Поэзиын йыгмыт вамышъёсыз
«Мынам тулысэ» книгалы (наборе сётэмын 1967-тӥ арын 19 апреле, тиражез умой – 2000 экз.) удмурт критикаын умой дунъет сётӥзы. 1968-тӥ арын, В. Романов «Дась лу!» газетын ужаны кутске. Та газет потэ 1930-тӥ арысен, сӥземын школаысь пиналъёслы, шонергес вераса пионеръёслы (3-8-тӥ кл.). Та газетын ужан кулэ каре вал командировкаостӥ трос ветлонэз, трос адямиосын, ӵемгес пионервожатойёсын, удмурт кылъя но литературая дышетӥсьёсын пумиськылонэз. Котькуд школаысь В. Романов тыршиз утчаны талантливойзэ, инмар тылгизиен кузьмам нылпиосты.
«Дась луэ!» ужаны вуэм бераз ик, В. Романов тодматске вуоно кузпалыныз Г. В. Романоваен. Дас тямыс аресъем Галина соку лэсьтӥськоныны строитель луыса ужа вал, улэ соцгородокын общежитиын. Галина гожъя вал кылбуръёс, каллен кутске соосты печатланы. Редакция вал Пастухова урамысь 13 юртын, Ижкарлэн шорсюлмаз. Та юртэ та вакытэ тэрытэмын вал ваньмыз сямен редакциос. Соин ик одӥг редакцие пырид ке, мукет редакциосын но пумиськоно, тодматсконо луоз.
В. Романов тодматске нылмурт кылбурчиен. Г. Романова тазьы тодаз вае: «Солы одӥг ужась верам:
– Тодӥськод-а, милям вань кылбурчимы, фамилиез тожо Романов, ӵыжы-выжыед ӧвӧл меда?
Мон шӧдӥ исаськыса, серекъяса сямен вераськемзэ. Соин нокыӵе кариськы. Нош соос уг буйгало:
– Со милям тожо кышнояськемын ӧвӧл на. Айда тодматомы. Кужмысь сямен монэ «Дась луэ!» нуизы. Уг тодӥськы ни, мар вераським соку В. Романовен. Одӥгез гинэ син азе пуксе на: шорам учкизы быдэс мугорме портӥсь синъёс. Мон амалтэк ӵыжектӥ, керпотонэ гомӟиз. Возьдаськемме шӧдыса, лэся, Володя капчияк вазиз но сокугес гинэ потэм «Мынам тулысэ» кылбуръёсын нырысь сборниксэ кузьмаз. Мон эшшо но кепырай: улонам нырысьсэ пумитасько книга гожтӥсь муртэ!» 1986-тӥ арын ик В. Романовлэн печатлаське 2-тӥ книгаез – «Тыметын шунды уя», кудӥз сӥземын нылпиослы. Татчы пыро, кылсярысь, таӵе тунсыко кылбуръёс: «Шунды», «Дыдыкъёс», «Гожтэт» но мукет.
Володя но Галя уло вылэм одӥг палан, общежитиосссы чылкак артэ. Володя ӵемгес но ӵемгес нылъёс доры куное ветлыны кутске. Соосыз комнатаязы куать кузя уло вылэм. Ог-огзэс ярато ке но, Галялэн юлтошъёсыз чакласькыны косо. Угось яратоно туганэз 7 ареслы бадӟымгес. Со сяна, со бадӟым дышетскем адями, нош нылъёс – огшоры строительёс гинэ.
