Вадим Дементьев
"Узыды нош туж-а трос?"
Улӥллям-вылӥллям… Критической статьяосты тазьы уг мытыло, тазьы ӧръясько выжыкылъёс гинэ. Котьма ке но, мадёнме та кылъёсын кутскеме потэ. Нюлэсо шаерысь артэ гуртъёсын улӥллям-вылӥллям куинь эшъёс. Куиньназы ик яратӥллям жингырес кылэз, бурдо чурез. Кылбур, верос гожтон бордын кужымзэс эскериллям, мукет кылысь берыктыса но чаклаллям. Кутскиз секыт война. Эшъёс куиньназы ик кошкизы фронтэ. Аръёс ортчыса, вордскем палъёсазы берытскизы кыкез гинэ. Василий Романов пыраклы ож бусые кылиз. Нош кык эшъёсыз... яратоно ужзэс азьланьтӥзы, тодмо писательёс луизы. Удмурт прозаик Евгений Самсонов но чуваш кылбурчи Алексей Афанасьев трос книгаос поттӥзы ни. Туннэ соосын оградэ султӥз удмурт поэт Владимир Романов, эшсылэн-фронтовиклэн пиез, атайзэ огпол но адӟылымтэ адями.
Каргам война басьтӥз атаеным валче
Вордӥськымтэ сузэръёсме но вынъёсме.
Егит удмурт кылбурчилэсь нырысетӥ чуръёссэ лыдӟизы, солы визькенешен юрттӥзы атаезлэн эшъёсыз. Татысь ӟеч адӟиськом эшъяськонлэсь кужымзэ но, атайёслэсь ӝужась егит калык сярысь сюлмаськемзэс но.
Табере Владимир Романов — одӥгез аспӧртэмлыко удмурт поэт. Арысь аре будэ солэн быгатонлыкез, юнма куараез. Чаклано ке, В. Романовлэн поэтикаысьтыз шедьтомы Волга но Урал вискын улӥсь калыкъёслэн егит поэзизылэсь трос тодметъёссэ. Отысь ум шедьтэ кыӵе ке йӧспӧртэм амалъёсты, йырчукин пуктылонъёсты. Нош мар дуно та поэзилы? Сюлэм малпанъёсты дыртытэк, лад-лад кылан-буран. Адямилэсь сямзэ пичи гинэ тодмет пыр но усьтыны тыршон, калык крезьгурез шӧдон... Кылбуръёслэн улэп шунытсы но котькуд чурез ӝикыт, чебер гожтыны тыршон...
Кылбурчи пичи дырысеныз ик пӧртэм культураослэн сюрес вожысьтызы ошмес вуэз юыса будэмын. Со вордскиз Татариысь удмурто-чувашо гуртын. «Татчы, Бугульмалэсь лымшор палагес но Куйбышев городлэсь уйпалагес, кык даур талэсь азьло интыяськизы удмуртъёс, ӟучъёс, мордваос, чувашъёс но бигеръёс, — гожтэ критик Александр Шкляев, — Пӧртэм кылын вераськись но пӧртэм кырӟан гуръёсты яратӥсь адямиос агай-вынъёс сямен артэ уло, огъя праздникъёсы люкаськыло, ог-огзылэсь культуразэс но кылзэс узырмыто. Та улосысь потӥзы трос тодмо учёнойёс но писательёс».
Кылбурчилы нырысь вамышъёс лэсьтыкуз ик удалтӥз, шуыны луоз. В. Романовлы кизэ мычиз, бадӟым эшез луиз усто удмурт поэт Флор Васильев. Солэсь чылкыт но кужмо лирико-гражданственной куаразэ соку быдэс странаямы ӟеч тодо но ярато ни вал.
... Огнуналэ Володя Романовен чош ветлӥм Флор Ивановичлэн шайгу вылаз. Камдор шаеред лымыен узыр. Оло, кускозь гуштылыса, обелиск доры вуимы. Флор Васильев... Ижевске пырись сюрес вылын луэм шудтэм учыр дырызлэсь вазь уретӥз солэсь улонзэ. Нокызьы оскем уг поты, Флор Ивановичез уд адӟы ни, кизэ уд кырмы ни, сэзь но жингрес куаразэ уд кылы ни шуыса. Ми ӟеч тодӥм солэсь сюлэм шунытсэ, лякыт сямзэ, адями сярысь сюлмаськемзэ. Шӧдӥзы сое лыдӟисьёс но: солэсь куаразэ асьме странаысь трос сю поэтической куараос пӧлысь висъязы! Нош табере — литератураын кема йӧнасьтэм яра кылдӥз, нокин но уз вошты ни бадӟым, аспӧртэм поэтэз.
