Михаил Федотов

"Кытын вордӥське шунды?"

Владимир Романовлэн аслаз дасям берпуметӥ книгаез... Али сое киям кутӥсько но, тулкымъяськыса сямен тодэ лыкто «Удмур­тия» издательствоын автореныз ӵош потоно книгаез бордын пукылэмъёс, кенешонъёс но вераськонъёс.

Ноку но ӧй малпалля вал, та чуръёсме, сюлэм малпанъёсме кылбурчилэн кулэмез бере ини верало шуыса. Ми дышимы вал соин котьку но ваче син, сопала-тапала кожылытэк кенешыны. Мынэсьтым куараме автор табере уз кылы ни, но ас поннам шӧдӥсько: со сярысь верам та кылъёсы, оло, сое тодӥсь, гажась но яратӥсь лыдӟисьёсызлэн сюлэмъёсазы пичи ке но шуккиськозы...

1988 арын пӧсьтолэзь-куарусён толэзьёсы Владимир Васильевич ужаз ми дорын — «Удмуртия» издательствоын. Отчыозь со эркын писатель вал, дораз гожъяськыса пукиз. Та аръёсы сюлмыз чигиськыса шуылӥз куддыр: «Секыт ик та удмурт кылбурчилэн ымтыр нянез». Издательствое сое мырдэм-мырдэм кутӥзы, сюлворон кыл бӧрсьы сюлворон кыл верам бере гинэ. Нош кутэмзы бере, чеберлыко но нылпи литературая редактор луэмез бере, ужез борды урткыӵ сямен ӝог но юн кырмиськиз. Нунал куспын арня ӵожелы мында ужез бергатэ вал, ява.

Ӵапак соку, 1988 арын, потӥз Владимир Романовлэн «Йырберыктон турын» выль кылбур книгаез.

Кин тодэ, оло, та вакытэ ик кемдиз солэн выльысь «вордӥськон» арез но. Бурдъяськиз со, синъёсаз выльысь улӟизы ӟечезлы оскон тылсиос.

Тини та дыре ик кылдӥз солэн нылпиослы сӥзем «Чебер мако бакчае» книгаез. Потэмезлэсь азьло со трослы бадӟымгес вал, узыргес но, буёлъесызъя ворпояськисьгес но. Нош издательстволэн гожъёсыз-мерттэтъёсыз озьы тупатэмын: вылӥегес нокызьы но уд тэтчы. Рукописез вакчиятоно, отысь кылбуръёсты выльысь солань-талань карылыса сӧзнано луиз. Книгалэсь кызьы радъяськемзэ мон авторезлы «Дась лу!»-э но жингыртыса ивортӥ (соку со ужа вал ини та редакциын), шуи: ветлы ай, пӧй, «нылпиосыд» бакчаяд уг тэро кадь. Ӝыны нунал ми артэ пукимы дасяно книгаез бордын. Та книгаяз сюрымтэ кылбуръёсеэ Владимир Васильевич огазе люказ-мараз но шорам кескич пальпотыса шуиз: «Кык кечез кутӥм асьмеос, Миша. Таиз рукописе, иське, вуоно книгаелы мед яралоз». Солэн котьку манерыз-сямыз сыӵе вал: вераз ке, пумитаз солэсь йӧнозэ вepaны ымыд уз усьтӥськы ни.

Художник сярысь но Владимир Васильевич ачиз ик сюлмаськиз. Книгазэ, шуиз, мед суредалоз Леонид Прозоров. Ог-огмес ми, пе, школа дырысен тодӥськомы нн.   Туж тыршыса ужаз Леонид Прозоров. Соиз жаль: авторезлы ӧз кылды ӵош быдэ вуттэм книгазылэсь кыӵе вордӥськемзэ адӟыны. Нош солэн аслаз лулыз, сюлэм пушказ куке но воректыса кылдэм тылсиосыз отчы весяк ӵоже улыны кылизы.

Со книга табере тани асьме азьын. Ойдолэ пыраломе удмурт (удмурт гинэ-а бен!) нылпиослэн яратоно кылбурчизылэн но эшсылэн «чебер мако бакчаяз». Map выльзэ, тунсыкозз но паймымонзэ отын будэтэм ме­да со?

Владимир Романов та дунне вылысь вӧсь карисьсэ, лексэ лулыныз-сюлэменыз шӧдись но валась адями вал. Улон шоры со котьку сайкыт учкылӥз. Со бордын ик, оло, солэн творчествоезлэн лыдӟисьёсты ас бордаз кыскись кужымез но. Котькытын котьмалэн луыны кулэ аслаз эсэпез, шорсюлэмыз. Сотэк ваньмыз солань-талань гылӟыса куашка. Кылбур пушкысь чылкыт омыр но инкуазь сямен ик пожаське но кырсёме. Владимир Романовлэн котькуд кыл чурез зэмзэ ик воземын кадь югыт-шуныт шунды шорын. Быдэс книгазэ поэт юнме шорысь уг мыты «Куинь  шундыос»   нимо   кылбуреныз:

Кытын вордӥське шунды?