Кызьы ортчиз нырысетӥ пумиськонзы, кызьы егитъёс ярато вал ог-огзэс, кыӵе вал шуг-секытъёс, кызьы ортчиз сюан – ваньзэ тодаз вайыса Галина Васильевна гожъяз берло, В. Романов кулэм бере, «Яратонмы но одӥг вал…» нимо статьяяз. Та уж печатласькиз 1993-тӥ арын В. Романовлы сӥзем «Инвожо» журналын. Общежитиын 6 ар улытозь, Галялэн эшъёсыз тросэз бызё, интыязы вуо мукетъёсыз, кудъёсыз Галялы туж ик уг кельшо. Та сярысь верано кариське Володялы – тамак кыско, пе, вина юо, шуш кылъёсын верасько. Володя номыр кариськытэк сямен шуэ: «Ма, иське, ойдо ӵош кариськом, квартирае потом». Озьы, соос мыно ЗАГС-э заявление сётыны. ЗАГС-ын луэ пичи юмок, тунсыко учыр. Отын ужасьёс егитъёслэсь паспортсэс учко но паймо: кыксы ик Романовъёс, кыксы ик – Васильевич, Васильевна. Паймыса учко егитъёслэн синъёсазы, уката ик Володялэн синмаз. Соиз туж кескич но шулдыр учке вал. Келяло берен свидетельствооссы понна, учкомы, пе, отысь, кин атайды но атайды. ЗАГС-ын ужасьёс малпаллям, сузэрен но братэн татчы серекъяны но «эскерыны» лыктӥллям шуыса. Гожтӥськонэз пусйыса юондыр ортче общежитиын, улон интыязы. Собере ветло Галялэн вордӥськем палъёсаз, Ува пала. Кышноезлэн ӵыжы-выжыосыныз Володя ӝог шедьтэ умой кыл.
Кышнояськон аразы ик В. Романовлэн эшшо одӥг кылбур книгаез потэ. Таиз ини ӟуч кылын – «Играй с нами».
Егит кузпалъёс, Галя но Володя, квартирае потон сярясь верасько ке но, улоннизы умой ӧй вал. Нылкышно синмын учкыса, «ӝыныез музъеме гудыса лэсьтэмын, укноосыз мунчо быдӟа гинэ». Кузёоосыз уло вылэм вылӥын, ӵем дыръя куашето, юо. Юэмзы дыръя «педло поталлязы корказы ведрае. Кудӟем маоске со ведразэс кисьтылӥзы но пож вузы ми вылэ виялляз. Сыӵе дыръя Володя чус-чус луылӥз, йыр бордаз кутскылӥз но ас понназ сямен шуылӥз: «огшоры пӧрмостэм, визьтэм адямиос но ӟеч квартираосын уло, нош асьмеос ку адяме потом ини?..» Та муген ик, шӧдске, 1971-тӥ арын, пизы вордскем бере, Галина ӝыны арлы Ижкарысь кошконо кариське. Улэ Володя дорын, Удмурт Ташлы гуртын. Романовъёс пизылы Володя ним сёто. Озьы ёртӥллям Галялэн анай-атаез.
Кызьы мынӥз со вакытэ В. Романовлэн творческой азинсконъёсыз? Огдыре со ужа кык ӧръя: нылпиослы но кылбур гожъя, бадӟымъёслы но. Нылпиослы гожъямез «Дась лу!»-ын гинэ ужаменыз герӟаськемын ӧвӧл. Солэн лул сюлэмез герӟськемын вал нылпи шӧдон, соосты ас палаз кыскыны быгатон. Кӧня ке кылын быгатэ вал со пиналъёсты ас котырыз биньыны, споръяськыны кыскыны. 1973-тӥ арын печатлаське В. Романовлэн нылпиослы сӥзем «Тӧдьы Кам» сборникез. Вылтусызъя чебер тусо, кылбуръёсыз но паймымон югытэсь, чильпырасесь. Та книгалы умой дунъет сётэ А. Леонтьев. Анатолий Кузьмич, Володялэсь одӥг ареслы гинэ пиналгес, озьы ик солэн эшез вылэм ни, ачиз Можгаын ке но улэ вал. Угось А. Леонтьев но нылпиослы гожъяз. «Дась лу!»-э гожъям сяна, кык книга но поттыса вуэмын ни вал: «Мед сяськаяськоз» (1968), «Урамын тулыс ке…» (1972).
