Смирнова Е. Г., Чемошур-Куюк школаысь вылӥ образованиен дышетӥсь.
Владимир Романовен нырысьсэ пумиськи Чем-Куюк школаын дышетскыкум. Дышетскисько вал 7-тӥ классын. Урокъёс бырем бере вуэм со гуртамы, соин ик пырем дорамы. Со вакытэ мон «Дась лу!» газетэн эшъяськисько вал ини, соин ик ваем со редакцилэсь кузьымъёссэ.
Выльысь пумиськи УдГУ - лэн студенткаез луэме бере. Эшеным, Таня Чикроваен, ми дышимы редакцие ветлыны. Со вакытэ отын ужало вал мыло-кыдо журналистъёс: Герман Алексеевич Ходырев, Елена Кондратьевна Глебова, Николай Фёдорович Бигбашев. Соос пӧлын ик вал Владимир Васильевич Романов но. Быгато вал соос мылкыдэз ӝутыны.
Одӥг пол Владимир Васильевич шуэ:
– Вот маар, Лена, журналист луыны мылкыдыд ке вань, мын ай тон 22-тӥ школае. Дышетскы командировкае потаны. Та школаын пионерской уж умой пуктэмын. Тодматскы пионеровожатоен, вай милемлы материал.
Туж но туж дӥсьтытэк мыни со школае. Али гинэ гуртысь вуэм нылаш (нырысетӥ курсын дышетскисько вал соку), нош татын городской школае мыноно. Эн мыны вал – Владимир Васильевичлэсь возьыт.
Вожатойзы туж каньыл, ӟеч мылкыдо вылэм. Одӥг кыл шедьтӥмы. Октябрёноке пыртон праздниксы ӵапак тупам. Озьы Владимир Васильевичлэсь ужзэ быдэстыны быгатӥ.
Табереяз мукет школае ыстэ. Отын туж зол, пе, ужа КИД-зы (клуб интернациональной дружбы). Зэмзэ но, таӵе тунсыко ужез ӧй на адӟылы вал. Кунмылэн пӧртэм сэрегъёсысьтыз но кунгож сьӧрысь трос пиналъёсын эшлыко кусып возё вылэм.
Нырысетӥ курсэз йылпумъяса, каникулэ бертӥсько ни. Кӧня ке дырлы кожи редакцие. Мар шуоды? Нош ик Владимир Васильевич кырмиз. Бертӥськд ке, пе, Алнашады вань Лида Машкова. Со тулыс Москвае ветлэм, Вормон Знамя дорын фотографироваться карыны. Со вал 1975-тӥ ар. Мар карод на, кылзӥськытэк умой ӧвӧл. Мынӥ Алнаше, Машковъёслэсь корказэс юалляськыса шедьтӥ, Лида ачиз но дораз вылэм. Озьы нош ик маке-маке гожтӥ та нылаш сярысь.
Тӥни озьы сюлмаьске вал кылбурчи Романов вуоно удмурт кивоштӥсьёсыз сярысь. Городской школаосы потаны проблемаез – шуг-секытэз солы ӧй вал, нош со озьы дышетыны тыршиз егитъёсты.
Общежитын улӥмы Татариысь Урсы гуртысь нылъёсын, Романовлэн вордскем интыысьтыз ас палъёсыныз, соин ик Красногеройской ульчаысь квартираяз но вуылӥськомы вал. Нырысьсэ доразы мынэммы бере, чылкак пайми вал Вова пиез удмурт сямен вераське шуыса. Отчыозь мынам кылэме ик ӧй вал, городысь пичи мурт удмурт кылын мед вераськоз шуыса. Владимир Васильевич сокем яратӥз анай кылзэ, ӟуч муртлы но удмурт сямен вазе вал. Одӥг пол юмоке но сюрем. Курсысьтызы ӟуч ныллэсь удмурт сямен юам, дыр кӧня час шуыса. Соиз воксё мукет валаса, институтысь комсомоллэн комитетаз чагиськем. «Пыжыны» ӧтиллям ик вылэм, но Володя Романовлэн янгышез отын вылымтэ.
Вераны кулэ, дыр, созэ но. Бигеръёс пӧлын будэменыз-а, мар-а, пӧртэм калыкъёс пӧлын но со ассэ эркын возьылӥз. Сцена вылэ тубыса но со ӟуч залэз но кутыны быгатэ вал. Аслэсьтыз кылбуръёссэ зэмос артист кадь лыдӟылӥз.
3-тӥ курсэз йылпумъяме бере, ужай «Металлург» лагерьын. Металлургической заводлэн лагерез элькунысьтымы одӥгез бадӟым лагерен лыдъяськылӥз. Вот со лагерьлэн клубаз кылбурчиосын пумиськонэ ветлӥз Владимир Романов кылбурчи но. Ӟуч кылбуръёссэ сцена вылысен лыдӟиз. Пиналъёс шокатэк кадь кылзӥзы. Со суред али но син азям пуксе.
Ужаны кутскем бере но трос пол пумиськыны кылдылӥз. Студент дыръям туж кепыралляй ке, табереяз дыши ни. Серемес верамезы серемес ответ но шедьтылӥ.
Туж сюлмаське вал гуртысьтымы тӧл вуко понна.
– Лена, та тӧл вукодэс кызьы ке но утёно. Утёно!
Пумиськылэммылы быдэ озьы шуэ вал. Ярам, солэн сюлмаськемез юнме ӧз луы: тӧл вукомы туннэ сылэ Лудорвайысь музейын.
Берпумзэ пумиськимы май толэзе. Ёросысьтымы удмурт кылъя дышетӥсьёс кенешимы кылбурчиосын пумиськон ортчытыны. Но озьы луиз: Азамат школаысь Рябина О. В. кошконо луимы Ижевске. Отын милям пиналъёсмы «Юан-веран, тодон-валан» телеконкурслэн финалаз пыриськизы.
Ижевскысь бертыса, мынӥ Алнашысь РОНО-е командировочнойёсмес сётыны. Чапак отысен пумиськи Владимир Васильевичен. Котьку сямен ик юмор пыр пыкылэ ини, малы пумиськонэ ӧй ветлы шуыса. Валэктытэк ӧйлась. Нош кинъёс ветлӥзы шуыса юамелы, эше, пе, Мыйов вал шуэ. Озьы соку ик Бобровлы удмурт фамилия шедьтӥз.
Тӥни сыӵе тунсыко, визьмо адями вал со, Владимир Васильевич Романов, удмурт кылбурчи, журналист.
