 |
ВЛАДИМИР РОМАНОВЛЫ СӤЗЕМ ВИРТУАЛЬНОЙ МУЗЕЙ "...Выжыё уго
|
|
|
Иосиф ИвановКотькуд чурез улон гизьыВЛАДИМИР РОМАНОВ СЯРЫСЬ КУД-ОГ МАЛПАНЪЁС Владимир Романов удмурт литератураын ӵыжак выль адями вал шуи ке, бадӟым янгыш уг лэсьты шуыса малпасько. Выль вал со сямызъя но, гожъяськон манерезъя но. Нырысь ик, со вал бадӟым профессионал. Кызьы ке лирика удысын, озьы ик нылпи поэзиын но. Мыным аслым берпуметӥез удыс уката но матын луэ бере, кӧня ке эскереме потэ Владимир Романовлэсь нылпиослы гожтэм куд-ог произведениоссэ, нош соос пыр — солэн быдэс творчествоезлэсь мар ласяньгес аспӧртэмлыко луэмзэ возьматэме. Нылпи поэзиын Владимир Романов луиз бадӟым новатор. Сое мукет поэтъёсын нокызьы но уд сура. Романовлэн кылыз кийыгыриен шӧдымон — сокем со рельефо. Кылбуръёссэ шара лыдӟыку, поэтлэсь верам-гожтэмзэ, йырыныд гинэ ӧвӧл, пиньёсыд улын но шӧдӥськод кадь. Угось отын ӧвӧл буш, тырттэм, кӧсыт кылъёсыз, ваньзы соос турлы куараослэсь, турлы буёлъёслэсь, турлы шӧмъёслэсь кылдытэмын. Уката ик трос отын жингрес куараосыз, шунытэсь буёлъёсыз, кудӟымон ик тодмоесь но шумпоттӥсесь зынъёсыз. Таӵе сач-сач, сэрего-сэрего, выро-гопо кылын гожъяськись поэтъёс удмурт нылпи поэзиын солэсь азьло ӧй вал на. Форма ласянь гинэ но учконо ке, В. Романов трос выльзэ пыртӥз удмурт нылпи поэзие. Татын со нырысетӥен сямен кутӥз женской рифмаез. Со гинэ мар ай — поэтлэн кылбуръёсаз пумиськыло дактилической рифмаос но. Тазэ ини музон кылбурчиослэн творчествоысьтызы, нуназе куазен тылын ке но утчад, уд шедьты. Тон шуиськод: «Флор — жугиськись». Тон ватсаськод: «Ачиз кутскиз...» Верамедлы уг оскиськы — Сое ай тон уд тодӥськы! Нош ритмикаез Романовлэн! Котькуд кылбурын, котькуд мылкыдлы сётэмын солы гинэ тупась ритм. Но котьку сямен со—пезьгыт, кема аръёс ӵоже пыкмыны вуэм дуретъёсты пазьгыса ик лэзись но соос пушкысь весяклы потӥсь! Соин ик В. Романовлэсь кылбуръёссэ вуж сямен, огдышем амалъя лыдӟыны кутскиськод ке, соосты ӵем дыръя соку ик валаны но уд быгатӥськы. Озьы бере, В. Романов аслаз творчествоеныз кутскон сётӥз выль лыдӟисез, улон шоры данаклы паськытгес усьтэм синъёсын учкыны тыршись лыдӟисез будэтонлы. Та ужпум вылэ ик туж зол ужаз на, али но ужа, ужалоз но Владимир Романовлэн творчествоезлэн пуштросэз. Отысь, оло, укыр йӧспӧртэмзэ, ортчыт шер пумиськылӥсьсэ но чылкак абдратӥсьсэ уд но шедьты. Вылласянь учкыса, суредано арбериосыз солэн огшорыесь гинэ кадь. Ас улонамы асьмеос соосты нуналлы быдэ сямен пумиталляськом. Но со арбериослэн «пуш» дуннеязы пырыны быгатӥськод ик ке, выйиськод ини дурыстэм паймонэ но, бадӟым шумпотонэ но, куддыр нош зол-зол кайгыронэ но. Со бордын ик зэмос поэтлэн бадӟым талантэз: со огшоры арбериез ик ас сяменыз пиштытыны, солэсь ӵыжак выль сэрегъёссэ лыдӟись азе усьтыны быгатэ. Чик бырйытэк-маратэк, нырысь шедемзэ ик кылбурзэ басьтӥмы ке, тае асьмеос адӟыны быгатом. Шуом, басьтом тани таӵезэ: Чигиз ини бурез но куас, Чигиз ни чиданэ. Кык чур гинэ, чылкак кык чур. Нош валанлыкез, пуштросэз отын —дасо чуръёслэн мында. «Чигиз ини бурез но куас»— макем огшоры суред, гуртысь котькуд пияш понна со туж но туж тодмо учыр. Но татысь асьмеос валаськом: пияшлэн паллянэз куасэз азьвылгес чигем ни вылэм. Сое со ачиз но тупатъяллям, итылэм ни, вылды, нискыламез мед ик луоз на шуыса. Ай нискылам но со итылэм куасэныз — бурез угось быдэс на вал соку. Но тани «чигиз ини бурез но куас». Map карод на — кыкез ик куасэд итылэмын-кышъямын луиз ке, трос ик уд нискыла ни, дыр. Та огназ чур гинэ но — пияшлы быдэс характеристика ини. Учке ай, кыӵе чупрес ук со — куассэ тӥямлэсь кышкаса, ӝужыт гурезь йылын тэк уз сылы, усиз ке но, султоз но выльысь гурезь йылэ тубоз, нош куасэз чигиз ке, кинлэсь ке кышъям-тупатъямзэ витьыса уз пукы, ачиз ик кутоз но тупатоз. Нош кыксэ ик та вылӥ сётэм чуръёсты («Чигиз ини бурез но куас, чигиз ни чиданэ») куспазы герӟаса, ӵош карыса ке лыдӟид, син азяд пуксёз ини быдэс паймымон суред. Нырысь ик, «чидан чигиз» — макем удмурт сямен верамын! Но та калык веран татын юнме шорысь, шуак-дуак гинэ кутэмын ӧвӧл. Автор юромо кадь кык пӧртэм «чигонъёсты» артэя но, соосты ваче но пуктэ. Бурез но куас чигиз ини бере, ма кызьы, пе, чиданэд чигытэк кылёз на! Но куас зэмзэ ик чигыны быгатэ ке, кызьы меда чиге чидан? Сое автор уг валэкты. Но лыдӟись авторлэсь малпанзэ сотэк но туж ӟеч вала. Вылаз ик, татын возьматэмын суред небыт но шуныт юмор пыр сётэмын бере. Тӥни ма но уг быгаты зэмос поэт чылкак кык чурен гинэ но возьматыны! Ойдолэ бен басьтом на Владимир Романовлэсь эшшо огзэ нырысь шедемзэ ик кылбурзэ. Шуом, «Шундыпизэ». Татын возьматэмын кузь пельёстэм но, сиськисьтэм но, тушмонъёсызлэсь пегасьтэм но, вӧл-вӧл шуныт учкись но луд кеч. Сыӵеез луэ шат? Луэ вылэм! Со угось — «пичи шунды луд кеч» (солнечный зайчик). Ма бен, та веран ӟуч кылысь асэстэмынгес ик ке но, поэт со асэстэмзэ шонере поттыны туж но туж быгатэм. Угось: Бертэ ке пӧйшурась Огпол но ыбытэк, Пыӵал гумы пумаз Шунды кечпи эктэ. Уть ай, чылкак пичильток арбери бордысен гинэ кутскыса, поэт лыдӟисьсэ витьымтэ шорысь кадь вуттэ туж бадӟым но туж лэчыт проблема вылэ. Татын со инкуазез утёнлэн кулэлыкез сярысь меӵак уг но вера, нош огпол но ыбытэк бертӥсь пыӵал сярысь деталь та проблемаез лыдӟись азе туж лэчыт пуктэ но сюлэм пыртӥз поттыса лэзе. Макем шумпотэ «шунды кечпи» пыӵал ыбымтэысь — пырак эктэ со шумпотэмысьтыз. Озьы бере, шунды кечпи пыр автор возьматэ зэмос луд кечпиосты но, со гинэ шат — адямиосты, соослэсь психологизэс но! Огшоры