуы на, со кыстӥське бубыез борды – но шимес война трос аръёслы ӵоже висъя сое атаезлэсь, кылсярысь, 1914-тӥ ож ар шукке Игнатий Гавриловез, 1941-тӥез — Флор Васильевез но мукетъёссэ... «Атайтэк ке ӧй кыльысалзы, оло, бадӟым писатель но ӧй луысалзы»,— шуисез но вань. Таӵе юан-валэктонэн соглаш но уд луы, солы пумит но уд мыты. Мур-мур шокчод гинэ...
Атайлэсь мӧзмон, атаез малпанъёс пыр улэп карон пумиськылэ В. Романовлэн тросаз кылбуръёсаз, кылсярысь,«Ваёбыж кар», «Атай пуктэ ке пельпумыз вылэ...» но мукет. Соос пӧлы пыре «Атай» но.
4. Кылбурлэн драматической инъетэз.
В. Романовлэн «Атай» кылбурез кыӵе ке но драмалэн яке трагедилэн ог юдэсэзлы матын. Действие ортче али, асьме син азьын. Соин ик кузёяське али дырысь глагол («сыло», «лулӟе», «ӵуше».). Герой вазиське мукетъёсызлы: «Вералэ...», «Вералэ...», «Вера ай...», пӧрме аспӧртэмлыко диалог, «немой сценаез» чакласа. Кызьы драмаын авторлэн репликаосыз геройлэн вераськемезлэсь висъямын, озьы ик В. Романов уже кутэ скобкаез: «(Шып сыло гурт калыкъёс) ..», «(Мур лулӟо воргоронъес)...», «(Синвузэ ӵуше анай)...».
Озьы ик кылбур рифмаостэк гожтэмын, огшоры адямиослэн вераськон кылзылы юромо матэгес карыса.
В. Романовлэн «Атай» кылбурезлэн тужгес но бадӟым аспӧртэмлыкез — драматической ужъёслы матын луэмез бордын. Тае валатэк, текстлэсь пуштроссэ сэрттыны-пертчыны уг луы. Но табере ӧвӧл малпано, «Атай» кылбур пуштросэзъя лирической уг луы шуыса, со, тросэз кылбуръёс сямен ик, лирической текст (кытын вань лирической героез — «мон»), но солэн пушсузьетаз драматизация амал ортче; озьы лирика но драма артэ вуо, сурасько, полэстӥсько. Map бордысь адӟыны луэ драматизация амалэз?
Нырысь ик, В. Романовлэн та кылбураз возьматэм югдур тодэ вайытэ спектакльын, сцена вылын ортчись действиез. Син азе пуктыны луэ: одӥг палан сылэ егит пи (со вордскемын война вакытэ), мукет палан солэн анаез но гуртысьтыз калык, кытысь нимысьтыз висъясько воргоронъёс. Кылбурез лыдӟемъя, асьмеос адӟиськомы кадь бадӟым спектакльлэсь пичигес люкетсэ (фрагментсэ).
Кыкетӥез, геройёслэн куспазы вераськемзы бордысь, диалог бордысь. Вераськон, юан-веран, споръяськон — драматургилэн валтӥсь тодметэз. «Атай» кылбурлэн кутсконаз ик герой тодаз вае удмурт калык визькылэз, сюлэменыз шӧдэ солэсь кужымзэ но шонер луэмзэ. Таин валче ик юан но кылдэ — аслыз ачиз гинэ ӧвӧл — мукетъёсызлы:
—Нош атай писпу мерттӥз-а?
Вералэ, гурт калыкъёс.
—Атае корка пуктӥз-а?
Вералэ, воргоронъёс.
Нош пизэ со будэтӥз-а?
Вера ай мыным, анай.
Та юанъёслы гурт калык но, воргоронъёс но, анай но соку ик валэктон уг сёто. В. Романов уже кутэ «немой сцена» амалэз. Шыпыт улон татын тросгес (!) вера, кушаса трос кылъёсын валэктон сярысь. Калыклэн чус улэмаз шӧдӥсько аспӧртэмлыко дунъет. Огласянь, война вакытэз тодэ ваён но сое карган. Мукет ласянь, малы сыӵеесь кулэтэм юанъёс сётӥськод, пе, оло атайдэ гажамысь дугдӥд-а, солэн зэмос адями луэмезлы уд оскиськы-а ини? (Тодады вае «немой» сценалэсь» мукетгес пуштроссэ А. Пушкинлэсь «Борис Годунов» драмаысьтыз: «Народ безмолвствует» яке Н. Гогольлэн «Ревизор» комедиезлэсь пумзэ).
