Федотов М.
Володялэн узыосыз
Толон гинэ вал кадь со. Ми соин ветлӥм нюлэскытӥ поръяса, губи бичаса.
— Эх! — шуиз со ӝож куараен. — Туэ губи кӧня! Улон нош ик секыт луоз, дыр...
Мон соку бадӟым эшелэн верамезлы серекъяй гинэ, дыши вал ини озьы маскаръяськемезлы, меӵкытоз — коть бӧрд, коть серекъя. Ма, тодӥ шат мон, кылбурчи Владимир Романов, кайгуэн тырмем улонысьтыз ялан сайкытсэ адӟыны тыршись адями, кӧня ке нунал улыса, ми вӧзысь пыраклы кошкоз шуыса... Нош со дуннеысь ноку но уг бертыло ни...
Соку милемлы удалтӥз. Ми губиез быдэн кык корзина бичамы, дыр. Та ужын Владимир Васильевич ӵошатскыны быгатысал самой усто губичиосын но.
— Губи бичанлэн аслаз аспӧртэмлыкез вань, — вераз со серекъяса, — тыныд потэмзэ кокин но уз шедьты, со, песьтэр, тынэсьтыд мыкырскемдэ возьмаса улоз.
Кык уйлы ми мынӥм бакчаям, кык нунал шокам чылкыт омырен, сиим намер но али гинэ кисьманы кутскем горд-горд шу. Нюлэскытӥ ветлыса-ветлыса, Нылга шур дуре вуим. Ой, чебер отын интыос! Син азяды пуктэ ай: котырак куашето пужымъёс, нюлэс шортӥ ик бызе лыз-лыз шур. Вузэ юим, ческыт, ошмесысь кадь. Владимир Васильевич соку пичи пинал сямен шулдыръяськиз. Мон, шуэ, татчы корка пуктысал но улысал, тйяедыз, албастыо-сыз, куное ӧтчаллясал. Ми ог-огмес 15 ар пала ке но тодӥськом вал, эшелэсь таӵе мылкыдзэ адӟыны ноку ӧз кылдылы. Соку мон вожъяськи но куноелы. Ма, кызьы озьы пичи макелы но сокем паймыны быгатэ!
Бертӥм но ми нюлэскысь озьы ик шулдыръяськыса, улрнысьтымы маскара учыръёсты тодэ вайыса. Гор-гор серектӥськом — быдэс нюлэс зурка.
Нош Володя серекъяны быгатэ вал.
Ӵуказеяз ми узы мерттӥм. Со ачиз ик убо но дасяз, сое корт мажесэн небӟытӥз, «сыназ».
—Ойдо ужа, ужа, — шуисько. — аслыд мерттӥськод. Со шонерскиз но чик малпаськытэк кадь гинэ вераз:
— Ярам, ярам, табере мынам кулэме но уз поты ни...
Уретэм кадь вераз, сыӵе вал ини эшелэн сямыз. Нош сюлэмын маке но тёп! кысӥз...
Собере Володя пичи шурысь ву тубтаз, сое мерттэм узыез вылэ кобыен киськаз...
Ми кошкнм ӵынэн ӝокатэм Иже, нош кылбурчилэн сюлэмыз ялан нюлэскын на вал, тылобурдо сямен лобаса. Ог дасо нунал ортчыса, со пырак лопырскоз омыре. Нош вуоно арын, гужем, мынам убо вылам улӟозы узы сяськаос, собере горд-горд быгыльскозы емышъёс — Володялэя узыосыз.