ВЛАДИМИР РОМАНОВЛЫ СӤЗЕМ ВИРТУАЛЬНОЙ МУЗЕЙ

Бадӟым поэтлэн ужез котькыӵе дыре но коть­кыӵе учыре аслэсьтыз «ымнырзэ» пӧртэм но пӧртэм сямен возьматэ. Али мон трос тунсыко учыръёс сярысь вераны быгатысал, дыр. Сюлэм бен мукетсэ куре. Син азям весь со ӝыт. 1983-тӥ ар, 15-тӥ ноябрь.

—  Ӝоген быро. Шӧдӥсько. Огезлы коть оскеме потэ: мон бере маке но кыльыны кулэ.

Владимир Васильевичлэсь та кылъёссэ мон соку ик блокнотам гсжтыса кельтӥ. Поэтлэсь таӵе мылкыдзэ адӟеммы ӧй вал на угось (нуналлы быдэ сямен эшеным Слава Сергеевен, со вакытэ кутскись прозаикен, вуылӥськом вал Красноармейской урамлэн 28-тӥ юртысьтыз 19 пусо квартираяз). Котьма сярысь вераськылӥм, пӧртэм сямен маскаръяськылӥм, но тазьы — дунне вылысь кошконмы сярысь — нырысьсэ, витьымтэ шорысь.

—  Кыче янгышъёс лэсьтӥ улонам? Соос куинь. Нырысь ик, эн герӟаське тани таин,— возьматӥз поэт укно вылын кыллись «Ркацители» ӟенелик шоры.— Пичи дырысеным вирам пыӵаз со. Куддыръя, оло, быдэс гуртэн кутскыса, толэзь чоже сазьтӥськытэк юиське вал. Анаелэн но монэным номыр каремез ӧз лу. Кыкетӥез, янгыш кышноен кусыпъёс пумысен.

Владимир Васильевич соку тодаз вайиз «Выжез тудву нуэм...» кылбурезлэсь пумзэ. «Йырберыктон турын» (Ижевск, 1988) книгаын та чуръёс тазьы чузъясько (азьлон та кылбур ӧжытак мукетгес вал):

...Тудву кесям выжзэс,

Бугыръяськись тудву.

Яръёс огъя выжзэс

Ӧз тодэ утьыны.

Нош кудзы янгышгес —

Бергес ни тунаны.

Одӥг вакчи уйскын

Выжез тудву тарказ.

Кык ярдуръёс куспын

                        Лэйка пичи лодка.

Ватсаса верано, ӵапак та нуналэ ик, 15-тӥ ноябре, ветлэм нотариальной контораысь ужась — семья люкиськон но квартираез люкон-воштон сярысь бумагаос пумысен... Ватсаса ик верано на: берло, нимаз улыны кутскемзы бере, мон вуылӥ Галина Васильевна доры. Паймытӥз тани мар: выль квартираын ваньмыз-ваньмыз интыямын но радъямын вал озьы, азьвыл ӵошен улыкузы сямен. Чай но сыӵе ик вал — тямыс-дас пӧртэм турынъёслэсь...

Улоназ лэсьтэм куинетӥ янгышсэ тазьы валэктӥз Владимир Васильевич:

—  Ачид бордысь но трос потэ. Ноку ӧвӧл дугдоно ужамысь, весь-весь ужано, выльзэ утчано... Тыршыны кулэ ӵуказе нунал понна. Туннэ нунал понна гинэ ужаны уг яра.

Татын мон ӧйгес вала: В. Романов котьку но паймытэ вал ужаны трос быгатэменыз, котькытчы вуэменыз. Ужаны но бен туннэ нунал понна гинэ ӧз ужа. Собере, милемлы вазиськыса:

—  Коть алкоголик луэ, коть берпуметӥез кин ке но одӥгзэ валаны кулэ: мар бордысен потэ (бен-бен, потэ!) литература. Аслад куараед — тӥни мар бордын ужпум. Тодон-валанэд но туж ӧжыт медло, дуннеез но туж сюбег гинэ мед адӟод, но луыны кулэ ас куараед, улон шоры ас сяменыд учконэд.

