Улонысьтыз секыт дыръёс
1978-тӥ арын автомобильной катастрофае сюрыса, Ф. Васильев улонысь кошкем бере, В. Романовлэн пыд улысьтыз музъем кошкиз кадь, пуш ласянь маиз ке но чигиз. Та сярысь поэт ачиз но трос пол шара вералляз. Кылсярысь, гожтӥз Ф. Васильевлы сӥзем кылбур. 1978-тӥ арысен кутскыса, В. Романов зол воштӥськиз. Ваньмыз сямен со воштӥськонэз урод ласянь адӟизы но дунъязы.
Умой кылбурчиос ӵемысь урод политик луо, пе. В. Романов чик но дышемын ӧй вал системаысь бадӟым адямиосты кӧяны-вӧяны но соослы куриськыны. Писательёслэн Союззылэн кивалтэтаз ужаны кутскем бере, вылӥ начальникъёсын солы ӵем гинэ пумиськылоно луиз. Палэнысьёслы ӵемысь умой мылкыд кельтылӥз (учке, макем умой вера Романов сярысь Дементьев «Растет ли у вас земляника?» статьяяз. Со вакытэ ик асьме Удмуртиысь начальникъёсын кусыпъёсыз шугесь вал. Романов пуш дуннеезъя зэмзэ но сирота вал, куке улыны индыло, дышето ке – туж вожез потэ, «политик» сямен шудыны уг быгаты (таӵе ик сямзэ пусъё ӟуч критикъёс Рубцовлэсь биографиысьтыз но, кудӥз озьы ик сирота луыса будӥз).
Одӥг пол, В. Романовлэн верамезъя, ульчаысен соин пумиське одӥг бадӟым кузё но индылыны, улонлы дышетыны кутске: тыныд, пе, сыӵегес-таӵегес луоно вал, нош тон малы ке но ай… сыӵегес.
Романов уг чида, шорз лек куараен куштэ: «Тон пересьмид ке, со креслоысьтыд кошкид ке – сьӧрад ваньмыз сяласькыса улозы. Нош монэ, таӵе урод ке но мон, школа учебникъёсы пыртозы но кылбуръёсыя нылпиосты дышетозы». Та учыр туннэ нуналэ но трос вера Романовлэн пуш дунеезлэн пӧртэмлыко характерез сярысь. Но та учырен ми ум тыршиське нош ик быдэсак льӧльманы поэтлэсь тусбуйзэ. Тодэ ваем мукет учырез.
Ижкарысь телевидение 70-тӥ аръёсы Пушкин ульчаын интыяськемын вал, удмурт передачаос ваньмыз сямен меӵак трансляциен мыно вал. Литератыралы сӥзем передачаосы ӵемысь ведущие пукто вал Романовез: улон интыез но матын, кык корка гинэ висъя, вераськон кылыз но чебер, адямиосын кыл шедьтыны но бурдъяны быгатэ. Кыӵе ке юмокъёс кылдо ке (прямой трансляциос дыръя соос ӵем луо), Романов потон амалъёс котьку сямен шедьтэ вал. Соин ик телевидениын сое гажало вал. Но одӥг пол – малы ке но кинлы ке йырыз курен, кыӵе ке но лек муген – репетиция ортчытэм бере, телепередачае юромо уг лыкты. Та учыр бере озьы ик трос тышъёс усё Романов вылэ.
Ваньзэ таӵе учыръёсты лыдэ басьтоно ке, вераны луоз «Инвожо» журналлэн кылыныз: 1979-1985-тӥ аръёсы – Романовлэн улоназ самой секыт дыръёс. Сое ужысь улляло, нокытын уг печатласькы.
1985-тӥ арын гинэ, куке улон быдэсак воштӥськиз, кутскиз выльдӥськон, Романовлэн печатлаське «Луд кеч салам» книгаез, собере ини потэ «Йырберыктон турын» (1987). Вераны кулэ: «Йырберыктон турынын» тросэз кылбуръёс азьлогес печатласькизы ӟуч кылын но потӥзы Москваын.
Мар вераны луоз Романовлэн 1979-1985-тӥ аръёсыз сярысь? Ассэ сюдон но коньдон поттон понна, со трос ветлэ «выступать карыса», куддыръя нуналаз куинь-ньыль пол калык азе потылыса, арняскын Романов толэзь уждун мында коньдон поттылӥз. Та вакытэ ик ньыль пол сюрылэ больницае. Нырысьсэ больницае сюре 1979-тӥ арын. Нырысь-вылысь эмъяське ке «партлечебница» шуоно интыосын (Романов коммунист ӧй вал), берлояз ини пытсамын луэ ЛТП-е, кудӥз, Романовлэн верамезъя, тюрмалэсь но «ӧжытак гинэ уродгес луэ». Котьма ке но, ЛТП-ын но, пе, эмъясьёс сое туж гажало вал, мукетъёссэ сямен уг курадӟыто. Романовлэсь улонысьтыз секыт аръёссэ туннэ понна тужгес но умой гожтӥз Иосиф Иванов, кудӥз ассэ озьы ик, Романовлэн дышетскисеныз лыдъя.