Соку мон паймыса пусйи тани мае: удмурт кылбурчиез ватэм инты — палэнысен нюлэс, паськыт бусы, матын ик гужлась шоссе но со вӧзтй вамышъясь корт электроюбоос — ваньмыз тодэ вайытӥз Николай Рубцовлэсь Вологда вӧзысь шайгузэ. Нош городэ берытскыса, Ф. Васильевлэсь огшоры, панельёслэсь ӝутэм юртсэ адӟеме бере, та кык талантъёслэн улонысьтызы тросэз — югытэз но, шудтэм учыре шедемзы но — артэ султӥзы кадь. Туала вакытэ ӵем дыръя ог-огзылы эгызоос кадь тупало улон юртъёсмы. Котьмае уго тросгес, ӝоггес но одӥг кабъягес лэсьтыны тыршиськом. Соин ик поэт, улонын огпол гинэ пумиськисьсэ, ноку сӥнӥсьтэмзэ но бездӥсьтэмзэ гажан мылкыд улӟытон понна, улоназ но, творчествояз но кышкасьтэм луыны кулэ. Та ужез быдэсъяз Николай Рубцовлэн но Флор Васильевлэн поэзизы.
Владимир Романов та сярысь малпаз-а, ӧз-а, но со нырысетӥ вамышъёсысеныз, трос егит кылбурчиос сямен ик, Флор Васильевлэн лирикаез вылын гожъяны дышетскиз.
Малы национальной поэзиын тазьы луэ: одӥг талант борды трос адямиос кыстӥсько? Та юанлы озьы гинэ валэктон уд сёты. Басьтомы куинь пӧртэм—бурят, Дагестан но удмурт—литератураосты. Котькудысьтыз соку ик висъялом азьветлӥсьёсты: Николай Дамдинов, Расул Гамзатов, Флор Васильев. Ваньзы соос азьвыл ӧрез муратэмен ӵош ялан выльдыны тыршо кылбур пуштросэз но солэсь вылтуссэ. Котькуд выль произведениязы выльзэ, тодмотэмзэ утчакузы, эскерыкузы, соос тодо: сюрессы — шонер, выль ӝужась калыкъёс, отӥ азьлань мыныса но мургес копаса, узыр ватосъёс шедьтозы. Николай Дамдинов бурят - поэзиын нырысьсэ кылдытӥз сонет тугоко. Нош рифма бурят кылбурын куамынэтӥ арын гинэ ай кылдӥз. Авар кылбурын рифмаос ӧвӧл, со азинске ас законъёсызъя. Но Расул Гамзатов, сонетъёс но элегиос кылдытыса, авар поэзия азьын выль инвисъёс усьтӥз. Выль сюресъёс лёгон сям ӟеч шӧдӥськиз Флор Васильевлэн творчествояз но. Солэсь аспӧртэмлыксэ умой шӧдӥз тодмо ӟуч поэт Сергей Орлов. Со пусйиз удмурт авторлэсь меӵак ялытэк но тачыртӥсь кылъёстэк, калык улонысь но сюлэмезлы матысь инкуазь суредъёс пыр, вордскем шаердэ гажан мылкыдэз возьматыны багатэмзэ. Нош самой со «гудыръясь» яке кӧсыт чуръёс трос аръёс ӵоже люкетӥзы национальной литератураослы азинскыны.
Адӟиськомы, азьветлӥсь кылбурчиос ог-огзылы матын луо: соос литератураоссылы ӵуказе нуналэ сюрес лёго. Тодмо мастеръёс сьӧры мыно егитъёс. Асьмеос соос пӧлысь троссэ ӟеч ум на тодӥське. Меӵак вералом: соос азьын секыт ужпум сылэ. Соослэн талантсы мӧйы писательёслэн шӧлказыгес азинске на. Егитъёс кулэ ни курдатэк выльзэ утчаны, асьсэ сюрессэс шедьтыны. Нош соос куддыр тодмозэ, соослэсь азьвыл шедьтэмзэ ик верало. Кужмо, егит талант гинэ мӧйыослэн яркыт творчествозы вӧзын уг ышы, уг безды, ас малпанъёссэ ачиз сямен вера.
