Тон самой ӟечсэ серметад
Владимир Романовен школаын дышетскыкум ик монэ тодматӥз Аркадий Николаевич Клабуков. Одӥг ӝытэ со милемыз, гожъянын тэтэ карисьёсты, телестудие люказ но чагыр экран пыр возьматӥз: тани егит кылбурчиос, таӵеесь соослэн кылбур чуръёссы! Кыӵе кылъёс верамы ми соку Володяен ог-огмылы, уг ни тодӥськы, но А. Клабуковлэн со ӝыт мыным гинэ верам кылъёсыз пыраклы кылизы. «Ваньды пӧлысь, — шуиз со (нош ми пӧлын соку вал на Н. Бигбашев, Л. Широбокова но эшшо кӧня ке егитъёс),— мон оскисько Володя Романовлы».
Со телеӝыт бере ми туж кематэк ӧм пумиськылэ. Володя пединститутэз но йылпумъяса вуиз, армие но ветлӥз. «Мынам тулысэ» книгазэ но, покчиослы книгазэ но поттыса вуиз ни, но сюресъёсмы одӥг воже ӧз вуылэ. 70-тӥ аръёс кутскыку матэктэммы бере но ми соин чаль гинэ ӧм эшъяське. Пурт кадь лэчыт кылыныз адямиез со му пыр виятылӥз но ас дораз туж матэ ӧз лэзьылы кадь, потылӥз мыным. Со одно ик кыӵе ке мырӟиськон инты утчалляз кадь. Вераськод аслыд кельшись кыӵе ке малпандэ – со одно ик юалоз: а кытысь лыдӟид? Куноятӥськод сое дорад кыӵе ке ӟеч, аспӧртэмлыко винаен – со шуоз: а мар тон монэ кӧш винаен сектаськод? Солы луыса, кезьыт тӧл куспытӥмы одӥг пол гинэ ӧз пельтылы ке но, литература милемыз берен огинэ вуттылӥз. Ӵушъялъяськон сямзэ но берлогес валай: лул-визь медам бабы, улыны мӧзмыт медам луы шуыса, со ялан тырше вал кыӵе ке серемес югдур кылдытыны, отысь юмоксэ юромо висъяса возьматыны. Тодэ лыктэ таӵе учыр. Володя ужа вал Флор Васильевичен артэ – Писательёслэн союзазы. Романовез сюлмаськытылӥз литератураын огъя югдур, писательёслэн малпаськон эсэпсы. Куд-ог гожяськисьёс туж ичи лыдӟисько, шуэ со, «зӧк» журналъёсты киязы уг но кутыло. Одӥг эшеныз та пумысен эчешыса, со шуэ: ма бен, давай, давай эскером! Ӝутэ телефон трубкаез, жингыртэ одӥг сӥё-дано писательлы. «М. А!.. – вазе со. – Тани Союзын «Новый мир», «Октябрь», «Наш современник» журналъёс кыллё вал. Берло номеръёсыз олокытчы луиллям. Татчы пыракуды, тӥ басьтӥды, шуо кадь». «Што ты, што ты, Владимир Васильевич, – абдра соиз, – кызьы мон басьтом? Со журналъёсыз мон киям но уг кутылӥськы».
