Атайтэк будон
Романов В. В. вордӥськиз 1943 арын Татариысь Бавлы ёросысь Удмурт Ташлы гуртын крестьян семьяын. Атаез национальностезъя – чуваш, анаез – удмурт. Мылы ке но озьы луиз – Володя аслаз сюлэмыныз кыстӥськиз удмуртъёс пала, гожъяськиз удмурт кылын, ассэ ӵем дыръя пальпотыса «чуваш» нималляз ке но. Озьыен, вормиз анай вирыз, удмуртлыкез. Кин тодэ, атаез (кудӥз кошкиз ожмаськыны Быдӟым Отечественной войнае но ож бусыысь ӧз берты ни) ӧй бырысал ке, вормысал меда солэн удмуртлыкез, гожъясал меда удмурт кылын, гожъясал ке но, басьтысал меда сыӵе бадӟым инты огъя удмурт литератураын?
В. В. Романовлэн сюлмыныз шунтэмын мукетыз но син шоры йӧтӥсь тодмет – со пичи дырысен атайтэк будон. Кытчы пырод, сыӵе адӟон усиз бере литературамылы. К. Герд, М. Петров, В. Романов – макем бадӟымгес но кужмогес поэт, сокем ӝоггес кыле кадь со вордэм атайтэк. Яке: пияш юнмаса ӧз вуы на, со атаез борды кыстӥськыны ӧдъя но кышкыт война трос аръёслы кельтэ сое бубытэк, кылсярысь, 1914-тӥ ож ар шукке И. Гавриловез, 1941-тӥез – Ф. Васильевез но мукетъёссэ. Пинал дыръя атайтэк будон – удмурт классикалэн валтӥсь тодметэз луиз. Кин ке, оло, юалоз: умой ӧвӧл шат со? Пинал мурт, пе, вазь быдэ вуэ, улон шоры мур учкыны кутске, палэнысь городъёсы шедьыса, со уг йыромы. В. Романовлэн пинал дырыз тупаз кышкыт секыт война вакытэ, со война ортчем бере пятилеткаослы. Ӧй вал солэн вӧзаз агайъёсыз, вынъёсыз:
Каргам война
Басьтӥз атаеным валче
Вордӥськымтэ сузэръёсмэ но вынъсме.
Тужгес но бадӟым ужпум – атайтэк кылён. Нырысь ик вераны луоз: тросэз соку атайтэк будӥзы. Но малы ӵапак В. Романовлы сокем вӧсь йӧтӥз та ужпум? Талы валэктон сётэ Г. Романова (солэн 1-тӥ кузпалэз, кудӥз со дыре нырысьсэ мынэ Володя картэныз Удмурт Ташлые). Г. Романова гожтэ: «…Тодӥсько на, гуртазы вуэм бере, Володя посӥськыса, возьдаськыса мыным шуиз:
– Тӥни милям коркамы, куро липетэнэз. Быдэс гуртын – огназ гинэ сыӵе корка вань на.
Куро липетэн ке, куро липетэн. Мыным маке шат. Ас поннам пайми солэн возьдаськемезлэсь».
Володя школае уг ветлы на вал, турнан машина улэ шеде но кымесаз пус кыле, мырдэм улэп кыле. Пичи дыръяз ик В. Романовлэн быдэс мугораз олокыӵе пӧськыос потӥллям, султыны но ветлыны но ӧз быгаты, туж зол курадӟиз.
Лыдӟиськыны кутскиз школае мынон азяз ик. Семьяязы кык пересьёс уло на вылэм: ӵужанайзы но ӵужатайзы. Кызьы тодмо, адямилэн характерез, пе, тужгес но зол кылдэ вить аресозь. Володялэн сямыз тужгес ик удмурт ӵужанаезлы кельшиз: ӵужанайзы – умой, капчи сямо вал. Тодэ лыктэ одӥг учыр: Володя вӧйын нянь кутэ но ульчае эшъёсыз доры потэ. Ӵужанаез визь-кенеш сётэ: огнад гинэ эн сиы, эшъёсыдлы но люкыса сёт. Нош ӵужатайзы воксе мукет вал: ас понназ гинэ, пе, улӥз, сыӵе сямзэ Володя вылэ но выжтыны турттӥз. Нош Володя сыӵе ӧз буды.
Романовъёс ёрмыса ӧз улэ шуыны луоз. Анаез бригадирын ужа ке вал, семьязэ вордыны быгатӥз.
Нош атаез?
Атай пуктэ ке пельпумыз вылэ,
Соку ик луиськод тон кужмогес.
Кышкан-курдан но син куспын вунэ, - гожтэ В. Романов.
Но татын вераськон мынэ ачиз Владимир Васильевич сярысь, куке Романов ачиз зэмос луиз атай но аслэсьтыз пизэ пельпумыз вылэ пуктӥз. Аслыз В. Романов атай пельпум вылэ пуксьыны ӧз удалты – Романов Василий быриз война дыръя фронтын. Кызьы тодмо, фашистъёс пумит нюръяськыны соос гуртысьтызы куинь кузя мыно: куиньзы ик литератураын азьланяз бадӟым инты басьтыны кутскозы. Соос вал Е. Самсонов, «Уйпал симфония» романлэн авторез но тодмо чуваш кылбурчи А. Афанасьев. Куинетӥез, Василий Романов, быриз ожын но ас интыяз кельтӥз вуоно бадӟым поэтэз.
Атае корка пуктӥз-а?
Вералэ, воргоронъёс.
(Мур лулӟо воргоронъёс)…
Нош пизэ со будэтӥз-а?
Вера ай, мыным анай.
(Синвузэ ӵуше анай)…
Атайлэсь мӧзмон, атаез малпанъёс пыр улэп карон пумиськылэ В. Романовлэн тросаз кылбуръёсаз, кылсярысь, «Ваёбыж кар», «Атай пуктэ ке пельпумыз вылэ…», «Атай» но мукет.