кылшудон гинэ кадь татын. Нош пуштросэз — быдэс публицистической статьялэсь но, оло, бадӟымгес! Владимир Романовлэн нылпи кылбуръёсыз, зэмос нылпи поэзиысь ваньмыз устоесь произведенное сямен ик,— конкретно-образноесь. Со ноку но уг вераськы огъя кылъёсын, уг вера кыче ке тусбуйтэм но бездыт югдуръёс сярысь, уг возьматы кыӵе ке огъя пиналэз. Котькуд кылбураз — кыӵе ке но конкретной учыр, югдур, образ, котькудаз — конкретной адямиос. Со — ас бакчаяз кожы будэ-тйсь юннат Игнат но, пуны вордон сярысь уен-нуналэн малпаллясь Гирыш но, выль дэремен ураме потэмысьтыз эшъёсыз чепыллямлэсь палэнскыны туж аспӧртэм амал шедьтэм Борис но, ваменэс пуклёкез тӥрен чошен вормыны быгатӥсь пияш но, тэль сьӧры нефть поттӥсь вышкаосты учкыны ветлэм Ондӥ но... Владимир Романовлэн покчи героез котьку ик возьматэмын действие, динамика пыр: я со кызлэн йылозяз ик тубе но ассэ космонавтэн адӟе, я урокын компас стрелка кадь бергаса пуке, я обидем эшез пала чик кышкатэк дурбасьтэ, я пушмульы бича, я гурезь баме аслаз кышкамтэез сярысь куас пытьыеныз «гожтыса» кельтэ, я гольык пыдъёссэ азвесь лысвуэн миське. Нош асьмеос тодйськом, нылпи поэзия динамикатэк улыны уг быгаты шуыса. Озьы бере, Владимир Романовлэн кылбуръёсыз — зэмос улэпесь! Со сяна, солэн творчествоез туж национальной. Трос-а печатласькизы солэн нылпиослы гожтэм ужъёсыз, мукет кылъёсы берыктыса? Трос ӧз. Малы ке шуоно, соосты кыӵе ке мукет кылэ берыктыны секытгес но секытгес. Угось соос быдэсак пыӵамын удмурт шӧмын — йырысенызы пыдозязы. Владимир Романовлэсь творчествозэ азьланяз уката но мургес, пыр-почгес эскерозы на. Но соиз ини—литературоведъёслэн ужзы. Мон татын нырысь сюрем кылбуръёсты ик басьтыса пичияк эскерон манер лэсьтӥ ке, солэн мугез мукетгес вал: мынам потӥз литературоведъёслэсь Владимир Романовлэн творчествоез шоры учкон саклыксэс лэчытгес, мургес но паськытгес карытэме. Нош али солэн поэзиез, уката ик нылпиослы гожъямъёсыз, туж жаляса верано луисько, тыро-пыдо эскеремын, сэрттэмын-пертчемын ӧвӧл на. Кин ке та уж борды саесъёссэ ик пужалляса басьтӥськиз ке, мон гинэ ӧвӧл, уно сюрс адямиос но йыбырттыса ик тау карозы солы. *** Асьмелэн туж уноезлэн кылбурчиосмылэн пушказы нырысь ик пуке адями, собере гинэ ини — поэт. Нош Володя Романов, мон сямен, та ласянь мукетгес вал. Со нырысь ик вал поэт, собере гинэ ини — адями. Ӵапак соин ик мон со сярысь веранме кутски солэн поэт луэмез бордысен. Нош табере туртто пичи ке но возьматыны, кыӵеен мон адӟи солэсь адями луэмзэ. Аслаз ик малпам кылыныз верано ке, Володя зэмзэ но вал—пуксеттэм. Инмарен сётэм даурезлэн берпум часозяз ик со пуж-пуж пыласькиз бадӟым улонлэн ӧраз. Ярдурысь луо вылэ потаса ӧз но шутэтекылы со — весь уялляз, зымылӥз, берен ву вылэ потылӥз, нош ик