Та аспӧртэмлык поэтъёслэн ас улонэнызы герӟаськемын. Нош мар отын синйылтымонэз? Тазьы учконо ке, номыр ик ӧвӧл кадь. Война аръёсы ортчем пичи дыр, секыт, сютэм аръёс, городэ дышетскыны кошкон... Собере адями шудо сюрессэ шедьтэ ни кадь: кылбур книга печатла, егит авторез писательёслэн Союзазы куто, собере — Москваын нырысетӥ сборник, выль книгаос... Адямилэн улоназ тужгес но яркыт интыез — гуртын улэм аръёсыз. Кылбурчиос соосты ик кырӟало. Сыче чуръёс кылдытӥз Владимир Романов но:
Ю-нянь ӝужа чурен-чурен,
Вожектыкуз ик шумпоттэ.
Адямилы арысь аре .
Улон понна кужым сётэ.
Нош тани мар син шоры йӧтэ: Флор Васильевлэн огьёзъёсыз вордскем гуртэнызы гердзэс «вӧсь луымон шӧдо». Соос понна та инты пыраклы матын но дуно. Улэм-вылэмзы сярысь мадёнзэс соос одно кутскозы вордскем интызы бордысен. Шуом, Флор Васильев: «Мынам Бердыш гуртэ...» Чаклалэ ай: нырысь ик вордскем гуртэдлы йыбыртты, собере ини ачид сярысь мадьы!
Егит поэтъёслэсь таӵе «вордскем карзэс» шергес пумитлом. Р. Гамзатов кырӟанзэ Цада аул бордысен, Ф. Васильев Бердыш гуртысен, В. Солоухин Олепино село бордысен мыто ке, егитъёс нимысьтыз ялан одӥг интыез данъяны но со пыр быдэс вордскем шаерез возьматыны уг ик тыршо. Шат соос гурт калыксы азьын кепырало? Яке вордскем интызэс уг ярато, сое тодазы но уг ваё? Ӧвӧл, соос сокем кепырасесь но, сюлэмтэмесь но ӧвӧл. Татын ужпум мукетгес. Егитъёс тыршо асьсэ азе паськыт суред кылдытыны, висё быдэс калыклэн культураез понна — вань сямъёс но йылолъёс, вань кырӟанъёс но эктонъёс, вань крезьгуръёс но выжыкылъёс понна. Соос ӟеч шӧдо: улон одӥг гуртын я аулын гинэ уг воштӥськы, воштӥське быдэс калыклэн, вань аулъёслэн,, гуртъёс-лэн улон-вылонзы. Соин ик Владимир Романов улон сюресэз сярысь веранзэ тазьыгес кутскысал, дыр: «Вордски мон нюлэсо шаерын...»
Нош тазьы ваньзэ адӟыны, вераны тыршон егит поэтъёслэсь кырӟанъёссэс кӧсытгес но бездытгес уг кары-а? Аспӧртэм, кужмо егит кылбурчиослэсь — уг. Шат алтаецлэн Бронтой Бедюровлэн, бигерлэн Равиль Файзуллинлэн, адыгеецлэн Нальбийлэн поэзиысьтызы асьмеос ум адӟиське вордскем музъемзэс? Нош куд-ог егитъёс кыӵе ке литературной суред, амал борды думисько но асьсэлэсь сюрессэс уг ни утчало. Озьы кылдо выль Рубцовъёс, Васильевъёс, Дамдиновъёс. Чуръёссы но улэп кадь, суредъёс но тодмо, нош асьсэ куаразы ӧвӧл, мурт гурез кырӟало.
Сыӵе сюрес вылэ кожыны быгатысал Владимир Романов но. Солэн гожъяськоназ Флор Васильевлэн поэтикаеныз огъяез трос. Мылкыдыз эркын ӧръяське, дунне шоры шуныт учке, котьмае пӧртэм тодметъёс пыр возьматэ, капчи быдэстэм суредын сюлэмзэ усьтыны быгатэ. Тани таӵе чуръёс:
Пичи ныл, пичи ныл Кам шурын пылаське,
Шундые зымылэ, шундыен пазяське.
