«Ах, кыӵе кырӟанэз вакчи…»
ПОЭТ СЯРЫСЬ мадёнме мытэмелэсь азьло дневникам учки: мар меда со сярысь гожтӥськем вылэм? Тани отысь чурьёс: «9. 09. 89 ар. Ватӥм В. Романовез. Куазь шундыё тупаз. Гужем но гужем. Люкиськыны лыктэм калык трос вал. Сюлэмзы бӧрдонэн, ӝож мылкыдын тырмемын. Малпалэ ай, 46 арескын кошкиз адями! Самой кын корт куртчон вакытаз! Самой быгатӥсь адямиос, пе, вазь куло. Ӧйтӧд ини. Озьы ӧй вал шат Г. Красильниковен, Ф. Васильевен, Р. Валишинэн?.. Табере тани бӧрсязы кошкиз В. Романов но...» Мар шуод, кылбурчиез юылэменыз сэрея улэп дыръяз тыро-пыдо ӧз дунъялэ. Кулэ ӧз каре... Нош со ноку но йырзэ ошыса ӧз ветлы... Ваньзэ та сярысь веразы, кылбурчиен люкиськыку.
Кулэм мурт сярысь уродзэ уг поттыло, шуо. Но вал ук, вал солэн умойтэм сямъёсыз но. Лӧптылыны яратылӥз, ушъяськыны, куддыр мукетъёссэ ултӥялляз но... Нош кытӥяз со кадь умой адями но ӧй вал: жалялоз но, юрттоз но, дурбасьтоз по, юмоке, шуге-леке шедемлэсь но утёз. Соин шулдыр, соин капчи. Со мӧзмыны маза ӧз сётылы нокинлы но. Котькинэн огъя кыл шедьтылӥз: пересеныз но, пиналэныз, пичиеныз но. Таӵе нюжаез ик солы туж юн юрттылӥз аспӧртэмлыко чуръёс кылдытьяны. Озьы, кылсярысь, вордскемын берпуметй «Йырберыктон турын» сборникысьтыз «Городын-а мон я гуртын...» кылбур. Паймыса но шумпотыса, со вакыт ик даньяськыса, В. Романов вералоз вал асьме удмурт калыклэн сач-сач но меӵак визькыланы быгатэмез сярысь. Вылӥын поттылэм кылбурлэн кылдонэз таӵе вал. Командировкае потакуз, одӥг пересь кышномуртлэсь со маке сярысь юалляськыны шӧтам. Но соизлэн лабыртыса пукыны дырыз ӧй вал, луоз, уж пӧрзэ быдэстыны дораз дыртӥз:
– Ну чылкак «выжыё пу» ук тон!
Нош гожъяськисьлы мар кулэ на! Со «зӥртэм» визькылэз мечез сямен кырмиз. Ыштэмезлэсь, вунэтэмезлэсь шурдыса, кыл йылаз бергатӥз, куддыръя, кыӵегес кылӥськемзэ, чузъяськемзэ, чакласа кадь, шара вералляз. Сиропу визькылэз кылбурчи шедьтӥз на, вылды, К. Дзюинаен люкам фразеологической словарьысь. Володя ачиз но вералляз, туж троссэ кылбурзэ гожтыны та кыллюкам юрттӥз шуыса. Милемлы, егитьёслы, отчы ӵемгес учкылыны чектылӥз.
Тӥни озьы, ваньмыз огшоры учыр кадь. Кинлы кин мар но уг вера. Огез сое вунэтэ, нош кылбурчи калыклэсь кылэм визькылэз весяклы сюлмаз кельтэ. Кылбурез выльысь учкыса потӥд ке, уд ик малпа, та произведение кышномуртлэн верам кылыныз сэрен гинэ вордӥськемын шуыса. Тӥни сыӵе со поэт. Солы тырме одӥг гизьы гинэ. Куддыръя кыӵе ке тунсыко выль кыл кылэ но лӧптылон мылкыдыныз шуэ вал ини: — Сё, кылбур кисыын! Та верамез огшоры ушъяськон гинэ уг луы, ӵемысь со нуналаз ик гожтэм кылбурзэ эшъёсызлы шара лыдӟылӥз. Туж паймоно вал поэтлэн сыӵе ӝог гожъяськыны быгатэмезлы. Кылбур гинэ ӧвӧл, газетэ статья но, издательствое рецензия но туж чаляк «пӧра» вал. Малпаськод, сыӵе дыртыса ужзэ быдэстӥз бере, тури-пари гинэ, ньӧмыз понна гинэ лэсьтӥз, луоз. Лыдӟыны кутскиськод но чабкиськиськод, туж визьмо, валаса, лад-лад, быгатыса гожтэмын. Асэным ӵошатыса (мон ачим уго туж секытэн котьма борды кутскисько),паймисько но, вожъяськисько но вал солы. Асме ачим возьытэ вуттыны тыршыса, одӥг пол гинэ ӧй вералля: «Тӥни кинлэсь адӟем карыны кулэ».