зымылӥз. Олокыӵе шимес вуберганъёсы но сюрылӥз со та паськыт ӧрын. Но ӧз выйы, ӧз сётскы пеймыт кужымъёслы. Вал сыӵе учыръёс но, куке солэсь гожтэм ужъёссэ нокытын но печатланы ӧз лэзьылэ. Со вадес мон ужасько вал Алнаш райгазетын — редакторлэн кивоштӥсез луыса. Ваньмыз сямен газетэ мынӥсь литературной материалъёс соку мон пыр ортчылӥзы. Литературалы сӥзем бамъёсты но мон ик дасялляй. Ӵем гинэ печатласько вал мон Володялэсь но кылбуръёссэ. Но тани мон доры но вуиз алон: сое эн ни поттылы. Мынам егит дырысеным ик вал ини мыдланес сямы: мае ке лэсьтыны уг ке лэзё, мон сое одно ик лэсьтыны турттӥсько. Таяз радэ но, Володялэсь кылбуръёссэ печатламысь дугдэм интые, соосты мон уката но ӵемгес поттылыны ӧдъяй. Гонораръёс бен соку туж пичиесь на вал. Но мон сюлмыным валаны тырши: Володялы ведь али сокем ик гонорар но кулэ ӧвӧл, дыр, макем кулэ сюлмысьтыз потэм чуръёссэ калык, лыдӟись доры вуттыны луонлык. Сыӵе луонлыкъёсыз угось солэн та вакыт туж но туж пичиесь вал. Соин ик мон аслым кыл сетӥ: Володялэн лыдӟись доры потон каналэз милям пичи газетмы пыр ке но мед кылёз шуыса, ваньзэ лэсьтоно! Берло со мыным та понна уно пол сюлмысьтыз ик тау карылӥз. Бен, поэтэз со шимес вакытэ утён понна, мон но пичи ке но кужымме понӥ ик, дыр. Нош али тани, аръёс ортчем бере, мон та сярысь малпасько Но чылкак мукет йылпумъянэ вуисько. Мон Володялы ӧй —со ук мыным та учыр пыр юрттӥз адями луыны, улонэз мургес валаны, со сётӥз мыным асме эскерыны луонлык, турлы эшъёсыд пӧлысь зэмос эш луисьёссэ висъяны но соос понна сюлэм шуныттэ жалятэк сётыны быгатон сям. Ма бен, та ласянь ай мынам тырмымтэосы но трос гинэ на, вылды. Но зэмос эшъёсме ноку но ӧй «вузалля» на. Медам но «вуза» ноку. Со понна мон йыбырттыса ик тау карисько Владимир Васильевичлы. Сыӵе ини со вал адями — нокинэ ноку меӵак ӧз индылы, валантэм улсын кадь гинэ, улонысь яркыт примеръёс вылын возьматылӥз, кызьы кариськыса, ма лэсьтыса умойгес луысал сояз яке таяз учыре. Ӵапак озьы ик ужалляз со егит кылбурчиосын но, соос асьсэлэсь творчествозэс асьсэос ик азинтыны мед быгатозы шуыса. Ӧз, мултэс валэкъяськонъёсын ноку ӧз акылляськылы со, но кенешчиосызлэн сюлэмъёсазы тылгизьы кенжытыны туж но туж быгатэ вал. Соин ик, вылды, мон солэсь Алнаше вуылэмзэ чидатэк кадь возьмалляй. Ижын пумиськылонъёсмы но мон понна котьку шумпотымонэсь вал. Ай али ке но уг оскиськы, мон Володяен табере ноку но уг пумиськылы ни шуыса. Весь возьмасько на мон солэсь Алнаше лыктэмзэ, ӝотыр-ӝотыр, сюлэмез ик сётыса вераськемзэ. Таин валче ӵем гинэ тодам лыктылэ солэн мон дорын берпумзэ куноямез. 