Уйылэ но веша ерпечка тулкымез.
Тӧдьы Кам мусоя, нуныя нылашез.
Асьмеос син азе пуктыны быгатомы шунды шорын кисьтаськись, чильпырась шурез, шулдыр пыласькись нылашез, шӧдомы тулкымлэсь мускыт шокчемзэ. Нош та куара укыр матын ӧвӧл-а Флор Васильевлэн кылбуръёсызлы? Со но сэзь кылдытылэ вал чебер суредъёс, шонергес ке верано, усьтэ вал мылкыдзэ:
Кышномурт ву нуэ.
Някырскемын музозь ик карнанэз.
Ведраосаз уг вырӟылы вуэз,
Ачиз нош со сюсьтыл кадь веськырес.
Соку ик шӧдомы юзмыт, жингрес омырез, югыт яратонлэсь матэктӥсь вамышъёссэ. Малы меда? Таиз ини поэзилэн лушкем кылыз. Лирик Флор Васильев пумозяз ӧз вера, куд-огез сямен «выводъёс ӧз лэсьты», нош сюлэмамы шуныт мылкыд пальккиз, малпаськон кенжытӥз.
Удмурт лыдӟись мыным вералоз, дыр: «Кышномурт ву нуэ» кылбур «Пичи ныл но Тӧдьы Камлэсь» берлогес гожтэмын но потэмын ук. Соку кинлэсь кин дышетскиз?.. Ваньмыз шонер, нош мынам вераме потэ та кык крезьгуръёслэн ог-огзылы матын луэмзы сярысь. Флор Васильевлэн куараез кемалась юнмаз, нош Владимир Романов, мынам чакламея, та ӧрын берлогес ужаны кутскиз.
Иське, ма бордын егит кылбурчилэн аспӧртэмлыкез, маин со азьланьтыны но азинтыны быгатоз удмурт поэзиез? Владимир Романовлэн «аслазэз» нырысетӥ кылбуръёсысеныз ик шӧдйськиз. Флор Васильев, ӝог валаны быгатӥсь но ӟеч сюлэмо адями, сое соку ик шӧдӥз.
Егит эшезлэсь кылбуръёссэ «Литературная Россия» еженедельниклэн лыдӟисьёсызлы ӵектыса, со гожтӥз: «Владимир Романов удмурт поэзие сюрес ӝог но ӝот-ӝот лёгиз. Солэн кылбуръёсаз гожъяны кутскисьёслэн висёнзы — дӥсьтонтэм сям — ӧз ик шӧдӥськы. Вл. Романов гожъя удмурт шаерез, музъем ужасьёс сярысь, кырӟа калыкъёслэсь эшъяськонзэс... Пусъеме потэ Вл. Романовлэн умой кылбуръёсызлэсь ушъямон тодметсэс но — соослэсь психологизмзэс. Поэт быгатэ синйылтыны, собере — усьтыны адямилэсь сюлэм малпанъёссэ. Вл. Романовлэн куараез — кужмо но аспӧртэм». Та кылъёсын учырлы тупатэм ушъян-веран ӧвӧл. Ф.. Васильев егит кылбурчилэсь азьлане сюрессэ но пусйиз, солэсь аспӧртэм тодметъёссэ но висъяз.
Владимир Романовлэн поэзияз одӥгез валтӥсь тема — сюрес. Калыклэн азьлане вамышъёсаз, поэтлэн но солэн геройёсызлэн утчанъёсазы усьтӥсько выль тодмотэм инвожъёс... «Мон пыдын яке валэн нош пото сюрес вылэ...», «Кузь сюрес вылэ басьто мон пужъятэм удмурт ӵушкон...», «Нош тани пиез кошкоз но, катьтэммоз анай, пуксёз...», «Сюресъёс но вольыт, кезьытлэсь но уг кышкаськы...» Нош кытӥ берытсконын шуак суред вылын кадь пуксёзы луд, шур, тэль но инбам, яке адскозы анай синвуос. Сюрес вылын ик валалод, кызьы «эшъёсыд витьыса жадиллям», «син азяд гуртэд пуксёз, сяськаясь чагыр етӥн но вож нюлэс тодад лыктоз». Нош азьлане нуись сюрес ялан дыртытэ, дугдыны уг лэзьы. Та мылкыдэз В. Романов удмурт поэзиын ас сяменыз, туала адямилэн синъёсыныз учкыса суреда:
Ток ӵуказе шедьтод-а дыр! —
Кыкнаместы вите ни кыр,
Вите ни кыр, вите нюлэс,
Вите ни удалтэм палэзь...