Та ӝытазе нырысьсэ но берпуметӥзэ адӟи мон Владимир Васильевичлэсь синвузэ.

Поэтлэн верамез мынам но, Славалэн но сюлэмаз мур пыӵаз. Витетӥ курсысь студентъёсты, милемды, шуг вал ини кыӵе ке кенешъёсын паймытыны. Та учыре бен поэт сюлэм висёнзэ, курадӟонзэ кисьтӥз, вуж тодмо малпанъёс но выль сямен кылӥськизы. Соинтэк-а та вераськонэз мон кылысь кылэ кельтыны малпай.

Кулон... Котькуд умой поэтлэн чуръёсаз пӧртэм сямен ӝутэмын но эскеремын луэ та ужпум. Аспӧртэмлыко адӟиське со В. Романовлэн кылбуръёсаз но. Map бен, мукет «малпан сузьетъёс» но (инкуазь — адями, яратон, шудбур, паймон) поэт­лэн ужъёсаз бадӟым инты басьто. Озьы ке но, мынам али вераськеме потэ та одӥгез ужпум сярысь гинэ. Угось со, нырысь ик, мон понна витьымтэ шорысь вал — поэт котьку но паймытэ вал шуг-секыт дыръёсаз улон кужым шедьтонэныз, шулдыръяськыны быгатонэныз, маскаръяськон сяменыз. Кыкетӥез, та темаез чаклан выль сямен лыдӟытӥз монэ тодмо кылбуръёсты но.

Татын чаклано тани мае. Поэт но солэн гожтэмаз потӥсь герой одӥг адями уг луо, соос пӧртэмесь. Тросэз лыдӟисьёс монэным соглаш луозы, дыр: кыӵе ке профессиеy калык пӧлы шедьыса, Влади­мир Васильевич шуак воштӥське вал, мукет адямилы пӧрме кадь. Писательёслэн союз юртазы со — кылбурчи но маскарчи, драмтеатрысь артистъёсын спектакль бере дораз бертэ — со ачиз ини чылкак артист. Куке со нырысьсэ школаямы вуиз, мон сое дышетӥсь кожай вал. Нош кызьы гинэ «туссэ» медаз воштылы, Владимир Васильевич сюлэмызъя котьку ик ПОЭТ вал. Кылбуръёсаз со сюлэм висёнъёссэ но сюлмаськонъёссэ бырйыса-бырйыса гинэ пыртылӥз. Шуом, туж яратэ вал шахматэн шудыны, нош кылбуръёсызъя сое уд вала. Нырысетӥ кышноез сярысь куддыръя умойтэм кылъёсын но вераськылӥз, yош кылбуръёсаз кусыпъёс — чылкак мукетэсь. Озьы ик Владимир Васильевич умой тодэ вал пӧртэм «улон-кулон» теориосты, малпанъёсты, но кылбуръёсаз та ужпум туж аспӧртэмлыко ӧръя азинске.

 2

Дунне вылысь кошкон — та тема умой усьтэмын ни В Романовлэн «Мынам тулысэ» (1967) книгаяз ик.

Каргам война басьтӥз атаеным валче

Вордӥськымтэ сузэръёсме но вынъёсме.

(«Вожъяськон»).

Лумбыт та адын — кулон, кулон...

Гур ыме мугоръёсты нулло.

                        («Равенсбрюк»).

Мусоез, айы чӧж, табере

Уз ни лобы, уз ву каразы —

Виизы!

         («Виизы»).

Кулонлэн «философиез» татын огшоры но валамон: кулон ваче пумит пуктэмын улонлы. Со адямилы но инкуазьлы кышкыт тушмон луэ. Кулон лыктэ палэнысь: атай быриз — янгыш война, тушмонъёс; чӧжъёс быро — янгыш кас сюлэмо адямиос. Ваньмыз дунне вылэ кылдэмез вордӥськемын кадь пыраклы. «Туннэ со кулыны дышетске» выллем малпанэн В. Романов соку, егит Ф. Васильев сямен ик, чик но соглаш ӧй луысал.

