«Дась лу!» газетысь: Редакцилэсь. Авторез та гожтэтсэ газетэ печатланы лэзьымтэ вылэм. Нош ми, редакциын ужасьёс малпамы, та чуръёс лыдӟисьёсмылэн. но сюлэмъёсазы пыӵалозы шуыса. Нош авторез оскиськом, со понна вожзэ уз потты.
Вераськем потыны кутскиз
Ноку но ӧй гожъя на вал газетады. Нош «Дась лу!»-лэсь 15-тӥ сентябре потэм номерезлэсь 2-тӥ но 3-тӥ бамъёссэ лыдӟем берам, возьдаськон сямме вормоно луи: лыдӟем сярысь малпанъёсын соку ик кинэн ке но вераськем потыны кутскиз.
Владимир Васильевич Романов... Возьыт, туж возьыт со сярысь ичи тодэме. Малы меда улонысь кошкемезлэсь азьло ӧз кылдылы пумиськыны, кылзыны, кызьы со аслэсьтыз кылбуръёссэ лыдӟе. Одӥгзэ, мукетсэ тодэ-ваёнъёсты лыдӟыса, та адями сюлме мургес но мургес пыре, яркытгес адӟиське солэн калык пӧлын, калык понна улэмез. Газетысь сак лыдӟи ваньзэ берло аре гожтэм чуръёссэ — сюлэм лычсузе, Уката ик таӵе чуръёслэсь:
Вылез кивалтӥсь ке уг тоды нимдэ,
Ярам коть уг сура, уг пожа ужез.
Вылез кивалтӥсь ке ужлы люкетэ,
Соиз – чидантэм уродгес…
…Кырсьсэ адӟыса ватӥськом ке синмес,
Соиз вот — мыным но, тыныд но — урод!
Нош кыӵе син азе пуксьымон возьматэмын тырмостэм адямилэн сямыз, выросэз «Нырысетӥ губи» кылбураз!
Инкуазьлэсь узырзэ, пайдазэ, сое дунъян, утён мылкыдын (сыӵе мылкыд лыдӟисьёслы но одно ик пыӵалоз кадь потэ) гожтэмын Владимир Васильевичлэн инкуазь будосъёслэсь дасям чай сярысь вакчи но крезьгур кадь жингрес кылбурез. Та чуръёс асьсэос йырвизьме курисько.
...Эшшо но эшшо лыдӟем потэ на кылбурчи сярысь но солэсь кылбуръёссэ. Туж жаль, куке улонысь витьымтэ шорысь кошке сыӵе бадӟым сюлэмо адями, кудӥз трос умойзэ лэсьтӥз, эшшо но трос лэсьтыны малпа на вал. Улонысь кошкиз, нош уноезлэн сюлэмъёсазы кылиз. Кӧнязэ шонер сюрес вылэ пуктыны вуиз, дыр, кӧняезлы сюлэмазы кылбурчилэсь, тыршисьлэсь тылгизьызэ кенжытыса кельтӥз. В. В. Романовлэн улэм но ужам сюресэныз вакчияк гинэ но тодматскыса, золгес оскиськод визьмо калыклэн та выллем верамезлы: «Улон сюресмылэсь кузьдалазэ ум мертаське арлыдъёсын. Улон сюресмылэн кузьдалаез — со адямиослэн сюлэмъёсазы но Музъем вылэ асьмелэи чылкыт, калыклы пайдаё уж лэсьтыса кельтэм пытьыосмы».