Загребин Е.
Мон дорам ни, нош тӥ куноын
Ижкарысь Совето ульчаысь лапышак мугоро, пыдъёссэ вылӥе ӝутъятэк вамышъясь воргоронэз адӟисько ке, сюлмы шымырске. Юромо сьӧраз мынӥсько, асме ачим пояса, будто ке со — Володя, будто ке со — мон азьын озьы вамышъя, будто ке со — юри озьы попирос ӵынзэ кульчоен-кульчоен омыре пелля. Я ӵок, воргорон, мын, вамышъя! Эн берытскы! Шуо ук: соослэн лулъёссы асьме доры вуыло.
Бен, Володялы кельшись адямиез пумитаськод ке, амалтэк малпаськод: нёжто тон ӧвӧл ни, «пеперуда»?
Бадӟым, паськыт Волга шур вылтӥ пароходын уямез бере (Володя соку экскурсиосъя бюроын ужа вал), ӝытазе Удмурт театре пыриз. Одӥгзэ артисткаез дугдытӥз но пальышаса юаз:
— Кыче улӥськод ни ай, пеперуда?
Не то серекъялод, не то йырдэ кур карод — артистка уг вала. Таӵе кылэз кылылэмез ӧвӧл.
— Вождэ эн вай, ява (нимзэ артисткалэсь вераз). Тодэмед потэ ке, пеперуда — самой чебер кыл, самой чебер уй бубыли! Болгар сямен...
Володяез тросэз ӧз валаллялэ. Витьымтэ шорысь со сыӵезэ «возьматоз», сыӵезэ вералоз — коть усь, коть погра!
Пыриз со кызьы ке вордскем нуналам мон доры, ужан дӥням. Маскара бӧдтьырам пыр ӟечкылаз но, кисыысьтыз кузь огреч поттыса, кескич пальпотыса шуэ:
— Адӟиськода, Ёги, кыӵе кузьым мон шедьтӥ. Тани учкы — ваньмыз татын вань. Куртчонэз вань? Вань! Сюлэм шумпотонэз вань? Вань!..
Зэмзэ но, Володя огшоры огреч ӧвӧл ваем. Солэн огреч пумаз пичи гинэ, зарни выллем, чуж-тӧдьы сяська. Огречсэ закускалы пӧрмытӥм, нош зарни сяська пушъет вуэн тырмытэм сюмыкын уяз.
Володя соку вылэ но вылэ тубе вал. Кытын Володя, отын — пальпотон. Я выль кылбур, я — анекдот. Но со огшоры анекдот ӧвӧл. Со татын ик пукись адями вылтӥ погыльтыса вералоз. Коть ас вылад басьты, коть — эшед вылэ. Ӵемысь кушем нимын вазиськоз вал:
— Я, кыӵе ни, Егор Багорыч!
Кудӥзлы таӵе выллем вазёнъёс ӧзгес кельшылы. Ӧзгес дӥсьтылэ матазы карыны, чудакгес шуылӥзы, вылды. Табере ни «адями кошкем бере»— ваньмыз умоен гинэ, чебермаса вералоз. Нош «чудакен» артэ улыса оскалтэ ай...
Одӥг пол Володя спектакль учко шуыса пыриз, но со залысь калыкъёс пӧлы ӧз дырты. Ужан интыысьтым укно янак вылэ пуксем но, пыдесъёссэ кыкеныз ик киыныз ӟыгыртыса, ангесэныз пыдес вылаз пыкиськыса, вырӟылытэк пуке.
«Адями малпаське, люкетоно ӧвӧл»,— кожаса, аслам уженым потыса кошки.
Спектакльлэн нырысетӥ люкетэз бере, аслам ужан дӥням туби. Кык-куинь эшъёсы но сьӧрам лыктӥзы вал. Володя, сӧсыртэм бурдо кадь, азьло сямен ик укно янак вылын пуке: Эшъёсы шуо:
— Каньсырамын соид... Тодӥсько: Володя шапык но курытсэ веръямтэ. Ӧйтӧд, мукетъёсыз адзылӥзы меда солэсь тазьы бурдъёссэ лэзьяса пукемзэ?..
Лэчыт кыло пыӵкылыса вераськись кылбурчилы таӵе астэ жильыен думылыса музэн пукон воксё уг тупа. Малы ке-а, вылды, «каньсырамын» но шуизы.
— Володя, уд валаськы-а? Я, васькы укноысь!