«Покчи гужем» (1975) книгаын та ужпум ини му­кет сяменгес усьтэмын. Кулон герӟаськемын адямилэн улонэныз: дунне вылысь куке но кошкыны кулэ, сотэк нокызьы уг луы:

Пужым но дась каллен погыраны,

Нош со  нырысь  ик  одно  мед  тодоз,

Кулэ луоз-а выль лэсьтӥськонын,

Со интые ӝутскоз-а выль будос.

Сыӵе улон: вужзэ воштэ вылез.

(«Нюлэс» сонетъёслэсь керттэтысь).

Та малпанэз шӧдӥськом мукет чуръёсысь но. Тани «Кырӟась пужыос» кылбурын «ӵужанай»  улонысь кошкемын ни ке но, кылемын солэн синмаськымон пужыосыз. «Удмурт кедр сярысь» балладаын ге­рой уг жаля родинамы понна ас улонзэ сётыны («Дуно сузэре! Быри ке ожын»), ачиз ик косэ шайвылаз удмурт кедрез мерттыны.

Озьыен, кулон адямилэн улонэзлы котьку ик ва­че пумит уг луы ни, ӵем дыръя соос ог-огенызы герӟаськемын. «Куке но вуоз со — берпум вамышед...»— чакла ини. В. Романов «Йырберыктон турын» книгаысьтыз «Тэтэ карыны ай кутске пиналмы...» кылбураз.

3

1978-тӥ арын Флор Иванович Васильевен люкиськон поэт понна туж бадӟым куректон вал. Влади­мир Васильевичлэн кылбуръёсаз кулон но улон сярысь паймымон малпанъёс кылдо. Паймымон тани малы: ас улоназ быронэзлэсь матэктэмзэ шӧдыса (тодэ вайытэме потэ статьяелэсь кутсконзэ), кылбуръёсаз бен со сярысь ӧчкарыса кадь юромо но юромо уг гожъя. Кутске ачиныз ачиз нюръяськон. Ассэ ачиз алдамъя сямен, поэтлэн кылбуръёсаз туж ӵем пумиськылыны кутско «шуд», «шудбур» ёзнэтэн кылъёс, образъёс. Кулон сярысь умой-умой вераське Ф. И. Васильевлы сӥзем сузьетаз гинэ.

Владимир Васильевичез мон дас одӥг арескысеным тодско. Улоназ солэн трос воштӥськонъёс ортчизы; азьвылзэ но берлозэ ӵошатоно ке, поэтлэн улэм-вылэмез трослы секытгес, шудтэмгес луиз. Нош «Йырберыктон турын» книгаяз со эшшо но эшшо пусйыны тырше лирической героезлэсь шудбуро луэмзэ. Поэт ас дорысьтыз улля кадь эзельзэ: вазь на тыныд дорам лыктыны, учкы, кыӵе мыным умой.

Книгалэн 3-тӥ люкетэз нимамын «Шудбур кизилиос Музъем вылын вордско», йылпумъя сое «Шуд­бур кизилиос» поэма, кытын поэт «Яркыт маде Зэм­лык но Шуд сярысь». Куд-ог кылбуръёс кутсконэнызы ик герӟаськемын та валатонэн: «Нош мар кулэ, шудо луон понна?..», «Шуд пӧлын ке пыласькиськом...», «Шудбуро-крезьгуро шаер».

Асьмелэн шудо шаерамы

                     Тон но шедьты аслэсьтыд шуддэ,—

вазиське В. Романов Нылга ныллы.

Шудо улонэд но

Вуиз ук, вуиз!..

(«Удугучинысь трактор-памятник дорын»).