Сэзь луэменыз, Володя Романовлэн котьма гинэ но син шораз йӧтылӥз, со котьмае но чаклаллям. Одӥг пол автобусэн «Удмуртский» совхозэ ветлӥмы. Бертӥськом ни ӝытазе тыл югытэн, жадьыса, жуммыса. Городэ пыримы, сюресмы партилэн Первомайской райкомезлэн юртэз дортӥ ортчоз. Павел Куляшов ваньмызлы вазиське: «Чаклалэ, чаклалэ! Учке али райком юрт вылэ, кыӵе тыл букваос отын ӝуало: «Паны партии — паны народа!» Зэм но, кӧня пол ортчылӥ ни райком дортӥ: «Планы партии — планы народа!» лозунгысь «л» букваос усиллям но, серемес кылъёс пӧрмиллям. Тодо сое мукетъёсыз но. Нош Володя шуэ: «Эшъёс! Куляшов пӧяське. Озьы ӧвӧл гожтэмын. Адӟисьёс луэ, мон соин эчешисько». Ваньмы чидатэк витиськом ни: кин вормоз? Вуиськом — букваос интыязы! туннэ ӵукна гинэ тупатӥллям – Володя сое синйылтыны вутскем. Ӵапак соин но, дыр, Володя Романов котырын ноку но мӧзмыт ӧй вал. Серемдэ ке ӧз потты, пӧсьтурын пызьналоз. Со тужгес но ӧз яратылы литератураын суп-сап ужамез. Куд-огезлы синмазы ик меӵкытъяз. Валамон, сыӵе луэмез понна, сое ассэ но«куртчылӥзы». Кылбурчи пунэме ӧз кыльылы: шуак вазиськылӥз эпиграммаен. Кинлы кельше меда юнме шорысь ултӥян. Гожъяськись муртлы, поэтлы, огшоры адямиосын ӵошатыса, оло, уката но вӧсьгес. Тани сое ялан «куртчылӥсь» мурт одӥг гожъяськисьлэсь рукописьсэ тупатъям но «В чужой шинели» книгаез кык нимын поттэм, аслэсьтыззэ но ватсам. Володялэн лэчыт чуръёсыз дась ни: «В своей шинели ходишь еле-еле, куда ж ты прёшь в чужой шинели».
Володя котырын шудон-серектон гинэ ӧй вал. Уродэз но ӟечез куспын нюръяськонлэн тылӝуаз улӥз бере, солы но котьмае адӟоно но чидано луиз. Ӝож мылкыдзэ чемысь ӧз возьматылы, но куддыръя адскылӥз ик: солы но сюлмаськем, сое но утем кулэ. Атаезтэк будэм пи воргорон луэм дыръяз но сирота кадьгес вал. Нош сюлмын-визьмын ужась адямилы, оло, саклык но, шунытлык но тросгес кулэ. Но со ялан ужаз поэзия бордын, секыт-а вал, капчи-а – ужзэ ӧз вунэтылы.
1985 арын мон гожтӥ вал солы эшлыко шарж:
Поэзилэн трос валъёсыз,
Тон самой ӟечсэ серметад.
Шумприч ворттылон сямыныд
Медад гинэ усь вал, медад!
Туж жалясько: «Молот» журналлэн соку редакторез А. Уваров та чуръёсты дырыз дыръя ӧз печатла. Бер ке но, Володялэн шай коросэз дорын мон лыдзоно луи соосты.
Володя валаз но дунъяз поэзилэсь кужымзэ. Со утчаз кадь адямилэсь сюлэмзэ, йырзэ ӟечез пала берыктыны быгатӥсь кылъёсты, чуръёсты. Со сярысь ик вера кадь берлоез быдэсак книгаез
но, книгаезлэн шорсюлмыз — «Йырберыктон турын» кылбурез но. Нимысьтыз чаклам потэ вылэм сое. Володя ачиз но яратэ вал, кинлэсь ке одӥг кылбурзэ басьтыса, сое пыр-поч эскерыны, пуштросаз пыдло-пыдло пырыны. Та кылбурын верамын чапчара огназ кылем нылмурт сярысь. Ветлэ со Нылга шурлэн возьёстӥз но малпа йырберыктон турын шедьтыны:
Ай шедьто, ай мон шедьто
Йырберыктон турын.
Тон ачид ик ай лыктод
Куке но мон доры.
Асьмеос ум тодӥське, кызьы но ку со нылмурт яратонзэ ыштэм, но ыштэм яратонзэ кылбурысь героиня пумтэм жаля:
Кык сяська гинэ котьку
Луэ йырси полам.
Шур дурысь мозмись бадьпу
Монэ умой вала.
Нылмурт ассэ оскытэ, йырберыктон турынэз одно шедьто ай шуыса. Татын шуг валаны, шедьтоз-а нылмурт сыӵе сяська, но ачиз кылбурчи вылэ выжтыса ке верано, солэн творчествоез йырберыктон турын ик вань. Коня лыдӟисьёслэсь сюлэмъёссэс берыктоз со удмурт кыллэн чеберлыкез пала но ӟеч ужъёс, сайкыт мылкыдъёс пала.