Мон кылӥ одӥг гуртын:

Со вордске паськыт лудын.

Со ӝужа зарни сиен,

Со кисьма зарни тысен.

Александр Шкляевлэн куспамы вераськыкумы верам кылъёсыз тани тодэ лыкто. «Владимир Романовлэсь быдэс творчествозэ, одӥг кылбурзэ но куштытэк, поттыны луоно», — шуиз со. Кышкатэк верамын. Туж шо­нер! Дышоно вылэм озьы гожъяськыны: мыноно сюрес вылысьтыд нокыче выль тулкым тонэ медаз вормы вылэм солань-талань шоналтыны но, погыртыны но.

Зэмзэ ик, «Чебер мако бакчаысь» котькуд кылбур куриське перо йылэ. Но вакчи гожтэмын ваньзэ уд вера. Пусъё кудзэ-огзэ гинэ. Map карод, пусъемелэсь азьло тани нош ик тодэ лыктэ ачиз автор, син азе пуксё солэн сямъёсыз но выросъёсыз. Со котьку буйгасьтэм мылкыдо вал (юскиськылон дыръёсыз но кытӥ-отӥ луыло вал ке но, вылды). Выльзэ утчаны но шедьтыны тыршыса улӥз со, ваньзэ малпам ужъёссэ жог но зеч лэсьтыны сюлмаськыса. Милемлы — егитъёслы — но та мылкыдзэ пычатыны вуттӥз. «Лэсьтонозэ, — шуылӥз, — туннэ ик лэсьтэ, ӵуказе бер луоз, оло». Солэн та малпанэз мур пыӵамын выль книгаысьтыз «Тубисько, тубисько...» кылбураз:

Мои тубисько ӝужыт кызэ

Лыз пилемъёс доры.

Ӵужапие азьчиньызэ

Сэзъя ни мон шоры.

Солы йырме мон шонасько,

Ачим нош

Ялан тубисько.

То кылбурысьтыз героез сярысь но Влади­мир Романов ачиз сярысь сямен вера. Кылдытэм образэз но соин ик, лэся, пичи пиналлы туж оскымон но туж матын пӧрме. Нош пиналлэн — лыдӟисьлэн — оскемез поэт понна дунолэсь но дуно. Таӵе мылкыд кылдэ ке, авторез ассэ вунэтӥськод но амалтэк мыныны кутскиськод кадь произведениысь образ бӧрсьы:

Тӥ мон понна эн кышкалэ -

Мон вылэгес тубо на.

Тӥ мон понна эн кышкалэ -

Соку уг курда мон но!

Тӥни озьы: пичиен-пичиен, эсэпен-эсэпен кылдэ но юнма кылбурысь образлы, солэн малпанъёсызлы, мылкыдызлы оскон. Индылытэк индылыны, визьлы дышетыны быгатон — со ини зэмос-зэмос мастерство.

Верай вал ини: лыдӟисьёссэ автор нырысетӥ чуръёсыныз ик ини оскытыны амал шедь­тэ. Кызьы со шедьтэ? Нылпиосты угось со ачиз но мурт уг кары, соослы со юн оске, соосты со ас мылкыдъёссылэсь вылӥегес ӝутскыны юрттэ.

Тодӥсько на 1989 арын кионсюан толэзе Владнмир Романовен Яр районысь Дизьмино. Лековай, Укан школаосы ветлэммес. Пумиськонъёсмы сӥземын зал Флор Васильевлы сӥзем лыдӟонъёслы. Соку Владимир Василь­евич лыдӟиз «Чебер мако бакчае» книгаяз пыртоно «Урокын», «Нимтэм», «Жугиськись» кылбуръёссэ. Азьло вуылэмез ӧй вал ке но, татысь пиналъёсын со кемалась тодмоосыныз сямен вераськиз, шуныт пальпотыса, маскара учыръёс сярысь мадьыса, со дыре ик туж кулэез сярысь вераса. Дышетскисьёс нош макем сак кылзӥзы сое! Шуом, «Урокын» кылбурысь таӵе чурьёсты:

Малы ай та ерпечка

Вень йылын сямен берга!

Оло нош, та пуксеттэм

Вунэтэм,

Кытын ошемын доска!..

Та вить чуръёс бере класс быдэсак гурак! серектӥз. Пиналъёс ваньзы ог-огзы шоры учкылыны кутскизы но одӥг пияш вылэ синъёссы дугдӥзы. Малы? Сямызъя со пияш кылбурысь ерпечка выллем вылэм уго. Пи­налъёс кылбурысь героез асьсэ пӧлысь адямиен малпамтэ шорысь, шуак  валчеяллям.