Туннала лыдӟись чабкиськытэк уз ортчы: ма ся­рысь тӥ вераськиськоды, Владимир Васильевич! Учке, кыӵе «шудо» улонэ вуиз шаермы, кыӵе «шуд» вайиз коллективизация. Лазег, укыр лазег валэктӥськоды кадь тӥ шудо луонэз. Бен асьтэос но сое валатэк ӧд улэ ук. Зэмзэ но, дунне шоры В. Романов туж аспӧртэмлыко учке вал, озьы ке но, лазег ӧвӧл. Нырысь ик, та сярысь трос пол верамы ни, шуд­бур сярысь вераськон солэн кылбуръёсаз витьымтэ шорысь герӟаське эзелен, дунне вылысь кошконэн (поэт уг оскы вал «мукет» дуннеослы, соин ик чуръёсысьтыз но «мукет» дуннеослэсь пытьызэс уд шедьты. Тунсыко луысал, дыр, В. Романовлэсь поэзизэ ӵошатыны Н. Байтеряковлэн лирикаеныз, кытын висъяське фантастической образ Лана но солэн дуннеез, яке А. Белоноговлэн лирикаеныз, кытын берло дыре потаны кутско «кыктоос» («двой­ник») но мукетъёсыз).

Кыкетӥез. В. Романовлэн тросэз кылбуръёсыз — дунне шоры пинал муртлэн учкемез. Поэтлэн шудбурез — со пинал муртлэн шудбурез, котыр ёросэз со нырысьсэ адӟе но сюлмысьтыз ик пайме солы. Эзель но дуннеысь кошкон со понна — туж кыдёкын, палэнын ай.

Ас вакытаз мон ӧй вала, малы Ф. Васильев умоен висъяз «Мынам тулысэ» сборникысь таче чуръёсты:

Мон вешасько тыршись шурез,

Монэ — шунды.

Жадьытозям ужам понна

Веша, вылды.

(«Инкуазь но мон»)

Алигес выльысь лыдӟи но пайми: поэт дунне шоры пинал муртлэн синмыныз учке! Та аспӧртэмлыксэ ик дунъя вылэм кутскись поэтлэн книгаысьтыз Ф. Васильев. Угось со ӟеч тодэ вал: бадӟым поэзия (Б. Пастернак, В. Соколов) котьку но тырше вал инкуазь шоры пиналлэн сайкыт синмыныз учкыны.

1977-тӥ арын 20-тӥ апреле мыным ыстэм гожтэтаз В. Романов чакланы косэ аслэсьтыз «Вало шур» яратоно кылбурзэ: «Учкы ай Вало шур сярысь кылбурме (стр. 60). Учкы развёрнутой метафораез: Вало — вал — изнэс — гид — капка,— изнэссэ уд веша ни — пазьгиськозы йӧ шелепъёс (вал ӵыже капкаез).» Татын но инкуазь суред чылкак пичиослэн синмынызы адӟемын:

...Выль йӧ капка

Вало вадьсын

Кыкнапалтӥ ни пытсаське.

Лыктӥд, адӟид кӧлись шурез —

 Ӧд тодма тон вуж тодмодэ.

Ачиз ӧвӧл ни — изнэсэз

Йӧос улын чиля, пиштэ...

Вуоз дырыз —

                    кыӵе пытсэт

 Сайкась кужымъёсты возёз!

Поэтлэн таӵе утчанъёсыз книгаысь книгае выжо. Соинтэк-а солэн синмаськымон пӧрмо нылпиослы сӥзем кылбуръёсыз. «Куазь ӟардытозь калго но ваньмызлы Пичи дыръя сямен паймо»,— вазиське автор арлыдо лыдзисьёсызлы. Мукет интыын: «Пи­чи дыр шаере Синпӧртмась тылыез утчаны Дасясь-ке берпуметӥез пыж. Нош уг тодскы огзэ: Басьтозы-а тонэ со пыже?..» Таиз берпуметӥ книгаысь: «Нош вань шаер — пичи дырмы, Отын номыр уг вун. Уг воштӥськы кадь со шурмы, Ялан чиля дун ву».