Яркыт тылын, ческыт тылын
Гомӟылэмын палэзьпуос.
Кӧлись тэле лыктэмъёслы
Ӟускиоссэс мычо соос.
Тон ӟыгырты палэзьпуэз.
Тон веръя емышсэ солэсь —
Сюлмыд но шулдыргес луоз,
Бамад ӵыжыт но пыӵалоз.
Кошкыкумы каллен гинэ
Палэзьпумы вайзэ выртоз.
Пизэ келясь нылмурт сямен.
Горд кышетэн со шоналоз.
Оло, сюрес ик кылбурчиез лэчыт синмогес луыны, ваньзэ шӧдыны, адӟыны дышетэ. Соин со сакгес учке вордскем палъёсыз, вордскем музъемез шоры но.
Поэтлэн книгаысьтыз нырысь ик висъяломы вордскем музъем но со доры вуттӥсь сюрес сярысь кылбуръёсты. Со котькуд турын-куарез адӟе но соослы шуныт кылъёс сӥзе: «Куакагырлы... шудо гурзэ шудэ», «Нюлэс саюлын вожектэ сарана», «Дуринчитурын, дуринчитурын туж востэм будэ сюресъёс дурын», «Жингыртэ берпуметӥ лымыгырлы — ӝож гурез быдэс дунне тыр шуккиське».
Владимир Романовлэн кылбуръёсызлэсь романтической, ӝутскем мылкыдзэ пусйиз литературовед Зоя Богомолова. Солэн чуръёсаз инкуазь улэп но валамон, инкуазьлэн но адямилэн сюлмаськонъёссы ог-огзылы матынэсь. Тани кылбурлэн героез «тӧри валэз сямен веша Вало шурез», «тӧдьы изнэсъёсты музэн туга тулкымъёссэ солэсь». Тол Вало шурез йӧ капка сьӧры пытсаз ке но, адями тодэ: «Кыӵе пытсэт сайкась кужымъёсты возёз!» Оске: тулыс «сэзъялтӥськоз Вало шуред — пазьгиськозы йӧ шелепъёс». Озьы Вало но вал кылъёс вылын бурдъям метафора бадӟым малпанэ вуттэ. Эркын но выль сямен, «гудыръясь» куара поттытэк но мур малпаськыса гожъя Владимир Романов.
Эн малпалэ, В. Романовлэн поэзияз гражданственной пафосэз, комсомольской ӟырдытэз ӧвӧл шуыса. Огез кылбур ӧте «будёновкамес, шашкамес, ож пыр потэм погонъёсмес» музее сётыны. Магниткаысь кирка вӧзын инты шедёз выльвылысь культолы. Дано сюрес сярысь вералозы орденъёс но кырӟанъёс. «Ӟырдыт сюлэмъёсмес гинэ ум сётэ музее», — веранзэ йылпумъя поэт, — малы ке шуоно: «ми подвиг лэсьтыны дасесь туннэ но ӵуказе!» Оло, та кылбурын азьвыл ик малпаса гожтэмез шӧдӥське, но пӧртэм аръёсысь комсомолецъёс куспын юн гердъёс сярысь поэт шонер но ас сяменыз вераны быгатэм.
Владимир Романовлы удалтэ, кылбур зэмос учыръёс но вордскем шаерлэн тодметъёсыз вылын ӝужа ке. Тани гурт сьӧрысь вырез Горд окопъёс шуо. Граждан ож вакытэ татысь ӧз чигналэ но вормизы гордармеецъёс. Калыклэн шудэз но эрикез понна лэсьтэм подвиг уг вуны. «Туннэ но улыны но вормыны горд флаг сямен ӧтё, юртто Горд окопъёс». Армиысь бертыса, поэт кылдытӥз усто кылбур— «Штык». Капчи кутске со: «Вань штыкез автоматлэн. Нош малы-о со кулэ?» Собере асьмеос тодӥськом, кызьы штыкез ожын но, разведкаын но номырин воштыны уг лу. Но солдат улон понна ожмаське. Соин ик —Нюлэскын шулан гумы но
Со штыкен ик чогисько.
