Пинал но егит дырыз
Романовлэн пинал дырыз кутске 1940-тӥ аръёслэн пумысеныз но кыстӥське 50-тӥ аръёслэн пумозяз. Дорын атай воргорон киос ӧвӧл бере, трос курадӟоно луиз аслыз но пичи Володялы, анаезлы но. Выль корка пуктон малпанзы уйвӧтлы пӧрмиз. Коньдон, валамон ини, ки улазы ӧз сюрылы. Угось соку колхозникъёслы ваньзылы трудодень шуонэн гинэ тырылӥзы. Озьы ке но, Романовлэн биографияяз вал одӥг яркыт тодмет, кудӥз герӟаськемын песятаен, шонергес вераса, ӵужатаеныз но мушъёсын. В. Романовлэн мушъёсыз но муш умортоез возьматэмын «Песятай» кылбурын гинэ ӧвӧл, озьы ик «Подмась Камаш» поэмаяз, «Муш кыл» но мукет кылбуръёсаз. Песятаез солы ужез гажан но яратон мылкыд пыӵатӥз.
Со дыре ик Володя вань сюлмыныз дышетскон борды кыстӥське, вань предметъёсъя мылысь-кыдысь тырше, озьы школаез азвесь медален йылпумъя.
Аслаз гуртаз Володя дышетскиз 7 класс гинэ. Йылпумъяз школаез Чуваш гуртын – Потапын, кудӥз Удмурт Ташлы гуртлэсь куать иськемлы интыяськемын.
Романов туж зол математикаез тодэ вылэм. Озьы ас школазэ йылпумъяса, со нырысь Казаньысь университетэ пыре математической факультетаз. Но дышетсконзэ куштоно луэ: анаезлы пиезтэк секыт, ӵем висе. Соин ик пиез берен ас гуртаз бертэ со аре ик. Мукет ласянь, сое литературае кыске ни, газетъёсы кылбуръёссэ лэзья.
1960-тӥ аре лыктэ Ижевске удмурт пединститутэ но пыре историко-филологической факультетэ. Школаез умой йылпумъямез понна со одӥг гинэ экзамен сётэ. Со вакытэ дышетскисьёс пӧлын вал, кылсярысь, А. К. Байметов психологлэн кузпалыз, арлы пичигес – В. К. Кельмаков, али УдГУ-ысь профессор, М. Абрамов но мукетъёсыз. Татын ик дышетскыкуз шедьтэ нырысетӥ яратонзэ. Со вылэм УдГУ-ысь ик студентка, кык арлы пичигес. Володя армие кошкем бере со мукетызлы бызем. Володя со вакыт туж зол куректӥз, армиын ассэ быдтон сярысь но малпаськылӥз. Оло, соин но, дыр, армиысь бертыса, со куинь ар кышнояськытэк улӥз.
Дышетӥсьёсыз пӧлысь вал, кылсярысь, З. А. Богомолова, И. В. Тараканов. И. В. Тараканов ӵапак 1960-тӥ аре выже УдНИИ-ысь Удмурт пединститутэ ужаны. 1964-тӥ арын луиз доцент. Берло ни Иван Васильевич пусъе, Д. А. Яшинэн ужамен нырысь вамышъёс поэзиын лэсьтӥзы В. Романов, Р. Валишин но Ф. Васильев шуыса. Озьы ик В. Романовлэн дышетӥсьёсыз пӧлын вал Р. И. Яшина, соку аспирантка. Котькуд адямилэн сямен ик, В. Романовлэн студент вакытэз чебер но шулдыр вал. Огласянь, сессиос, лекциос, конспектъёс – та ласянь Романов умой дышетскиз. Мукет ласянь, кызьы тодаз вае Р. И. Яшина, студент Романов тырше котькыӵе пӧртэм ужъёсы, пумиськылонъёсы вуылыны. Быдӟым шумпотон луэ 1961-тӥ арын 31-тӥ январе «Удмуртиысь комсомолец» газетын 1-тӥ кылбурезлэн печатласькемез. Со нимаське вал «Ой лымыя, лымыя но…»
Егит Романовлэн нимыз уг потылы на вал та вакытэ. Газетлэн редакторез вал соку Г. Рубцова. «Выль кылбуръёс пӧлысь» заметкаын Романовен ӵош потэмын Ф. Васильевлэн куинь кылбурез: «Оскисько», «Эшелы», «Мукет планетыосын».