Кытӥяз мон азе таӵе юан но кылдылэ: арлыдоослы гожьясь лирик-а яке нылпи кылбурчи-а вал Владимир Романов? Зэмзэ ик нылпиослы со поттӥз вить книга, арлыдоослы — куинь книга гинэ. Мон понна али соиз гинэ туж валамон: нылпиос понна но арлыдоос понна но со зэмос-зэмос кылбурчи вал. Мынам малпамея, удмурт поэзия кема мӧзмыса улоз на ай сыӵе огшоры, эркын шоканлэсь но син сузёнтэм вылӥетӥ лобанлэсь.

Рецензиез таӵе тодэ ваёнъёсын но малпаськонъёсын огазеяса гожъяны уггес яра, дыр, но — озьытэк нокызьы уг луы. Бен, татын вераны кулэ ик вылэм, вылды, выль книгалэн тырмымтэосыз сярысь но. Вань, дыр, отын соос. Лыдӟыку кылэз но канжаськытыло, ӵогӟытыло, дыр, соос. Ачиз но одӥг статьяяз Владимир Васильевич шуиз вал: «Поэзиын чыры-пырыос ӧвӧл». Мон верасько выль книгаен    герӟаськыса    кылдэм    куд-ог малпанъёсме гинэ. Соос авторлэсь бepпум ужзэ умойгес валаны но дунъяны   юрттозы, оло,  шуыса гинэ.

Кинлы кызьы, дыр, но, кылбур сборникъёсты мон дыртытэк лыдӟыны дышемын, дугдылыса-дугдылыса, малпаськыса-малпаськыса, ошмес вуэз гучыкен-гучыкен юэм сямен.

Тани   асьмеос   вуимы     зскероно    книгаысь «Чебер мако бакчае» поэма вылэ. Куать люкето карыса гожтэмын со.    Ачиз автор сое нимаз книгаен поттыны чакла вал. Нош лыдӟись кие вуиз та книгалэн одӥг люкетэз луыса.    Поэмазэ кылбурчи     гожтэм аслаз яратоно манереныз  ик,    герой интые ассэ пуктыса. Та бакча — быдэсакез    аслаз.   Отысь  ваньмыз   мерттэмын-будэтэмын   солэн эркияны быгатӥсь киосыныз.  Векчи турын   нюжа гинэ но палэнэ кылемын ӧвӧл солэн сэзь но лэчыт синъёсызлэсь. Турын-куарез, сяськаосты, писпуосты тодэмезъя Владимир Романовез В. В.  Туганаев профессорен оградэ пуктыны но луысалыз, оло.    Возь вылтӥ Владимир Васильевичен ортчыны кайгулэсь но кайгу луэ вал. Со дугдытоз но юалоз вал, coиз яке таиз турын яке куар кызьы шуиське удмурт сямен, малы но малы со яра,   ӧд ке тоды — тодад вай но вера ӟуч кылын. Соин ӵош таӵе вераськонъёс со дыре ик кыӵе ке аспӧртэм университет выллем но луылӥзы!

«Чебер мако бакчае» поэмаяз Владимир Романов асьме азе дурыныз кисьтӥз инкуазь дунне сярысь тодонъёссэ, ваньзэ ас сюлэмыз пыр поттыса, поэт мылкыдын ворекъятыса, ӵукна усем лысвуэз сузен-сузен удылыса кадь. Та поэмалэн нырысетӥ чуръёсаз ик ини  со  шедьтэ  самой-самой  кулэ кылъёсты:

Вазь тулыс ик со ӝужа,

Учкиськод ке - жаг но жаг.

Ӵужанай шуэ:

 - Пие,

Тон эн обидьы сое.

Будонзэ ай со мытэ,

Бӧрысьгес со паймытэ...

Нош кыкетӥ люкетаз автор шуэ ини:

Мак кизем убо вылын

Выжыкыл ук вордӥськем.

Котькуд мак сяська вылын

Вуюись ӝуа тылын!

Отӥяз поэмалэн героезлэсь — лемлет маклэсь — эшшо одӥг аспӧртэм сямзэ тодытэ на: со дырез возьматыны но быгатэ:

Час куате мынэ ни ке,

Мак сяська но усьтӥське.

Нош бер ӝыт,

Укмыс часын,

Сяськаез ни ворсамын...

Тани пумаз вуэ ни гужем. Мак сяська бурдъёс толӟо, векчи ньӧръёс йылэ пурысесь йыръёс гинэ кылё на. Соин ик йылпумъяське но поэма тазьы:

Нош котьма ке но,

Макед -

Зэм но,

Паймытись маке!

Кылбур книгалэн пумаз — бигер (Р. Минуллин), ӟуч (Е. Фейерабенд), коми (В. Климов) кылъёсысь берыктэм кылбуръес.

Книгалэн берпуметӥ бамез ворсаськиз, отысь кылбуръёс но поэма сюлэмысь но йырсазьысь уг толӟо, ас чеберенызы соос лулэз но мылкыдэз шумпоттыто. Син азьысь уг ышо  Леонид  Прозоровлэн    суредъёсыз   но.