Жингыртӥсь чипчирганме но
Штыкеным ик лэсьӥтсько.
Автор малпанъёссэ меӵак вераны уг тыршы, аслэсьтыз мылкыдзэ шӧдскытэ пӧртэм суредъёс, ӵошатонъёс, тодметъёс пыр. Соин ик солэсь произведениоссэ ӟуч кылэ берыктыку, котькуд кылзэ но чурзэ сак чаклано луэ.
Одӥг кылысь мукет кылэ берыктон капчи уж ӧвӧл. Куддыр ӟуч берыктӥсьёс, оригиналэз мур валаны сюлмаськытэк, асьсэлэсь чуръёссэс, образъёссэс ватсало. Та учыре берыктэм кылбур коть устогес мед пӧрмоз, коть лябгес, но со авторлэсь зэмос ымнырзэ, кужымзэ, сямзэ уг возьматы ни.
Куддыр переводчик поэтэн кемалы эшъяське, ӟеч тодэ солэсь дорзэ, калыкезлэоь сямъёссэ. Тросэз берыкто мукет кылын гожъясь тодмо кылбурчиослэсь произведениоссэс гинэ, ӵем дыръя поэтлэн вордскем палъёсаз уг но возьматскыло. Кыӵе усто луысал, берыктыны кутскись адями авторлэсь малпанзэ гинэ ӧвӧл, кылбурлэсь крезьгурзэ, жингыртэмзэ но ӟеч тодысал-валасал ке. Нош таӵе шудо учыръёс шер пумськыло на.
Владимир Романовен нырысьсэ пумиськыку ик, вераськон-кенешон потӥз кылбур берыктон сярысь. «Литературная Россия» еженедельникын поттыны вылысь берыктэм кылбуръёсыз солы ӧз яралэ. Та сярысь со меӵак вераз. Пусъеме потэ, та берыктэмъёс поэтлэн бӧрысьгес ӟуч кылын потэм чуръёсызлэсь сокем лябесь но ӧй вал. Но соку ӟеч шӧдӥськиз поэтлэн кылбуръёссэ ӟуч кылын но усто, жингрес карыны тыршемез. Та сярысь шонер пусъе Александр Шкляев: «Солэсь аспӧртэм национальной творчествозэ мукет кылын но яркыт возьматыны капчи ӧвӧл».
Романовлэн творчествоеныз тодматскыку, мыным удалтӥз шуыны луоз. Солэн ӟуч кылын потэм «Поляна» но «Поющий узор» книгаосыныз ӵош мон кие шедизы подстрочникъёсыз. Удмурт лыдӟись соостэк но ӵошатыны-дунъяны быгатоз, но мыным та чурысь чуре берыктэмъёс ӟеч юрттӥзы.
«Поляна» книгаез быдэссэ сямен берыктӥз Ленинградын улӥсь тодмо ӟуч поэт Глеб Пагирев. Удмурт но мукет угро-финн авторъёслэсь кылбуръёссэс ӟуч кылэ берыктон бордын со трос аръёс ӵоже ужа ни. Оглом верано ке, Глеб Пагиревен берыктэмъёсаз кылыз но чебер, малпанэз но шонер, пичи детальёс но чакламын. Нош куддыр переводчиклэн янгышъёсыз син шоры йӧто ик. Ӟуч кылын кылбур тазьы кутскемын:
Есть в лесу за деревней поляна.
Приходи сюда утречком рано.
Тут растет неухоженно, дико,
Рдеет алым ковром земляника.
Нош тани кызьы удмурт сямен:
Горд кышет ук, горд кышет —
Тэль шорысь бадӟым кушед.
Малы мыным узырлык! —
Медло таче узылык.