Студент вакытысьтыз одӥгез тунсыко но яркыт учыр: Володя пединститутын дышетске. Мынэ лекция. Вис луэ. Дышетӥсьсы, Р. И. Яшина аудиториысь шутетскыны потэ. Володя соку ик доска доры лыктэ но отчы таӵе чуръёс гожтэ:
Учительница Роза
Лыдӟытоз ни проза.
Пайдаез нош трос-а?
Звонок бере Роза Ивановна аудиторие пыре. Студентъёс куалекъяса пуко: мар меда луоз ни? Роза Ивановна гожтэмез лыдӟе но пальпотыса одӥг студент шоры учке: «Володя, ӵушылы тае, уроклы доска кулэ луоз».
Студент дыр – со егитъёслэн сюлэм висёнъёссы, чебер яратонъёс но секыт лулӟылонъёс. «Уг тодӥськы, ку синмаськи тыныд…» кылбурысь нылмуртлэн образэз биографически кинэн ке герӟаське меда? Но татын умой адӟиське со вакытысь егит студентъёслэн дунне шоры учкемзы, зачётъёслы но экзаменъёслы дасяськемзы.
В. Романовез армие басьтӥзы 1964-тӥ арын. Вылӥ образование басьтэмын ни бере, службаез ӝыны арлы ӧжытгес вал. Басьто ни сӥзьыл, гужем сессия, Госэкзаменъёс бере. Одӥг арлы. Советской армиын улэмез сярысь кылбурчи вераз «Мынам тулысэ» книгаяз, кытын 8 кылбурез сӥземын та темалы («Умой луоз», «Равенсбрюк», «Вӧтъёс», «Сирень – постын», «Мынам тулысэ», «Нылмурт кырӟан», «Пуштырес шумпотонэ», «Бертон»).
Службаезъя тодэ лыктэ одӥг учыр: ГДР-е службае мыныкуз, сьӧраз нуэм час. Тросэз тодо, макем дунъясько вал механической часъёс (асьме дорын поттэм) соку. «Дембеле» кошкись солдатъёс, лыктэм пиналъёслэсь часъёссэс вузаса, доразы трос чебер кузьым нуыны быгато вылэм, пе. Егит Романов Германие вуэм бераз ик, чассэ ватыны быгатэм, сётэм утялтыны отысь одӥг офицерлы. Куке берлогес та офицер нош ик берыктэ со чассэ Володялы, частязы луэ паймымон учыр. Озьы ке но, кӧня ке солдатъёс пунэмзэ берыктыны карисько но одӥг «небыт» интыяз солдатской бляхаен туж зол шукко. Ачиз поэт озьы ик ӧз вера, талазы ик-а со чассэ яке ӧз-а.
В. Романов вал службаын ӵапак со интыын, кытысен пуромиз бадӟым война, кудӥз сэрен ыштӥз атайзэ но трос ласянь шудтэм луиз. Озьы ке но, кылбур чуръёсын Германиез адӟонтэм карон уг кузёяськы, В. Романов идеологлы, идеологияя малпаськись кылбурчилы уг пӧрмы. Со дыре ик, уг возьматы Германиез чебер раез сямен, ваньмыз со суредъёс син шораз мертчылӥзы ке но (Романов умой тодэ вал немец кылэз. Школаын но, университетын но быгатыса дышетӥз сое).
Службаез бере В. Романов кутске ужаны аслаз вордскем гуртаз школаын. Дышэтэ удмурт кыллы но литературалы. Улэ аслаз юртаз, анаеныз ӵош. Соку ик, 2-3 ар ортчыса, кылдэ югдур, куке Владимир Васильевич уг чида но гуртысьтыз кошконо кариське Ижевске. Огласянь, Ижкарын солэн кусыпъёсыз умоесь кылизы. Мукет ласянь, 1967-тӥ арын потӥз 1-тӥ книгаез – «Мынам тулысэ». Солы бадӟым дунъет сётӥз , кылсярысь, Ф. Васильев.