1989 арын тулыс вал со. Володя кыӵе ке муген кыкетӥ кышноезлэн вордскем гуртаз — My Чумолёе ветлэм, Иже бертыкуз ини Алнаше пырем. Уйзэ кӧлыны, котьку сямен ик, ми доры кариськиз. Та учырын бен номыр сокемез ӧвӧл кадь, угось Володя ми дорын азьвыл кӧня ке нуналъёсын но улылӥз ни вал. Тани вуим ӝытазе ми доры. Пукиськом, олома сярысь но вераськиськом. Но тани Володя шуак султэ но, мае ке тодаз вайыса сямен, ӧс доры каллен портфелез пала вамыштэ. Отысь со поттэ огшоры гинэ горд выло блокнот. Нош аслаз синъёсыз огшорыесь овол — кыче ке валантэм тылгизьыен шудо. «Тани мар шедьтӥ ай мон Чумолёысь,— огдыре ик данъяськыса но, шумпотыса но кадь вераз со.— Татчыозь ноку таӵезэ адзылэме ӧй в ал.» Блокнотсэ усьтыса, Володя валэктӥз: татчы, пе, мон гожъяй палусьтонэз — вашкала лымшор удмуртъёслэсь тунаськон арберизэс. Отын ик со та гожъямысьтыз кык-куинь абзацсэ шара лыдӟиз — возьматӥз, ма со сыӵе палусьтон. Тани Володя выль шедьтоссэ уж вылын эскероно кариськиз. Нырысь ик со усьтӥз палусьтонзэ мынам бадӟымезлы пиелы. Улоназ ӟеч сюрес сӥзиз солы горд выло блокнот. Умой улон вераз со азьланезлы мыным аслым но, семьяысьтым мукетъёсызлы адямиослы но. Тани черод вуиз аслыз Володялы тунаськыны. Со вераз нырысь шедем лыдпусэз, та лыдпуслы тупась гожтэмез шедьтӥз но лыдӟыны кутскиз. Но шуак гуньдэм выллем луиз со. Ог-кык секунд ӵоже вырӟылытэк пукиз, нош собере киыныз омырез вандыса кадь шоналтӥз но аслыз гинэ тупась манерен серектӥз. Серем улсын ик вераз со, палусьтон солы кулон сӥзе шуыса. Соку та учырлы ми огмы но нокыӵе ик ӧм кариське кадь — ма но уз вера блокнотэ гинэ гожъям огшоры маке! Выл-ласянь учкыса, Володя ачиз но ӧз воштӥськы. Но сюлмылэн кыӵе ке пыдлось сэрегеныз мон шӧдӥ ик, солэн пушказ маиз ке вырӟиз но таки ас интыяз уг пуксьы ни шуыса. Валай: Володя али юромо озьы ассэ шулдырен возьматыны тырше — оло милемлы мӧзмылэс мылкыд кельтонтэм, оло ассэ ачиз вормон понна... Сыӵе полэсо-полэсо мылкыдын ик кошкиз Володя ми дорысь. Берат со улон интыямы ӧз вуылы ни. Ма ми соин эшшо кӧня ке пол пумиськылӥм ик на ай — Ижын но, Алнашын но. Но дорам ы пыраса ӧз вутты ни огпол но. Уз но пыра ни ноку. Но сюлмысьтым со ноку уг кошкылы. Квартираысьтым гожъяськон сэрегам но, райгазетлэн редакциысьтыз ужан кабинетам но самой адскымон азе ошемын солэн туспуктэмез — учке Володь мон шоры, учке но шуэ кадь: ужа, кужымдэ эн жаля, поэзилы, озьы бере улонлы вань лул-сюлэмдэ сёт. Ӵемысь малпаськисько мон та туж матысь эшелэн дорам берпум вуылэмез сярысь. Но али ке но валаны уг быгатӥськы: я палусьтон сокем шонер вераз Володьлэсь ӵуказе нуналзэ, я ачиз улон озьы карыса куштӥз. Кин тодэ ини табере созэ. Но огзэ мон туж ӟеч тодӥсько: туж трос адямиос, мон сямен ик, Володь Романовез ас сюлэмъёсазы котьку улэпен возё. Озьы бере, кема улоз на со. Тӥни сыӵе шудо адями со — Инмар солы одӥг гинэ ӧвӧл, уно сюрс улонъёс сётэм бере! |
© irinaewdo |