Соку ик шодӥське удмурт шӧмыз: поэт узыё нюлэс кушез горд кышетэн ӵошатэ. Та ӵошатон малпамын ӧвӧл — озьы вераське калык. Пичи гинэ образэз воштыса но, тросэз ыше. Таӵе ыштон тужгес но вӧсь луымон шодӥське Владимир Романовлэн поэзияз: отын детальёслэн, тодметъёслэн ӧжыт гинэ воштӥськемзы но кылбурлэсь крезьгурзэ но малпанзэ мукет ӧре вутто.
Басьтом «Гожтэт» кылбурез. Сое берыктӥзы Сергей Поликарпов но, Глеб Пагирев но. Удалтэмынгес нырысетӥ берыктӥсьлэн ужез. С. Поликарпов кылбурлэсь мӧзмон гурзэ ӟеч шӧдэм но городэ кошкем яратонзэ чик дугдытэк малпась адямиез возьматыны быгатэм. Нош Г. Пагирев
Мозмемме отын уг вера,
Витемме отын уг мадь.
Мон шуо: «Вуиз намер но,
Вож узы но горд кисьмаз...» —
чуръёсты тазьы берыктэм:
Не скажу,
Что мне грустно сейчас,
Не обмолвлюсь и словом, что жду.
Напишу: «Костяники у нас!
Земляники! Малины в саду!»
Та сэзь, йыгмыт чуръёсын ышемын лирической геройлэн лушкем малпанэз (оло, узы кисьмам сярысь тодӥз ке, яратонэз зэмзэ ик бертоз?). Ыштэмын кылбурлэн небыт крезьгурез но.
В. Романовлэн кылбурысьтыз пичи гинэ гожез лыдэ басьтымтэеныз янгышам О. Поскребышев но. Удмурт поэт кыла-бура:
Дорам лыктӥсь эшъёс понна
Сюрес тазатӥсько.
Капкаосме, удмурт сямъя,
Мон вӧлак усьтӥсько.
В. Романов одно пусъе калык сям воземзэ. Ачиз сярысь вераса, со калыкезлэсь но сюлэмзэ усьтэ. Нош берыктэм кылбурын лирической герой ас калыкезлэсь чылкак висъямын:
Но для друзей, ко мне идущих,
Я ветки в снег воткну,
Расчищу путь и, словно душу,
Ворота распахну.
Нош пумыз тыпак ӟуч сямен верамын: «душа нараспашку».. Та ньыльчурын «чыры-пырыез» гинэ ыштэмын кадь, но воштӥськизы кылбурлэн пуштросэз но, психологической детальёс но.
Пусъем потэ Глеб Пагиревлэсь удалтэм ужъёссэ но — со ӟуч кылэ усто берыктӥз Владимир Романовлэсь «Кылъёс», «Песятай», «Пуксид ке тон атай пельпум вылэ...», «Поездъёс, адямиос кадь...», «Нянь» кылбуръёссэ но тужгес но «Нюлэс, нюлэс...» сонет тугокозэ.
Нимысьтыз вераме потэ «Кырӟась пужыос» кылбур сярысь. Соя нимамын поэтлэн Москваын потэм нырысетӥ книгаез. Мыным тужгес но яра А. Медведевлэн берыктэмез. Ньыльчуръёсты со витьчуръем строфаосын берыктэ ке но, поэтлэсь малпанзэ но мылкыдзэ шонер возьматэ. Адями сюлэмлэн шырытэз, улонын чеберзэ, чылкытсэ гинэ лэсьтыны тыршон, вордскем музъемен данъяськон пыӵамын та чуръёсы:
Дышетскы пужыятскыны, нылаш!
Мед кырзалозы буёлъёсыд,
Мед пазьгиськозы шыркунъёсыд
Мумидлэн кузьмам кышет вылаз.
Кылбурчи вера: «Валаны тон тыршы киужлэсь вуныны кутскем лушкем, кылзэ». А. Медведев кылбурлэсь «лушкем кылзэ», улэп чеберзэ ӟеч валам. Нош поэзиын чеберез утёно, сюлмаськыса будэтоно, чылкыт возёно.
Флор Васильев бырем бере, куд-ог талантъёс шуак ӟудэм кадь луизы: табере ма кароно? кытчы мыноно?.. Кыӵе сюрес быръёз Владимир Романов? Шедьтоз-а со, эшез сямен ик, аслэсьтыз паськыт сюрессэ?