— Ёги, эн люкеты. Мон «Насьтоктэ» уг учкы. Мон ӧжытак шутэтско на...
— Володь!— шуисько.— Луӵӵе залэ мыном. Калыкез адӟом. Чебер нылъёсты учком. Ульчаын соос кубиста кадесь — дӥсь вылын дӥсь, нош татын платья коже. А?..
Нош Володя ӝожмытак гинэ ымпумтӥз мынектылӥз но нош ик «кынмиз».
Спектакль быриз. Туби, Володя азьло сямен ик жугем-сӧсыртэм тылобурдо кадь пуке. Ведь быдэс спектакль мынытозь озьы улӥз.
Тани али, трос аръёс ортчыса, со учыр сярысь малпаськисько но, юзыр-кезьыр луисько. Map сярысь соку со сыӵе мур малпаськиз?.. Малы со сыӵе аслыз ачиз тупасьтэм луылӥз? Кытчы ышылӥз-бырылӥз солэн огинтыяз пукыны чидасьтэм сямыз? Map сое сокем курадӟытӥз? Оло, шодӥз шат меда аслэсьтыз туж вакчи улон-вылонзэ? Оло, пачыл улонэн тырмем сюлмыз буйгатон озьы курылӥз?..
Вань улытозяз Володя аслыз «кар» утчаз. Ӧй вал солэн, ӧз шедьты со, ӧз сётэ солы сыӵе сюлэмзэ буйгатӥсь кар. Весяк кыстаськиз. Вераны кер потод, ым уг берытскы — улӥз со берло аръёссэ «уллям пуны» выллем. Туж ӝожмыт, одӥг койка пуктымон коммуналкаысь сэргын. Кӧтызъя ужез но ӧй вал ни берло дыре. Но со ӧз ӝожтӥськылы...
Меӵак вераса, Володя чылкак ассэ ыштӥз Флор Иванович Васильев бырем бере. Оло, со бадӟым эшсэ атаез интыын сюлмаз нуллӥз, инмарен, югыт нуналэн ӵошатылӥз. Флор Иванович быриз — Володя тодмотэм воштӥськиз. Някыртэм, чигем улвай кадь шуяны ӧдъяз, пыд улысьтыз музъемзэ ыштӥз... Берло дыре одӥг шапык но курытсэ уг тыры вал, нош мугорысьтыз «сурсвуэз» куасьмыны ӧдъяз.
Володя паймыса, бжытак кышкасагес учкылӥз пичиесьгес гинэ чебер сяськаос шоры...
Чебер сяськаос дунне вылын кема ик уг уло. Гужем шорын синмез мальдыто, шунды сиосты ярато, уин шымырско. Уез но, югытэз но гербер сяськаос кадь одӥг сяськаос но сокем уг шӧдо. Нунал-уй, уй-нунал... Борддорысь час тик-так тиккетэ — дырлэсь мынэмзэ возьматэ. Улон — кулон, кулон — улон...
Тани толон ӝыт Владимир Солоухин телевизор пыр кылбуръёссэ лыдӟиз. Нош ик мон Владимир Романовен пумиськи кадь. Туссы-буйзы но, лад-лад, дыртытэк вераськон манерзы но копак одӥг кадесь ук! Агаен вынъёс кожалод. Суд йырсиёесь, лапышак мугороесь, паськыт нырпелёесь, йырсиос-сы но бен бур пала кымес вылазы сыналтыса лэземын. Чуказяз Борис Олейникез адӟи. Чылкак абдрай. Таиз но маиныз ке но Владимир Романовлы кельше...
Табере Миша Федотовез, удмурт поэтэз, верасько. Таиз Владимир Романовлы уг кельшы кадь. Но... нош ик монэ воксё солэн кылбур лыдземез, оло нош, гожъяськон манерез но паймытэ — Владимир Романовлэсь куаразэ кылӥсько кадь. Ма, Миша Федотовлы гинэ шат Володялэн «маиз ке» пыӵамын! Соос — Виктор Шибанов, Иосиф Иванов, Вячеслав Сергеев, Пётр Захаров...
Гербер сяськаос пеймыт уе шымырско ке но, шунды ӝужаку вӧл-вӧл усьтӥсько...
Памятникез вылын ӧй вал та кылъёс, но букваен-букваен син азям пуксизы таӵе кышкыт чуръёс:
Мон дорам ни,
Нош тӥ куноын...