Но калык пӧлысь кин ке но одӥгез висъяське (тодмо ӧвӧл, кин со — оло нодлы пияш, оло улонэз адӟем воргорон, оло пересь мурт), геройлы тазьы валэктэ:
— Атаед — ожын быриз со,
Вань тэльёс ӝужан понна,
Вань юртъёс сылон понна,
Вань пиос будон понна.
Озьы кылбурын азьпал радэ потэ зэмос диалог, вераськон, «немой сцена»,— драмалэн кылтӥрлыкез. Спектакль, тодамы ваём, со котьку но геройёс куспын вераськон.
Куинетӥез, «Атай» кылбурлэн драмалы матын луэмез адӟиське али дырын глаголъёсты кутэм бордысь. Поэт сыӵе оскон кылдытэ, действие али, асьмелэн син азямы, кылбурез лыдӟон вакытамы ортче кадь шуыса:
Шып сыло гурт калыкъёс.
Синвузэ ӵуше анай.
Мур лулӟо воргоронъёс.
«Сылӥзы» но ӧвӧл (ортчем дыр), «сылозы» но ӧвӧл (вуоно дыр), «сыло» (али дыр). Та вакытэ асьмелэн син азямы синвузэ ӵуше анай, мур лулӟо воргоронъёс. «Атай» кылбурын действие али дырын ӧй ортчысал ке, драматизация амал быдэсак ӧй бырысал, но трослы лябгес луысал.
Эшшо мукетыз тодмет, ньылетӥез, кудӥз В. Романовлэсь та текстсэ матын каре драма пуштросъем произведенилы — со ремаркаос. Кызьы тодмо луэ, драматург аслаз пьесаяз геройёслэн вераськеменызы артэ куддыръя валэктонъёс сётэ, мар карыны кулэ герой та вакытэ (шуом, «сяська мыче»; «кисыысьтыз гожтэт поттэ»; яке огшоры «вис», пауза). Тани Ан. Григорьевлэн «Лысву сямен уг тӧлӟы синкыли» драмаысьтыз учыръёс, кытын геройлэн верано кылыныз артэ ремаркаос сётэмын:
ВАЛЕРА. Ӟечкыласько, ветеран. Тонэ но. (Кизэ кырме).
САНЬКА (анаез азе пыдесъяське). Анай, жуг монэ, жуг. Эн жаля, жуг. Эх!..
Татын «кизэ кырме» но «анаез азе пыдесъяське» ремаркаос луо, драматург соосты скобкае пыртэ, верано кылъёслэсь висъя.
—Табере учке, таӵе ик амал ӧвӧл шат кутэмын В. Романовлэн «Атай» кылбураз но!
Нош атай писпу мерттӥз-а?
Вералэ, гурт калыкъёс.
(Шып сыло гурт калыкъёс.)
(Синвузэ ӵуше анай.)
(Мур лулӟо воргоронъёс.)
Ремаркаос текстын кузесь но бадӟымесь уг луо, отын тужгес но кулэез верамын: сотэк сцена вылын «шудонэз» учкись мурт мыд-ланьгес валаны быгатоз.
Драматизация амал — со озьы ик геройёслэсь пушдуннезэс возьматон, кужмо характеръёсты кылдытон. Кылбурчи аслаз пичи текстаз| быръе бадӟым вераськонысь сыӵе пичи ёзнэтсэ, кытын тужгес но юн шараясько геройёслэн сюлмаськонъёссы, пуш конфликтъёссы, мукет сямен вераса, характеръёссы. Одӥг-кык образ пыр ивортэмын дасо бамъёсын верано малпанъёс, улонлэсь трос шугзэ но курытсэ шӧмъян, секыт адӟондэ вормыны тыршон. В. Романовлэн «Атай» кылбурысьтыз гурт калык — со зӥбем, ултӥям но ӟигартэм калык ӧвӧл, солэн пуш дуннсез узыр, йылолъёсыз синмаськымонэсь, ӵуказе нуналлы осконэз бадӟым.