«Ку ветлом ни Ӟизми гопе?»
Ноку но ӧй малпалля мон, та ӝожмыт буре ваён кылъёсты гожтоно луо шуыса. Володя Романов, мынам бадӟым агае сярысь. Агае кыл сярысь вераськеме мултэс пӧллиськон ӧвӧл со. Угось кыкетӥ книгаме, кудӥз потӥз асьме издательствоямы миым, мон соку ик кузьмай вал Володялы. Романов та повестьёсылэн киросатаез вал — рецензентэз. Книга вылэ таӵе кылъёс гожтӥ: «Володя агаелы, гажаса. Авторез». Со синъёссэ ик кисыртыса учкиз но шуиз:
— Ну, слава богу, тон но визьмо кылъёс гожъяны кутскид.
Котькуд учырез угось Романов быгатэ вал лэчыт, шулдыр кылын но пальпотонэныз вунонтэм карыны.
...Дас арлэсь ятыр ми соин тодмо вал. Пӧртэм дыръёсы ми соин пукылӥм, вераськылӥм, эсьмаса, литература сярысь ӟырдыт ченгешылӥм но, ог-огмылэсь ӧсъёсмес но ларк шуккыса кошкьглӥм. Нош ӵуказеяз нош ик серем пыр ваньмыз ортчылӥз. Малы ке шуоно, со нокинлы но йырзэ кур кема ӧз возьылы. Шонерак вералоз но тӥни. Со сямызлы ик луыса, Владимир Васильевичлэн уно гинэ тушмонъёсыз но луылӥзы, нош солэсь уката но тросгес — эшъёсыз. Мае пусъёно на — со бордын ялан муш мумы бордын кадь гужласа ветлылйзы егит литераторъёс, художникъёс, артистъёс. Сомында нимъесты татын вераны луоно: кык Иосифъёс — Бобров но Иванов, М. Федотов, В. Шибанов, П. Захаров, Т. Л. Кутянова но мукетъёсыз.
Литература удысын ужамзэ, мон оскисько, рос-прос эскерозы на критикъёсмы, литературоведъёсмы. Нош мынам вераме потэ Владимир Васильевич Романов - адями сярысь, кыӵеен адскиз со мон азе.
…– Кылзы ай, мыйыко адями, кыче технической амалэн тон гожъяськиськод?–юаз со огпол.
– Кызьы меда? Ӧйтӧд, – могӟи мон, – ну, шуом тазьы — куатъ предложение малпасъко но сое ваньзэ куинёзь пызьыртисько... Лыдӟисьлэсь дырзэ шыръясько.
— Ха-ха-ха! — зурскалскиз серектыса Владимир Васильевич, — тон соку сютэм кылёд. Визьмо адямиос куатьысь дас кык карыло. Дышетскы, эше!
Тӥни озьы. Улонысь котькуд учыр шоры Романов ас сяменыз учкылӥз но лэчыт кылъёс шедьтылӥз.
...Куддыр Володя ог 2—3 арнялы ышылэ вал. Я республикаетӥ командировкае, я мукет шаеръёсы. Соку ик шӧдӥське вал, улонын маиз ке но уг тырмы шуыса. Нош со вуэ ке доре — инмар понна, гудыри кадь вуэ вал. Соку ик поттэ блокнотсэ.
— Слава, срочно кылзы кылбуръёсме. Али гурысь, ява. Тон таӵезэ кайта гинэ гожтод ай!
Собере бур киыныз шоналтыса кисьтыны кутске кылбуръёссэ! Эх, кыӵе со чебер адске вал соку! Пурысялэс костюмен, чагыр дэремен но сюлмысьтыз ик потэм кылбуръёсыныз. Ноку вунонтэм суред... Та суред мынам даурозям кылёз, из вылэ вандэм кадь. Тодэ ваёнъёсам. Милемлы Романовен пӧртэм литературной пумиськонъёсы уно пол уртче ветлоно луылӥз. Ялан паймисько вал солы. Пенсионеръёслы но, школае ветлӥсьтэм пиналъёслы но сюлэмъёсазы со соку ик ӟеч усьтон шедьтэ вал. Ми кадьёслы но, егитъёслы, со вӧзын озьы шуныт луэ вал.
Сямаз солэн самой пусйымонэз — паймонэз вал. Ваньмыз шоры учкыса, со сюлмысьтыз ик паймылӥз: будӥсь турын-куарлы, ӟардонлы, тулыс зорлы, ппспу выжыын потӥсь губилы, выль но сач-сач удмурт кыллы.
Володя ӵемысь вуылэ вал мынам вордскем гуртам — Выль Казьмасэ. Отын со соку ик ӟеч кусып шедьтӥз анаеным — Афанасья Фёдоровнаен. Ялан соос оломар сярысь но лабыртылӥзы. Собере ӝытсэ изён азьын Романов шумпотыса ивортылӥз мыным:
—- Инмар понна! Туннэ юнме ӧй улы. Анаедлэсь кык выль кылъёс тодӥ. «Дэреми» ко «бадӥз». Дэреми — со дэрем е, нош бадӥз — аналмиз. Вот тон ветлӥськод — пыд улдэ уд адӟиськы.
Нош нюлэскын со чылкак паймытылӥз монэ. Кыче турын-куарез, кыӵе будосэз гинэ уг тоды вал со... Куко-пыдо энциклопедия но тӥни. Ӵемысь ми соин Ӟизми гопе, гурт сьӧры ветлӥськом вал. Ожогуби бичаны. Ӟизми гоп — со милям дано интымы, мон со сярысь верос но гожтӥ вал. Вамышъянъя-вамышъянъя дугдӥз Романов соку кузьыли муӵ доры.
— Ма, учкы ай. учкы ай, кыче паймымон маке та, — шуиз со. Собере лулӟиз: — Асьмеос но бызьылӥськом. сюлмаськиськом, пӧсекъяськом, нош озьы ке но — нокызьы но быдэс сикез ум ортче, ум мерталэ вамышъёсын, Паймод, ява, та улонлы.
Ззм но. берло дыре со ӵемысь вераськылэ вал тазьы. Улон но кулон сярысь…
Быдэс нунал ми соку поръямы Ӟизми гопетӥ, артэ нюлэскы но пырам. Быдэн куды губи бичам. Нош ӝыт пал Володя чусомиз. Сямзэ шӧдыса, мон ӧй ёрты ни сое. Шӧдӥ, та нош ик кылбур гожъя йыраз.
..Нош туэ гужем Камбаркаын литературалы сӥзем нуналъёсы кема гинэ сылӥм ми соин тымет дорын. Али гинэ лыдӟисьёсын пумиськемысь вуим вал. Жадим.
— Эх, куазь-то кыӵе ведь! — шуиз со. Собере ватсаз: — Ожогубиосмы тачак ини, дыр. Ӟизми гопамы... Малпаськоно луоз та сярысь.
Тӥни озьы. Ӧз удалты ни соин ӵош поръяны. Эх, Володя... Ӝуаз тынад сьӧлыко но чылкыт, чебер сюсьтылэд. Юнме ӝуаса ӧз быры, артэ сылӥсьёслы со сюсьтылэдлэсь уката югыт но яркыт кадь луиз та дуннеямы.