Кылбурез бордын Володя Романов ужа вал кыӵе ке дуно арбери бордын кадь: вӧлэ сое, жингыратэ, бурдъя. Бен форма шуон мае ке со туж чаклалляз, мукетъёсызлэсь тунсыкозэгес адӟе ке, паймемзэ уг ваты. Огпол со шӧдтэк шорысь ӝутэ «женской рифма» сярысь вераськон. Афанасий Лужанин шуылоз, пе, вал: «нылкышно рифма» удмурт поэзие уг выжыяськы, удмурт кылын ударение берпум слог вылэ усе. «Но кылзы тани!»— Володя интыысьтыз тэтче но «нылкышно рифмаен гожтэм чуръёссэ лыдӟе. Мон но ас люкамъёсысьтым Александр Костылевлэсь «Автобус» кылбурзэ лыдзисько:
Пуко предколхоза вӧзын пересьёс.
Соку ик кутскиз вераны предколхоза:
«Асьме колхозэ, пе, автобус вуоз...»
Таӵе вормемез кырӟамед но луоз-а?..
Та чуръёсты кылыса, со чылкак пайме но шуэ: «Ма учкы ай, 30-тӥ аръёсы ик кыӵе кылбур техника вылэм ини, кызьы меда та кылбурез А. Лужанин адзытэк кылиз?»
Володя Романов, тодӥськом, трос гожъя вал нылпиослы но. Монэ котьку но паймытылӥз солэн нылпиосын вераськыны быгатэмез. Удмуртъёсыныз но, ӟучъёсыныз но пиналъёсын огъя кыл одно шедьтоз вал. Тани со лыктэ «Нюлэс шаер» пионерлагере. Нылпиос огыр-бугыр выро, люр-ляр каро. Кызьы соосты либатод?
– Тодӥськоды-а? – кутске веранзэ Володя пезьгыт куараеныз. – Мон туннэ тӥледлы куинь ивор вайыса лыктӥ. Нырысез «Пионерская правда» газет туннэ сётоз писательёслэн съездзылы нылпиослэсь гожтэтъёссэс: со гожтэтъёсын верамын, мар лыдӟемзы потэ вылэм пиналъёслэн. Кыкетӥез: вералэ ай, кин татын кылем арын шутэтскиз? Люкады-а тӥ кылем арын эмъюм турынъёсты?
– Бе-ен!
– Веразы-а вал тӥледлы, поттэм коньдонды Шура Бабиковлы памятник лэсьтонэ мыноз шуыса?
– Бе-ен!
– Соку ивортӥсько: Бабиковлы памятник лэсьтон понна коньдон люкамын, тау тӥледлы. Алигес гинэ потӥз солы сӥзем книга. Отын пинальёслэн асьсэлэн но кылбуръёссы печатламын. Нош кылзэ ай, ку тӥ султӥськоды ӵукна?
– Сизьым часын! — одӥг ымысь кадь вазе пиналъёс.
– Нош ку тӥляд отбой?
— Дас часын.
– Со тӥледлы туж вазь уг поты-а?
– Ва-азь!
– Мыным но озьы потэ: вазь со! Нош тӥ толон тэле ветлӥды-а?
– Ве-етлӥм!
– Map отысь ваиды?
– Боры!.. Губи!.. Пыштурын!..
– Нош мон, пиналъёс, нюлэскысь ваи выжыкыл! – вазе Володя но кылбурен выжыкылзэ лыдӟыны кутске.
Трос писательёсын пумиськоно луэ университетын, соосты выль книгазы сярысь вераськонэ отьылыку. Вал сыӵе пумиськон «Йырберыктон турын» потэм бере но. Студентъёсы, ваньмыз нылъёс, со пумиськонлы туж ляб дасяськиллям яке поэзиез валамзы-а сыӵе вал: Володя Романовлы аслыз ик тросгес вераськоно луиз, нош солэн аслаз кылэмез потэ вылэм. Мыным туж возьыт вал со азьын. Кафедрае лыктыса ни, со шуиз: «Ма тон, Саша, кызьы ужаськод та студентъёсыныд?!» Володялэн верамез котьку но улыно-вылыногес луэ бере, мон соку ик шӧдӥ, поэзиез валан сыӵе секыт сётӥське шуыса солэсь паймемзэ но, пыкылэмзэ но.
– «Нылкышно рифмаез» коть соос мед умой ятвылтозы, – ватсаз на соку кылбурчи.