«… Вал сыӵе учыръёс но, куке солэсь гожтэм ужъёссэ нокытын но печатланы ӧз лэзьылэ. Со вадес мон ужасько вал Алнаш райгазетаын – редакторлэн кивоштӥсез луыса. Ваньмыз сямен газетэ мынӥсь литературной материалъёс соку мон пыр ортчылӥзы. Литературалы сӥзем бамъёсты но мо ник дасялляй. Ӵем гинэ печатласько вал мон Володялэсь но кылбуръёссэ. Но тани мон доры но вуиз алон: сое эн ни поттылэ. Мынам егит дырысеным ик вал ини мыдланес сямы: мае ке лэсьтыны уг ке лэзё, мон сое одно ик лэсьтыны турттӥсько. Таяз радэ но, Володялэсь кылбуръёссэ печатламсь дэгдэм интые, соосты мон уката но ӵемгес поттылыны ӧдъяй… Мон сюлмыным валаны тырши: макем Володялы али кулэ сюлэмысьтыз потэм чуръёссэ калык, лыдӟись доры вуттыны луонлык. Сыӵе луонлыкъёсыз угось солэн та вакыт туж но туж пичиесь вал…». Тани ма гожтэ та пумысен В. Михайлов: « Куд-огез редакциос, кылбурчиез гажаса но солы ӧжыт ке но гонорарен юрттон вылысь ужъёссэ В. Юрасов псевдонимен поттылӥзы. Ачиз В. Романов шуылоз вал:
– Кулӥ ке, «Алнаш колхозник» ёрос газетлэсь берло аръёсы подшивказэ бугыръяса, кылбур бичетме поттыны луоз. Иосиф Иванов гинэ вань ыстэм кылбуръёсме печатла. Блокнот ышоз-мар шуыса вань чуръёсме али солы ыстылӥсько». Алнаше, Иванов доры вуылэм сяна, Романов ӵемысь гинэ вуылэ мукет дышетскисьёсызлэн, солэн дуно луись эшъёсызлэн гуртъёсазы но.
1983-тӥ арын октябре, Коӵыш гурт пыртӥ потыса, ветлэ Шибановлэн Турбашур гуртаз, тодматске анай-атаеныз, пыро мунчое, ветло губияны. Юртъере пырыса гинэ вуэ – соку ик кыл шедьтэ ньыль аресъем Алёшаен (Шибановлэн племянникеныз). Пичи пи соку ик ушъяськоно кариське, солы, пе, «тол басьтӥзы» («Зиму купили»). Романов паймыса ик чабкиськиз, угось пичи пияшлы выль гын сапег басьтӥллям. Сокугес ик Романов гожтэ кылбур –
«Вот кыӵе тол!»: Нош нимыз со толлэн – гын сапег!
Ӵем гинэ вуылэ Выль Казмасэ Ар-Серги доры. Азьвыл куинь (одӥг группаын ӵош дышетскисьёс Слава, Виктор но В. Романов), Виктор Петербурге аспирантурае кошкем бере – кык кузя. Славалэн анаез мылысь-кыдысь пумиталляз Владимир Васильевичез. Куиньзэ ик ас адямиоссэ кадь карылӥз. Ар-сергилэн тодэ ваёнысьтыз: «Володя ӵемысь вуылэ вал мынам вордскем гуртам — Выль Казьмасэ. Отын со соку ик ӟеч кусып шедьтӥз анаеным — Афанасья Фёдоровнаен. Ялан соос оломар сярысь но лабыртылӥзы. Собере ӝытсэ изён азьын Романов шумпотыса ивортылӥз мыным:
— Инмар понна! Туннэ юнме ӧй улы. Анаедлэсь кык выль кылъёс тодӥ. «Дэреми» но «бадӥз». Дэреми — со дэрем е, нош бадӥз — аналмиз. Вот тон ветлӥськод — пыд улдэ уд адӟиськы».
Егитъёсын ӵош улыкуз, Владимир Васильевич ачиз но егит кадь вал. Ноку но ужтэк пукыны ӧз чидалля: я картош копано, я садын бугыръяськоно. Но котьку но кыӵе ке кескич амалъёс утчалляз, кызьы ке но шулдыр серекъялляз.
1983-тӥ арлэн пумыз В. Романов понна уката но секыт вал. Вылӥын пусъем шуг-секытъёс сяна, ватсасько таӵеосыз: Галина Васильевна но Владимир Васильевич семьязэс уретоно карисько, соин сэрен комнатаен квартиразэс шори люконо луо. Кызьы тодмо, кык комнатае квартираез шори люкыны уг луы: огласянь – одӥг комнатаен квартира, мукет ласянь – коммунальной квартираысь пичи сэрег. Валамон ини, В. Романов коммуналкае выжоно луэ. Со дырысен улон ласянь олокытӥ но костаськоно луэ, вагонъёсын но улэмез, кӧлаллямез вань.
1994-тӥ арын Романовлэн анаез кулэ. Коркаез Володялэн пиезлы кыльыны кулэ вал. Но Галина Васильевна сое вуза, коньдонэныз пиезлы квартираяз ремонт лэсьтӥзы. Сергеев гожтэ: «...Дас арлэсь ятыр ми соин тодмо вал. Пӧртэм дыръёсы ми соин пукылӥм, вераськылӥм, эсьмаса, литература сярысь ӟырдыт ченгешылӥм но, ог-огмылэсь ӧсъёсмес но ларк шуккыса кошкьглӥм. Нош ӵуказеяз нош ик серем пыр ваньмыз ортчылӥз. Малы ке шуоно, со нокинлы но йырзэ кур кема ӧз возьылы. Шонерак вералоз но тӥни. Со сямызлы ик луыса, Владимир Васильевичлэн уно гинэ тушмонъёсыз но луылӥзы…»