Озьыен, В. Романовлэн кылбуръёсаз лирической герой куддыръя пинал мурт луэ, куддыръя — улонэн жугем воргорон. Нырысетӥ учыре дуннеысь кошкон — кыдёкысь маке но кышкыт маке, угось пинал дыр кулонлы ноку но, нокызьы но уз дышы. Кыкетӥ учыре поэт валаны сётэ: дунне вылысь куке но кошконо. Та кык куараос, артэ вуыса, кужмо чузъяськизы «Атай» кылбурын. Гуртоослэн, «пересьёслэн» чакламзыя, пичи геройлэн атаез ожын юнме ӧз быры:

Вань тэльёс жужан понна,

Вань юртъёс сылон понна,

Вань пиос будон понна.

Тазьы йылпумъяське кылбур. Лирической герой, «пинал пи», «пересьёслы» пумит номыре но уг вазьы. Озьы ке но, со пумозяз ик уг оскы соослы, герой уг данъяськы атаезлэн «ожын быременыз». Со вала, татын маке но мыдлань шуыса.

 

4

Кема аръёс ӵоже малпасько вал мон: В. Романов­лэн поэзиез — улонлэсь шулдырзэ данъян, дуннелэн чеберезлы паймон гинэ. Берло ини валай: поэтлэн кылбуръёсаз но поэмаосаз юн шӧдӥське кышкыт эзелен аспӧртэмлыко нюръяськон.

Согем сюресэз шӧдыса мынӥськод,

Векчи

       нюжатӥ

                 музэн!

(«Сюрес   чип-тӧдьы   шорт  бугор   кадь сэра...»)

Мур но кужмо чуръёс. Сюрес «согемын», сое ӧд «шӧды» ке, векчи нюжа сямен шуак чигиськоз. Вылаз ик чакласькыны дыр но ӧвӧл: сьӧрласянь матэкто кышкыт кужымъёс —

Сильтӧл но ӝужыт вырйылэз энера,

Бӧрсяд            

                 шуласа ворттэ.

Лопыръяськыса

                 позырске дукесэз,

Валэз тыбырад ни шока.

Нош тон уд ик шӧдылӥськы букосэз,—

Пеймыт но

                   уе уга!

Зэмзэ но, та кылбур философской (сыӵе малпанзэ вераз вал мыным поэт ачиз ик), татын усьтэмын котькуд адямилэн улон сюресэз. Но со дыре ик со мур психологической но луэ. Кылбурын угось юн шӧдӥське ачиз автор, солэн лул-сюлэмыз, шӧдонэз.

Матысь эшез сярысь вера кадь поэт «Флор Васильевлы» сузьетысьтыз ньылетӥ кылбураз но. Лыдӟемъя бен валаськод: В. Романов юн шӧдэм аслэсьтыз «кысонзэ» но: «— Ах, кылбурчи, ах, ӵуж учы!— Кыддыръя калык шуэ, Сяська пӧлын, пе, кылбурчи Кайгырытэк улэ. Огзэ уг тодо: сюлэмыз Кыӵе тылын ӝуа. Соин ик но паймо: пумыз Шуак вуэ, шуак».

5

Куке но вуоз со, бурпум вамышед.

Соку ик вордскод —

                    сьӧлыко но шудо,

Потод Ижевске. Сӥзьыллэн ӵукнаяз.

Ортчод, ӵуштыртод усьылэм куаръёсын,

Паймод: ортчемед бен луоз ни угось

Юртъёс пырытӥ, трамвайёс пырытӥ...

Шуак вожектэ кадь гуждор но бадяр,

Вӧзтӥзы ортчиськод ке. Ваньмыз воштӥське

Вакчи вакытлы.  Со — тынад кужымед,

Тынад тулысэд воштылэ инкуазез,

Котыр ёросэз.

...Магазин ӧс азьын

Нылъёс куспазы кенешо вал. Шуак

Соос   берытско   но   жингрес   куараен,

Шудо синъёсын вазьыло кинлы ке,

Гурак   серекто...

                   Тон   сьӧры   мон   кема

Уг мыны, пукись ву дуре дугдыса,

Учко ву вылэ кымаськем инбамез,

Кымаськем юртъёсты,

                    Нылъёсты но

Асме.