Бен, тросэзлы адӟем карымон вал Владимир Романов. Чеберлыко литератураез вӧлдонъя но валэктонъя бюроын ужакум, со одӥг пол лыктӥз но шуэ: « Кылзы ай, ойдо пионерлагере поталом. Пиналъёсты асьмеос чылкак вунэтӥм ини. Ум встлӥське соос доры», — малы ке но вань писательёслэсь янгышсэс ас вылаз басьтыны дыртӥз со. Соку ик кутӥз телефон трубкаез но, справочникысь кулэ номерез бичаса, «куное ӵектӥськиз». Озьы уно гинэ шумпоттылӥм ми соин нылпиосты гужем каникулъёс дыръя. Вал юмоке сюрылон учырьёс но. Городысь пиналъёсты шуг маин ке паймытыны. Писатель-а, мукетыз-а со вуэ, нокыӵе кадь ик ӧвӧл, юр-яр! гинэ потто. Нош В. Романов вазе ке (татын со кылбурчи, усто лыдӟись гинэ ӧвӧл ни, ӟеч педагог но), пиналъёс ымазы ву ӟузё кадь. Кылбурзэ но уго со артист кадь лыдӟыны быгатылӥз. Пичи арлыдо но, бадӟымъёсынызгес но нылпиосын туж чаляк огъя кыл шедьтылӥз. Соин ик лыдӟисьёсын пумиськыны мон В. Романовен ӵош котьку ик шумпотыса мынӥсько вал. Дырме юнме быдтӥ шуыса пичи но ӧй жалялля. Ма со улэп энциклопедия вал ук! Мае гинэ ӧз тодылы. Басьты эмъюм турынъёсты, губиосты, тылобурдоосты...Куддыр осконтэм кадь потэ вал: «Ма, кытысь со ваньзэ тодэ?..» Берло йӧндыри: мугез огшоры вылэм. Со пичи дырысеныз котьмае тодыны тыршем, котьмаин тунсыкъяськем. Тае шӧдоно. кылбуръёссэ лыдӟыса но. Кылсярысь, сыӵе произведениосыз пӧлы пыртыны луысал «Ваёбыжзэ». Ваёбыж карез тӥяса, куашкатыса, тылпу потоз шуэмез кылзытэк, пияш кечырске отчы, тылобурдо пиослы кӧй нӥзили сётон понна. Огласянь со урод лэсьтӥз кадь, анаезлэсь алэмзэ ӧз кылзы, но тӥни юмоке шедиз. Нош мукет ласянь шумпотоно — пияшлэн адӟемез, сюдэмез потӥз ук ваёбыжпиосты. Автор кылбурзэ пиналъёслы лыдӟыку синкылие ик потылэ вал. Володя татын, пичи но будэтытэк, ас пичи дырыз, ас улон-вылонэз, атайтэк кылемез сярысь маде.
Котьмае тодыны тыршемез солэн берпум шокчытозяз ӧз кысылы. Пумиськыку, выльзэ лыдӟемез. тодэмез сярысь ивортыны одно ик дыртылӥз со: «Ӧд лыдӟы-а? Кызьы? Одно ик лыдӟы, уд жаля».
Нош куддыр нырзэ котькытчы чуртнан сямыз вожез поттэ вал. Ужан дорысь ӝӧк вылын нокыӵе кагаз возьыны ӧз луылы: ваньзэ сузялляз. Вуттымтэ кылбурдэ но, гажано нылмуртлы ыстыса вуттымтэ гожтэттэ но шара лыдӟоз...
Бен, азьвыл мертэтъя учконо ке, та «чыры-пырыосты», оло, вунэтыны но кулэ вал. Суредано вал, дыр, лӧль буёлэн гинэ! Озьы кылдысал Ленин выллем самой адямилыко адями. Ярам ай табере вакыт тӧл воштӥськиз. Сыӵе куронъёс гожъясь азе пуктӥсь ӧвӧл ни кадь.
Флор Васильевлы сӥзем кылбур сузьетаз Владимир Романовлэн вань таӵе чуръёсыз. Соос аслыз но кылбурчилы тупало, ачиз сярысь гожтэмын кадь:
— Ах, кылбурчи, ах, ӵуж уӵы! —
Куддыр калык шуэ
Сяська пӧлын, пе, кылбурчи
Кайгырытэк улэ.
Огзэ уг тодо: сюлэмыз
Кыӵе тылын ӝуа.
Соин ик но паймо: пумыз
Шуак вуэ, шуак.
Озьы уго ӵемысь гинэ ум тодӥське матысь алямимылэн (кыдёкысез сярысь поттылонэз ик ӧвӧл ни) сюлэмыз кыӵе тылын ӝуа.
Ах, кыӵе кырзанэз вакчи
Озьы но кенжытэ.
Ачиз ӧвӧл ни кылбурчи,
Сюлэм пеньыз сутэ!
Солы, УАССР-ысь Государственной премилэн лауреатэзлы, туэ гинэ тырмысал 50 арес, нош Владимир Романов вӧзамы ӧвӧл ни 4 ар пала. Озьы ке но, солэн кылбуръёсыз улэпесь, соос пиналъёслэсь но, бадӟымъёсызлэсь но сюлэмъёссэс шунто. Кылбурчи уго одӥг кадь быгатыса лулэз бугыртымон ӟеч гожъяськиз.