В. Романов та вакытлы кык комнатаен квартира басьтыса вуиз: Красногеройской ульчаын, 28-тӥ юрт, 19 номеро, 1-тӥ этажын. 1974-тӥ арлэн пумаз Удмуртиысь писателъёслэн 10-тӥ съездзы ортче. Съездлэн ужаз ӧтемын вал трос куноос. Соос пӧлын вал В. Тельпугов (Москва), В. Юскерон (Марий Эл), Д. Гусаров (Карелия), М. Магдеев (Татарстан), С. Захаров (Екатеринбург), И. Изъюров (Коми). Писательёслэн Союззылэн кивалтӥсез луиз Ф. Васильев, кудӥз азьло «Молот» журналлэн валтӥсь редакторез вал. Писаетельёслэн Союззылэн кивалтӥсез луиз ке но, Ф. Васильев ӧз дугды «Кенеш» журналэн кивалтэмысь. Та вакытэ Ф. Васильев туж вылӥ дунъя вал В. Романовез (шонергес вераса, 1967-тӥ арын ик нырысетӥ книгалы потыны юрттӥз вал Ф. Васильев). Соин но, дыр, литературной консультант ужез дэмла В. Романовлы, кудӥз соку ик басьтӥське та уж борды.
Собере, Писательёслэн Союззылэн ӧрезъя пӧртэм ужрадъёс, пкмиськонъёс ортчытъян (кылсярысь, вуо Москваысь поэтъёс Римма Казакова но Тамара Жирмунская). Со бере ик кутске Удмуртиын Украинской литературалы сӥзем нуналъёс (3-тӥ октябрь 1975-тӥ ар гожтэтысьтыз). Трос ветлэ командировкаостӥ: азло «Дась лу!»-лэн ужъёсызъя пиналъёс пӧлтӥ ветлэ ке вал, табере Писательёслэн Союззылэн куронъёсызъя. Тросгес бадӟымъёс пӧлын. Та вакытэ ачиз но трос гожъяське, ужа «Покчи гужем» книгаез бордын, кудӥз печатлаське 1975-тӥ арлэн пумаз. Ар ортчыса, 1976-тӥ арын октябрь толэзе «Покчи гужем» книга понна Романовлы сёто Удмуртиысь комсомоллэсь премизэ.
1970-тӥ аръёслэн шоръёсаз Романовез но Ф. Васильевез котьку но артэ адӟод вал. Уж дурын гинэ ӧвӧл, шутэтсконын но. Кылсярысь, Ярысь тодосчи но кылбурчи Георгий Архипов ортчытэ районысьтызы но Глазов палась ӧтем пиналъёсын кенешон. Шуак со вакытэ, гужем каникулъёс дыръя, редакцилэн кабинетаз пыро В. Романов но Ф. Васильев. Соос ӵошен ветлоно кариськиллям Бердыше узыяны но губияны. Яр редакциын ортчытоно ужрадзэс тодыса, соос отчы но пырано кариськиллям.
Та дыръёсы Флор Васильев, комсомоллэсь фондзэ уже кутыса, арлы быдэ ортчытъяны кутске егит талантъёслы сӥзем семинаръёс. Ортчылэ со апрельёсы, пырисько отчы Удмуртиысь ӟуч но удмурт кылбурчиос, прозаикъёс, драматургъёс, артистъёс, суредасьёс. Туннала удмурт культураысь тросэз усточиос али но тау шуо Ф. Васильевлы таӵе семинаръёс радъялляны быгатэмез понна (Л. Кутянова, Т. Чернова, В. Котков, В. Шибанов, О. Чужанова, П. Ёлкин но трос мукет).
В. Романов Ф. Васильевлэн котьма ласянь юрттӥсез вал. «Восхождение», Ф. Васильевлы сӥзем книгаез учкыку, отын но Ф. Васильевлэн нимыныз артэ ӵем потылэ В. Романовлэн нимыз (лыдэ басьтоно: та книгаез лэсьтыку, Романовлэсь нимзэ уггес яра ни вал умой ласянь печатланы).
